電視大戰蓄勢待發，城市電訊、now和有線三間免費電視台今年將會正式啟播，陷入五台混戰的亂局。
為了爭奪人才，王維基於是出錢挖角，頓時拉高一眾演員的平均薪酬。
不過亦有一批甘草演員乏人問津，要留在無綫捱騾仔。
本刊得悉原來無綫的演員合約上有一項特別條款，指明演員完約未夠騷的話，須事先還清騷錢俾無綫才有資格傾續約，搞到部分演員還錢後變相冇糧出。
在無綫已是阿姐級的薛家燕，當然唔驚唔夠騷，不過她亦承認真有其事，她說：「呢啲係公司制度，冇法啦！」
而李司棋亦說：「我都聽過有人冇糧出。」

1. 續約前要計清做夠騷未
2. 未做夠騷需要向無綫賠償尚欠的騷錢

 
李司棋　効力41年　有人冇糧出
李司棋對此亦慨嘆說：「我都聽過有人冇糧出，冇糧出梗係慘啦！我好好彩冇試過。」

薛家燕　効力17年　係有咁嘅事！
薛家燕表示對「藝員還騷錢」一事表示見慣見熟，她說：「係有咁嘅事，公司制度，冇法啦！我做埋電台咪好啲囉，得TVB一份工嗰啲好慘！」

陳曼娜　効力32年　我睇唔過眼
効力無綫多年的陳曼娜，最近就以高六倍人工過檔城市電訊，她說：「我有啲嘢睇唔過眼，咪轉吓環境囉！」

元華　効力15年　真係好慘！
上月因不滿無綫對續約一事置之不理的元華，據知曾經試過要還騷錢，他說：「真係好慘。靠無綫嗰份就死得啦！」

 
多年來獨大的無綫，即將備受考驗，除了面臨電視大戰衝擊外，人事亦有大變動。一手創立無綫的六叔於前年退下來， 而六嬸方逸華亦將於本月25日離職。

六嬸突改合約
據知在六嬸接手前，無綫和藝員傾合約時，會擬定藝員一年騷（每半小時節目為一個騷）的數量。 即使藝員未獲安排工作而在完約時做唔夠騷，續新約時亦會一筆勾銷， 重新開始。不過自六嬸於2010年接替六叔，出任無綫行政主席後，在藝員合約內新加條款。所有藝人約滿時，如果未能履行合約內出騷的數量，續約與否，都需要賠錢俾無綫。「以前班藝員做唔夠騷都照樣有糧出，六嬸主政後，覺得咁樣對無綫唔公平，佢唔想公司蝕底。」知情人士說。

涉及五十名甘草
在商言商，六嬸此舉純粹保障公司利益，爆騷的小生花旦當然唔受影響，不過一班徘徊出騷臨界點的四、五線演員和甘草就慘受牽連。據知部分演員續約時就先償還未完成的騷錢，計落條數其實等同半年冇糧出。知情人士說：「無綫簽埋咁多人，邊度用得晒㗎！呢班演員好被動㗎，又冇得主動撈，一年至少五、六十個甘草同綠葉，續約嗰時要賠錢！」據知元華和艾威也身受其害，已過檔王維基的元華說：「無綫好多人都要還騷錢，真係好慘，靠佢嗰份（糧）死得啦！」而艾威被問到上月完約還騷一事， 他支吾以對，但說：「無綫好多人都欠騷，不過我依家喺王維基嗰度好好， 八月先拍劇， 但四月就有糧出。」李司棋、薛家燕等一眾甘草演員，表示一早對此條約知情，更紛紛戥一班要還騷錢的藝人慘。記者就此事求證無綫製作資源部副總監樂易玲，但她一直以開會為由拒絕回覆。據知樂現正着手處理這個騷約問題，希望盡快搞掂，平息一班甘草的牢騷。

五台混戰
電視台今年再起風雲，屆時全港將會有五個免費電視台。而五台各具特色，不過以經驗和班底來說，無綫始終贏面最大。

TVB靠人多
踏入45周年的無綫，旗下有免費和收費電視台。今年無綫亦有人事大變遷，去年初無綫宣布股權變動，主要股份由殼王陳國強所持有。無綫節目一向以多元化取勝，不少自家製劇集均甚有水準，而且依然網羅最多小生花旦。

CTI靠揼本
人稱「電訊魔童」的王維基於90年代創辦城市電訊，今年更進軍電視界。雖然暫時未見真章，但擅長宣傳的他，電視大樓還未落成，已率先用錢向無綫大舉挖角，更舉行造勢記者會，聲稱頭6年便投資10億。

ATV長期弱勢
一直咬着牙關和無綫硬撼的亞視，長期處於弱勢，近年惟有靠外購劇和低成本的資訊節目吊命。

有線電視體育取勝
在眾多免費電視台當中，有線全資附屬機構的「奇妙電視」最低調。不過有線在世界盃轉播權一事表現積極，相信此台日後亦以體育節目搶收視。

NOW狂擸歌星
由於無綫和五大唱片公司版稅問題搞極唔完，於是now就睇準時機，現時已經盡擸五大唱片歌星亮相收費台節目，故日後的免費頻道亦會以音樂節目掛帥。 ####


78歲的方逸華接管無綫後，一直採取鐵腕政策。本月25日，六嬸終於退位和104歲的六叔安享晚年。《蘋果日報》圖片


去年王維基發動電視台茉莉花革命，不停send sms撬人過檔（右圖），搞到無綫陣腳大亂。新上場的殼王陳國強（小圖）亦因此密會樂易玲商量對策。


陳曼娜在正在播出的處境劇《結•分@謊情式》戲份不少，據知原本她亦曾試過欠TVB騷，為了還騷要主動向監製撈。她說：「唔係個個好似我咁，一開口就有得做。」


去年拍了《天與地》共五部劇的劉丹，亦直斥這份合約有問題，他說：「TVB好多人都知，不過冇人夠膽呻啫，真係唔想撈咩。」


有份演出《東西攻略》的艾威，轉投王維基後，才夠膽呻無綫合約刻薄員工。



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄