雖然 Theresa曾公開指羅仲謙「冇誠信」兼「講嘢冇句真」，但據知男方仍死纏爛打，跪地求復合電話認錯乜都做埋，不過傅穎仍然心硬誓不食回頭草。
陪睇中醫
傅穎同花心謙劃清界線，但據知女神原來已經有觀音兵啤梨埋身做嘢，據傅穎身邊人透露：「 Theresa同啤梨識咗好耐啦，不過近排先聯絡密咗，啤梨成日都打畀 Theresa，啤梨仲成日搵 Theresa食飯 o架，咁 Theresa又冇乜特別事忙，通常都會去嘅！」
自上月 26日開始，本刊就發現啤梨密密陪住傅穎睇中醫兼四圍搵食，上週日（ 3日）更長途跋涉入埋長洲打邊爐，上週五（ 1日），啤梨於電話中說：「我知佢氣管唔好，咁個中醫睇開覺得幾好咪帶佢（ Theresa）睇埋囉！（你成日同傅穎傾心事？）我哋乜都會講嘅！大家朋友，佢做乜我都會支持。（聽講你追緊傅穎？）唔回答呢啲嘢喇！」
對於又有新兵埋身，傅穎則說：「我識咗佢好耐，成日做嘢都有見面，我哋成日一齊食飯，（覺唔覺佢追你？）哈哈，咁好笑？大家朋友啫！」而羅仲謙則透過助手說：「傅穎識朋友同謙仔冇關，佢冇嘢回應。」女神心轉向，謙仔仲有乜好講呀！
3月得 1 job
有傳傅穎被公司雪藏，自從爆出分手後，對上一次公開露面已經係 3月頭為一商場宣傳，成個月得一單 job，但據知情人士說：「唔係公司雪佢，咁都要有人搵佢做嘢先得 o架！」《蘋果日報》圖片
謙仔密做 傅穎密食
自從去年謙仔同傅穎甩拖，傅穎狂爆謙仔花心後，謙仔雖然乖仔形象冇咗，不過佢喺無綫就長撈長有，最近仲喺今年無綫套《飛虎》中做第二男主角，反而傅穎爆料之餘卻俾公司雪藏，工作大減真係得不償失。
啤梨溝女密
36歲新城 DJ葉文輝一向受女歡迎，早前與日模松岡李那（ Linah）傳緋聞，之後又話追霍啟剛前緋聞女友兼新城同事趙彤、又有傳佢又睇中 36F乳神雷凱欣，啤梨生活都幾忙吓喎！
留言列表
{{ article.title }}
