一代宗師拍極唔完　梁朝偉跑步打發時間忽然1周 796期 @ 娛樂八掛大放送★

晨早跑步
上周三（ 20日）早上 8點，偉仔一身運動裝出外跑步，而頭上的半剷青六四分界葉問裝亦同時曝光。當日中午偉仔去影城開工，拍至凌晨 4點收工。"
娛樂頂點
《一代宗師》拍極唔完　梁朝偉跑步打發時間
2010年10月29日
05年已放聲氣要孖住梁朝偉拍葉問的王家衛， 08年俾甄子丹飲咗頭啖湯拍《葉問》，電影惟有改名叫《一代宗師》。去年 7月開鏡冇耐偉仔打斷手要停拍，傷癒後在國內多個地方取景拍攝，拍咗年幾都未煞科，近日仍在廣東開平「悠閒」趕工中。
有指王家衛受到資方壓力而要邊拍邊剪，希望趕在今年聖誕檔期上映。記者上周到開平現場採訪，發現王家衛仍貫徹其慢吞吞作風，成個禮拜只拍一日戲。而現時王大導肯收貨的戲份都未夠 6成，一日未拍完，都仲要 hold住梁朝偉、章子怡同宋慧喬三大巨星嘅檔期。
演員局住滯留開平等開工，梁朝偉終日在酒店房閉關，天氣好就外出跑步，宋慧喬就悶到打羽毛球。至於揸 fit人王家衛就不時喺酒店 hea住度橋，睇嚟《一代宗師》想趕聖誕檔期簡直係妄想。
互動片段

王家衛酒店開會

當甄子丹都已經由「葉問」打到變「陳真」，梁朝偉仍然在葉問角色上周旋，由籌備到開拍至今已 5年，電影都未上到大銀幕，全因拍檔係出名歎慢板的王家衛。

希望唔使等到 2046年啦！（設計對白）
究竟幾時先放我老公？（設計對白）
《蘋果日報》圖片

長期拉簾
偉仔住在酒店三樓的大套房（紅圈），一房一廳仲對正泳池，不過偉仔足不出門，窗簾亦長期拉埋，咩風景都嘥晒！

宋慧喬嗌走人
上周一（ 18日）本刊記者到達劇組入住的廣東開平海倫堡酒店，看見王家衛不時在大堂遊走、沉思，而戲中飾演葉問老婆的宋慧喬則搵助手到籃球場陪打羽毛球，眾人狀甚悠閒，整個星期就只有上周三拍了一日戲。據劇組人員透露，電影進度過慢唔止超晒支，亦搞到成班演員怨聲載道，宋慧喬已向王家衛表示不能再呆等。知情者透露：「部戲由上年 10月開始 hold宋慧喬嘅檔期，到今年 5月要轉地點，所以放番啲檔期出嚟，宋慧喬仲嚟咗香港小休。今年 9月王家衛 call齊演員去開平拍，嚟咗開平成兩個月，呢站拍咗嘅戲王家衛暫時都未收貨，話全部要重拍，試過兩個星期都開唔到一日工。偉仔就話知王大導脾性，宋慧喬唔知咪發晒老脾話唔等囉！後尾導演同佢傾，叫佢留到 10月尾，呢排盡量拍佢嘅戲份住佢先囉！如果到咗 11月都拍唔晒，宋慧喬真係要走，大不了咪 cut佢啲戲喎！」
韓國妹宋慧喬頂唔住，但已進軍荷里活的章子怡就精得多，因本月 16日要出席江蘇省的百花電影節，章子怡事先親自向王家衛請假，不過就一走冇回頭。知情人士說：「章子怡事前請咗兩日假，電影節完咗之後就打電話返嚟問呢幾日有冇佢戲份，知道冇戲份就話自己有啲事，遲啲會盡快歸隊，不過成個星期都未見佢蒲頭。」

助手準備早餐
偉仔做運動，助手就準備咗烚雞蛋、香蕉同燕麥俾偉仔做早餐，健康到爆！

宋慧喬無聊打波
上周日（ 17日）宋慧喬得閒無事，落籃球場搵助手陪打羽毛球，不過執波多過乜，球技有待進步。

在開平悶足個幾月，本月 8日，偉仔難得回港休息，即與老婆劉嘉玲喺屋企宴請朋友。

屈咗喺開平個幾月，宋慧喬身形脹卜卜，打波時巨躉現形，都要做吓運動喇！

偉仔酒店房自閉
戲份最重的梁朝偉一樣被困開平，閒時偉仔大多在酒店房閉關或外出跑步。據酒店職員透露，偉仔通常晨早外出，「梁朝偉成日留喺房，間唔中會一朝早出去跑步，唔使開工就成日匿埋房唔出嚟。（食飯呢？）有人拎嘢俾佢食。佢好好人，見到人都好好笑容。」
偉仔與王家衛合作無間，對於王大導的歎慢板手法已習以為常。據知情者透露，「月初偉仔連續拍咗兩日濕身戲，仲請咗過百臨記，不過導演都係唔收貨，仲話呢場戲要再度過。王家衛講明嗰幾日唔拍嘢住，自己即時搬咗去第二間酒店，話要度兩晚橋，所以早前偉仔返咗香港一轉。偉仔好清楚導演性格，就算聽朝開 06都係前一晚先話你知，所以佢好多時都唔敢返香港，局住呆等。」

王家衛沉思踱步
上周一（ 18日）導演王家衛不時在酒店內踱步。據知偉仔頂得順王大導，全因兩人私交甚篤。偉仔亦深信慢工出細貸，對王大導的電影極有信心，故拍攝期雖長，卻全無怨言。

袁和平得閒飲茶
身為武術指導的八爺袁和平，不時孖住劇組人員到酒樓飲茶吹水，勁得閒！

王家衛成個下午在酒店 hea住度橋，之後再坐車前往拍攝場地睇景，不過一個鐘後即折返酒店大本營。

電影勁超支
其實《一代宗師》在 05年已密謀開拍，可惜王家衛出名慢，而且同時間只可拍一套戲，所以 07年完全搞掂《藍莓之夜》後，王家衛才正式度《一代宗師》劇本。「王家衛搵場景差唔多搵足一年。開拍後去過廣東多個地方取景，拍咗唔夠 6成戲份。今次去開平拍， 7月已經安排劇組搭景，一般搭景唔使一個月，不過王家衛好奄尖，搭咗個景有少少唔啱心水就要重頭再搭過。開平呢度有 3個場景，有一個要完全拆晒重搭，其餘兩個就仲執緊啲細位，所以搞到依家仲搭緊囉！」
場景又搭又拆已經花費唔少，《一代宗師》還 hold了近二百個劇組人員和臨記， crew車都有 50架，人、車、酒店條數認真襟計。據知投資的電影商「銀都機構」已有微言。據知情者透露，「其實老闆都預咗超支，話晒有卡士搭夠，不過王家衛真係拖得太耐，而且葉問潮又過埋，所以老闆都有向導演施壓。老闆本來希望今年 12月聖誕檔期上，但睇個勢都未必得。王家衛仲話要去廣州拍最後一個景，依家惟有寄望明年農曆年可以上到啦！」不過睇王家衛一副人急佢唔急嘅態度，以及電影嘅拍攝進度，《一代宗師》年尾拍得完嘅機會真係好微。

開會睇劇照
上周二（ 19日），王家衛與宋慧喬在酒店的泳池開會研究早前影的劇照，王家衛更準備定薯片招呼喬妹（小圖）。

葉問全家福
戲中宋慧喬飾演梁朝偉老婆，二人在戲中更拍下有一兒子的全家福。

章子怡男扮女裝
其中一張劇照是身穿旗袍的宋慧喬，坐在男裝打扮的章子怡身邊，二人含情對望。

宋慧喬旗袍 look
穿上旗袍的宋慧喬在開平赤坎影城內取景，為電影拍了多張劇照。

包起開平影城
電影《一代宗師》內大部份戲都以開平的碉樓做背景，王家衛更做足保密功夫，平日開放供旅客參觀的赤坎影城和自力村碉樓，已被劇組租用多個月作為拍攝基地。但據當地保安透露，劇組出現的時間唔定，而且布景一改再改，連月來見到木工趕工多過劇組拍戲。
開平赤坎影城

上周劇組人員及木工仍為赤坎影城內的布景趕工。

葉問熱潮已過
自 08年甄子丹主演的《葉問》在港票房大收後，《葉問 2》、《葉問前傳》及《一代宗師》三套有關葉問的電影即時籌備開拍。《葉問 2》與《葉問前傳》先後於今年 4月及 6月上映，電影除了非常收得外，更掀起學詠春的熱潮。最搞笑就係呢兩套電影都已經推出 DVD，但《一代宗師》仍未拍完，唔通真係慢工出細貨？
《葉問 2》今年 4月上映
由甄子丹再演葉問的《葉問 2》， 09年 6月開拍，同年 12月已煞科。香港票房收入 4千多萬，國內票房更達 2.3億。

《葉問前傳》今年 6月上映
由前世界武術冠軍杜宇航主演的《葉問前傳》，戲中詠春師傳梁璧的角色由 86歲的葉問長子葉準擔演。電影在 09年 9月開拍，只花 4個月便拍完，在香港及國內均有過千萬票房。

一代宗師》悠閑趕工梁朝偉跑步打發時間

05年已放聲氣要梁朝偉拍葉問的王家衛， 08年讓甄子丹搶先拍《葉問》，電影惟有改名叫《一代宗師》。去年7月開鏡沒多久梁朝偉打斷手要停拍，傷愈後在國內多個地方取景拍攝，拍了一年多仍未殺青，近日仍在廣東開平“悠閑”趕工中。

有指王家衛受到投資方壓力而要邊拍邊剪，希望趕在今年聖誕檔期上演。記者上周到開平現場采訪，發現王家衛仍貫徹其慢吞吞得作風，整個禮拜只拍一日戲。演員留在開平等開工，梁朝偉整日在酒店房內閉關，天氣好就外出跑步，宋慧喬就悶到打羽毛球。至于王家衛就不時在酒店內構思，看來《一代宗師》想趕在聖誕檔期簡直就是妄想。