若以「龍騰」取代「蟲行」一詞，對已兩奪視帝寶座的郭晉安而言，可能更見敬重；然僅靠堅韌意志，如蟲兒蠕行向前，擺渡彼岸，也不是易事。從 86年加入 TVB迄今， 25年的光景，快 47歲的他由第 4代小生、第一批往內地闖的香港藝員，到回巢默默拍劇，看盡兩地電視圈的盛世，也在浮沉中穿梭與騰挪。郭晉安說，自己從來都是喜小而不好大。「其實我係自我價值唔係好高嘅人，入行初頭被人叫做『張國榮接班人』，同一個天王去比較，我直頭將自己收埋、覺得自己無能。事實上我唔係會企到好前嘅人，除非我要做宣傳，企在前面或者中間，都係因為工作需要。在一啲私人聚會，我會企去側邊，甚至縮去後面。」正如代表作「阿旺」這種唱遊大世界的小人物，戇夫不一定要成龍，當益蟲也很好。尤其是在 TVB這個愈來愈喜歡揠苗助長的溫室裏，看別人邯鄲學步、自己悠然拾步而上；履行雖緩，反正歲月靜好。

 

小生物語

雖三年後便步入知命之年，郭晉安得天獨厚的娃娃臉，仍可在《東西宮略》匹配三十出頭的陳法拉、陳敏之，後兩者尚未能獨擔大旗，顯然靠觀眾緣甚厚的他單天保至尊。
坦白講，監製黃偉聲（《戇夫成龍》及《阿旺新傳》監製）搵我就已經同我講「呢個唔係一個觀眾會鍾意嘅角色，又昏君又好色，你就要令到觀眾鍾意佢。」當咁多劇集都咁緊張，講食人、警匪，突然有套叫《東西宮略》，可以搵邊個做吖？我相信全 TVB都係搵郭晉安做，佢又肯做個鹹濕佬昏君，你搵林峯做鹹濕佬得唔得吖？
欣賞年近半百、子女成雙的郭晉安擠眉弄眼演年輕昏君，也不是難以接受，但選角只限於 60後與 70後小生之間二選一，才是大樹飄零的悲哀吧？
嚴格嚟講，我係劉青雲、（吳）鎮宇之後嘅一代。要細分嘅話，發哥（周潤發）係第 1代，跟住到「五虎」（第 2代）、再到青雲、鎮宇同陶大宇，佢哋好似叫做「七將」，然後我哋呢代有黎明、郭富城，再落去係鄭伊健、林文龍，再跟住係古天樂，古天樂之後就係林峯。林峯、（吳）卓羲他們算是第 6、 7代吧。睇番只係 40年嘅光景，除番都係 6、 7年就有一個交替期，即係話應該有一班人開始捧出嚟。一個新人紅咗，你就要有一個新人去承接，但你會發覺家冇咗呢個承接。
好少藝人一出嚟就可以呼風喚雨，我眼見過有演員一步玩完，開名就唔好嘞，但我見佢拍咗一部（劇）做主角，第 2部冇主角做，到第 3部佢直頭放棄。


《東西宮略》上週最高收視達 30點，網民大讚郭晉安的鬼馬演繹，「我就係要令觀眾鍾意呢個鹹濕昏君。」


03年郭晉安憑《戇夫成龍》奪獎，至 05年在《阿旺新傳》飾演現代版「阿旺」，再奪「最佳男主角獎」，諧角形象深入民心。《蘋果日報》圖片

蟲行日子 郭晉安
“啲人話 TVB收買人命，係呀，你想出人頭地就要捱。”

蟲行日子 郭晉安

蟲行日子 郭晉安

蟲行日子 郭晉安

蟲行日子 郭晉安

以前大家要捱，我哋好似喺少林寺出嚟，唔識嘅嘢都要喺好短時間學識，好似我唔識打，但一步兩步就要識翻滾，家就有電腦合成。我哋嘅年代，一日可能得 6個鐘頭瞓，家可能畀番 8、 10個鐘，我試過最長紀錄 6日冇瞓過覺，中間偷 1、 2個鐘喺榻榻米「瞌吓」，俾人拍醒就要演，但家你唔會再聽到呢啲情況。啲人話 TVB收買人命，係呀，你想出人頭地就要捱。

全中國都識我「馬志強」

85年， 21歲、任職文員的郭晉安因工作關係而被填詞人盧國沾看中簽約，翌年進 TVB拍劇， 87年憑韋家輝擔任編審的《誓不低頭》竄紅及擔正。
當年 TVB畀一個公務員嘅人工畀我， 86年我有 3000元一個月，半年後我就加咗 600元，去到一年後我再 double上有 7000元。記得當時阿爸做船嘅維修，賺緊 60元一日，突然間我成為全屋企搵最多錢嘅人。
後來郭晉安的事業停滯不前，主演劇集收視低收，加上經理人合約問題， 94年後 3年間被迫返內地及台灣拍戲賺錢，見證過兩地電視圈的變遷。
只要來自香港、來自 TVB，內地人已經覺得你係一個名牌。以前上湖南衞視亮吓相，或者做個小品劇，就已經係全湖南最高收視。唱一首歌，或者做一個短劇，都已經有 10萬人民幣。當時我在 TVB拍一套 20集嘅劇集，拍 2個月只有 20萬（酬勞）。以前搵錢好開心，今時今日當然冇 90年代咁好。
其實 TVB係一張好靚嘅花紙，將我哋包到好靚再推出去市場，你返到大陸先可以收咁高嘅價錢。若然你冇呢啲包裝，返到內地會睇住（自己）價錢一路一路跌。佢哋只要話呢個劇有郭晉安拍，已經可以收到一錢開劇，拍到一半又可以收播映費。佢哋係用緊我嘅 credit來賺錢，但我反而係用緊 TVB嘅 credit來增值，然後在呢個市場賺錢。
但鄭嘉穎不是憑內地劇《步步驚心》紅遍神州嗎？

郭晉安說當年一接拍《戇夫成龍》，即不斷翻看劉青雲的《呆佬拜壽》和梁醒波的作品，刻意避開重複他們的演繹方法。《蘋果日報》圖片
郭晉安說當年一接拍《戇夫成龍》，即不斷翻看劉青雲的《呆佬拜壽》和梁醒波的作品，刻意避開重複他們的演繹方法。《蘋果日報》圖片

由戚其義監製的《創世紀》後來紅遍內地，「之後 TVB劇集都唔可以在 8頻道播，因為佢哋唔想裏面嘅文化影響到大家。嘩，原來你可以為咗塊地殺人㗎！」《蘋果日報》圖片
由戚其義監製的《創世紀》後來紅遍內地，「之後 TVB劇集都唔可以在 8頻道播，因為佢哋唔想裏面嘅文化影響到大家。嘩，原來你可以為咗塊地殺人㗎！」《蘋果日報》圖片

恭喜佢，真係好難得。我由九幾年返大陸拍咗 3年劇，最諷刺係一返香港拍咗套《創世紀》，就全中國都識我「馬志強」，但冇人知我嗰 3年拍咗啲咩嘢大陸劇集喎！ TVB要你紅嘅時候，就知道要拍啲咩嘅劇集嚟捧你。當年《創世紀》上咗中央台 8頻道，仲要放喺非黃金時段，收視都贏咗人哋嘅黃金時段喎。……既然你唔知內地人鍾意啲咩，我貿貿然上去拍，未必會接到一個可以令我身價飆升嘅劇集。機會太渺茫，咁我不如留係 TVB！

騎木馬的「 Little安」

蟲行日子 郭晉安

有記者前輩曾以「好悶」、「好易驚」來形容早期的郭晉安，事業以龜速前進，與低調性格不離關係。
我在一個阿爸要搵食，就「長兄為父」、好傳統嘅屋企長大；大哥搬走就要聽二哥說話，係由第一個大佬打，打到六哥接住打大我架。我阿媽四十幾歲生我，我同大哥差廿歲，佢哋會管住我，驚我會帶麻煩畀屋企，總之「你唔好學壞俾警察拉，你犯法就唔好返屋企！」屋企邊個大就邊個話事，形成咗我啲性格係咁。初入行見到呢個係大佬、嗰個又係大佬，咁就由佢哋話事囉，於是更加 label咗自己係一個好 little嘅人。之前我同叻哥拍《雀聖 3自摸三百番》，佢封我做「 Little安」，佢覺得就算我結咗婚、有小朋友，我都仲好細個，佢係指我入面嘅性格。


郭晉安在第二套劇集《誓不低頭》，飾演鄭少秋兒子，「其實《誓不低頭》好難再來，一來個班底已經唔同咗，二來新嘅人都未必有咁嘅熱誠去寫呢啲戲。」《蘋果日報》圖片

（ 98年）我返香港拍《創世紀》，被委以重任做其中一個男主角，（當年製作部高級經理）梁家樹同我講：「你要當 TVB係一個遊樂場，裏面有過山車、摩天輪，咁多遊戲總有一種適合你玩。你唔好一嚟就玩咁激，你啱啱返嚟玩住木馬先，總會搵到一樣令自己開心。但你一定要去玩，唔好再收埋自己喇。家有個叫『馬志強』嘅角色，由頭到尾都好重要，你當試吓啲輕巧嘢先啦！」
之後我就明白，我唔需要再收收埋埋，我係有啲嘢家嘅藝人做唔到，譬如做阿旺。不過，我覺得我在《與敵同行》嘅發揮好過《阿旺》，可以睇到人心寒，應該由呢套劇攞獎先啱。當年連周潤發都話應該係郭晉安攞㗎！（得獎者為《溏心風暴之家好月圓》的夏雨）。當然我已經攞過，就會豁達一啲。如果我從來都冇，今日我可能答你「好緊要架，我一定要攞，我覺得自己唔掂㗎！」

Family Time

郭晉安自言滿足現況，一年只拍一套 TVB劇和內地劇，其餘時間奉獻給太太歐倩怡和兩個孩子。「我試過每晚臨瞓前都同囝囝講：『你記得明日要換衫、刷牙、洗面、飲水，然後同人講早晨』，我講咗 2個月，數住有 50次，佢冇一日做到。終於有一日佢自己換衫，仲話『爸爸叫我換衫嘛』，我直頭攬住佢喊住話：『我真係好愛你，阿仔！』」
跟兒子相差 44歲、大女兒亦有 47年之多，郭晉安只恨歲月催人。「唉，自己都遲婚，如果囝囝似我就死，我真係驚到我死都未必可以抱到孫！」依我和攝影師看來，保養得宜的郭晉安，倒也不用杞人憂天。

06年郭晉安與比自己年小 15歲的歐倩怡結婚，但女方曾兩次流產，「原來藝人偏瘦，就好難佗穩 BB。」之後兒子令山及女兒以雅先後於 08年和去年出生。《蘋果日報》圖片
06年郭晉安與比自己年小 15歲的歐倩怡結婚，但女方曾兩次流產，「原來藝人偏瘦，就好難佗穩 BB。」之後兒子令山及女兒以雅先後於 08年和去年出生。《蘋果日報》圖片

蟲行日子 郭晉安
《蘋果日報》圖片

撰文：孫月華
攝影：范仲良
化妝： Marsha Ma@ A& V Make Up School
髮型： Niki Lee@ Headquarters
形象： Bryan@the Flaming
服裝： Ted Baker

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄