林志穎搶劉華劉德華錢養仔壹週刊 1078期 @ 娛樂八掛大放送★

林志穎身份除咗係藝人，仲係台灣第一位受薪職業賽車手，攞過無數冠軍，擁有自己嘅車隊，八月响上海參加國際組別 IFC雷諾方程式比賽，林志穎打敗十九個國家參賽者，攞到做人爸爸之後第一個冠軍獎座。
啱啱過咗卅六歲生日嘅林志穎，自從舊年做咗人老豆，當年嘅「小旋風」，已經成為有仔萬事足嘅「中佬」。
身為一家之主，明年仲打算同老婆陳若儀補擺囍酒舉行盛大婚禮，林志穎更加要努力搵錢養家。
自從九六年服完兵役重返娛樂圈，林志穎一直留响大陸發展，雖然無以前咁紅，但勝在搵到錢、 fans依然咁瘋癲，經常响佢上海屋企樓下日夜守候唔願走，煩到林志穎要賣樓靜雞雞搬竇。
三字頭仲做到偶像派，林志穎決定唔理 fans感受，自爆有老婆有仔成家立室，做個負責任嘅男人。勝在夠坦白，令佢人氣不跌反升，電視電影一部接一部，估計上半年收入已經挨近三千萬港幣，當中有三分一奶粉錢，係搶走「大話天王」劉德華代言咗五年嘅大陸西裝廣告。誠實有錢途，睇怕括弧先生一定學唔到。

OUT
劉華做咗羅蒙西裝代言已經五年，但舊年爆出瞞婚事件，代言人換上坦白承認有老婆有仔嘅林志穎。

08年結咗婚嘅劉華，直到舊年先俾人踢爆，加上缺席外父喪禮，就算上演世紀拖手認朱麗倩係老婆，形象依然急插水。（《蘋果日報》圖片）

同以前做 model嘅太太陳若儀拍拖五年，一直地下情無公開，直至仔仔出世，林志穎決定公開母子身份，唔想瞞大家一世。

林志穎有份拍馬楚成新戲《賽車》，上個月中响珠海賽車場開鏡，戲中演員張栢芝跟湯唯同十月十五日生日嘅林志穎賀壽。

林志穎仔仔「小小志」，樣子得意可愛，老豆幫佢著法拉利 BB衫，又買法拉利 BB車俾佢坐，我估小小志全屋嘅玩具，都係車車同車車！

「 F1車神」舒密加，林志穎當佢神咁拜。

林志穎事業顛峰期，一打開報紙雜誌就見到佢個樣，呢輯菲林廣告，大家一定有印象。

徐若瑄屈到喊
中日關係緊張，明明同娛樂圈大纜扯唔埋，但上個禮拜徐若瑄、阮經天、趙又廷等人飛去東京六本木參加「第 23屆東京國際電影節」，準備出席星光大道揭幕禮前夕，中國代表團團長江平向主辦單位堅持，台灣團必須以「中國台灣代表團」名義行星光大道，最後雙方爭持不下，中、台代表齊齊缺席星光大道儀式。
身為觀摩片《茱麗葉》女主角嘅徐若瑄，事後現身「台灣電影」記者會，傳媒重提打壓事件，徐若瑄即喊：「因為想到那時跟阮經天等台灣演員期待走星光的心情，才不禁悲從中來。」
徐若瑄只係一時感觸，但反日激進分子就唔係咁諗，大鬧曾經响日本發展嘅徐若瑄係慰安婦，認為佢撐日反中。
眼淚被政治化，加埋各種人身攻擊，徐若瑄透過律師發出公開聲明，但就將落淚原因變成另一個版本，指自己純粹基於親人健康因素，以及隻身在異地工作壓力累積所突發出情緒問題，希望可以息事寧人。

無份行星光大道嘅徐若瑄，第二日現身電影記者會，突然眼淚失控。

著住紐約設計師 Zac Posen晚裝，戴住幾百萬伯爵珠寶嘅徐若瑄，重裝行頭無份行星光大道，唯有同阮經天、張鈞甯影張合照留紀念。

著上 Gucci大露背透視裝現身台灣之夜酒會，當時徐若瑄已經平復情緒，估唔到第二日就俾人鬧係慰安婦，搞到要馬上刪除微博內所有電影節相片，唔想再引起糾紛。

導演鈕承澤（右）帶住作品《艋舺》現身電影節，佢以「相煎何太急」形容打壓事件。

張艾嘉同陳柏霖主演嘅中國電影《觀音山》入圍影展競賽片，但身為台灣人，佢兩個過場撐台灣之夜酒會，張艾嘉更巧妙回應：「我和柏霖都是台灣出生、成長，這次和中國最棒的工作團隊拍片，是兩岸文化最好的交流。」兩邊都唔怕得罪。

林志穎搶走劉德華千萬代言自爆成家人氣急升

林志穎
林志穎自從自曝成家立室有老婆有兒子後，人氣不降反升，電視電影一部接一部，估計上半年收入已經接近三千萬港幣。其中有三分之一是搶走“大話天王”劉德華代言了五年的內地西裝廣告，做人誠實有前途。