唔要靚唔要命郭富城變種肥佬皮膚敏感紅腫化膿壹週刊 1061期－娛樂八掛大放送★

拍動作戲唔錫身，鍾意親身上陣的郭富城，在陳木勝執導的暑假動作片《全城戒備》中，除了打餐飽同上吊（威也）外，明知有特技人於爆炸場面試位時，發生意外被燒傷百分之七十五皮膚，城城都唔識死，繼續拒用替身，堅持真人上陣。
唔只咁，城城更放棄以往要型要靚，在戲中破例扮把佬，每日用四個鐘做特技化妝，搞到全身皮膚敏感，又紅又腫又含膿。

荷李活化妝
以往做慣靚仔有型角色的郭富城，在科幻動作電影《全城戒備》中飾演一名雜技團飛刀高手，當中有一段戲講城城誤吸二戰時期，日軍遺下的生化氣體，在逃亡時被掟入公海餵鯊魚，因為吸入大量海水身體出現變異，變成一名發脹肥佬。
而為了這個肥佬造型，城城經歷十分辛苦的過程，「導演（陳木勝）專登去荷李活，搵咗四個特技化妝師幫我做呢個肥仔造型，每日淨係化妝，都用咗起碼四個鐘，拍嗰陣仲要日日三十幾度，加埋假皮厚衫，真係焗到全身濕晒，但最辛苦都係要滿面黐晒膠水，卒之"R"到塊面同個身都皮膚敏感，又紅又腫，甚至含膿。」

真身上陣撲火
此外，城城在戲中要應付連場動作打鬥場面，包括飛起撞車，跌落公海，仲有由高空跳下撞爆玻璃，當中有大部分高危場面，導演陳木勝為求逼真，都要求城城親自上陣。其中一場爆炸場面則例外，由於在試位期間發生意外，一名特技人被爆炸烈火燒傷，全身有接近百分之七十五皮膚燒傷，為免有危險，導演一早安排好替身代替城城上陣，但他竟然唔怕死，堅持自己埋位，經過一輪爭持，最後導演讓步，俾城城上陣。
「睇試位嘅時候都唔覺有乜嘢，但埋咗位先知，原來啲火同自己好近，的確有一定嘅危險程度，不過，我好信得過一班專業特技人。」拍完先知驚的城城說。

翻撻舒淇
打餐死之外，城城與女主角舒淇亦有感情戲，兩人在十年前曾合作過《風雲雄霸天下》，今次再度合作，有傳二人在拍戲期間撻着，對於與舒淇的緋聞，城城鄭重否認，「冇冇冇，大家誤會咗，我哋識咗好多年，係好熟嘅老朋友。」

戰況激烈
今年暑假港產片十套唔夠，其中三部是古裝笑片，八月十二日上映的《全城戒備》與張家輝的《線人》同屬動作大片，睇高一線。

《唐伯虎點秋香之四大才子》
上映日期：8/7
片種：古裝笑片
卡士：黃曉明、張靜初、任賢齊、朱咪咪
賣點：導演李力持用回當年周星馳版本的演員班底，有黃曉明與Angelababy緋聞食住上。

《出水芙蓉》
上映日期：15/7
片種：勵志愛情片
卡士：阿嬌、方力申、田亮、黃聖依
賣點：被禁兩年舊作，男女主角阿嬌、小方舊緋聞再被炒起，將舊戀情搬上大銀幕。

《翡翠明珠》
上映日期：5/8
片種：愛情笑片
卡士：林峯、阿Sa、容祖兒、王祖藍
賣點：無綫力撐林峯之作，阿Sa做和番公主，與「山寨婆」Joey爭林峯。

《龍鳳店》
上映日期：19/8
片種：古裝笑片
卡士：任賢齊、大S、羅家英、霍思燕
賣點：改編自《游龍戲鳳》，有暴力傾向的龍鳳店老闆娘大S遇上落難的失憶皇帝小齊。

《得閒炒飯》
上映日期：26/8
片種：女性電影
卡士：周慧敏、吳君如、谷祖琳、陳偉霆
賣點：周慧敏十三年後復出頭炮，與吳君如演同性戀者，多場兩女激吻及共浴戲成為賣點。

《綫人》
上映日期：26/8
片種：動作懸疑
卡士：張家輝、謝霆鋒、廖啟智、桂綸美
賣點：電影《証人》續集，影帝張家輝加上原班人馬演出，導演林超賢再創高峯之作。

肥有相似
德華同鄭秀文在《瘦身男女》中都有用特技化妝變成肥仔肥妹，而華仔的肥仔look，同城城個肥look，又有幾分相似。

每次化妝，城城都有四個專人服侍，但整個過程都要四小時。

浸屎水
拍攝地點在全香港地下水通糞便污水出口附近拍攝，拍完戲之後，城城用消毒藥水沖番幾次涼，都覺得自己仍然有陣味。

親身拍危險動作的城城，拍攝前做足安全措施，著晒保護衣同護膝。