娛樂八掛大放送★

卸任一年的 08港姐季軍馬賽，外形純品甜美、 22歲芳齡 32C良好發育，自然被無綫睇好一劇接一劇，處女劇《女王辦公室》的可愛 OL角色更係開正佢嗰瓣，出街至今人氣快上，迅速成為網友新女神，現實世界原來亦成為真身係啅女聖手吳卓羲的獵物。

橋唔怕舊

官恩娜、江若琳、梁靖琪、徐子珊，連年長 4年嘅花旦佘詩曼都越級挑戰成功， 31歲吳卓羲啅女史戰績彪炳，伎倆不外乎拍劇期間日對夜對近水樓台、甜到漏短訊和懶細心小禮物攻勢，終極必殺技則是頻頻換浮誇極速戰車管接管送，滿足晒懷春中女的虛榮心，更何況自稱未正式拍過拖嘅馬賽？
去年中吳卓羲與首次拍劇的馬賽在《女王辦公室》飾演情侶，當時衰形象花弗的吳卓羲，剛流放內地拍劇洗底回港，對住探班記者，表面上同馬賽保持距離冇乜兩句，據知情人士透露，其實從 7月劇集開鏡冇耐，有人已經對馬賽起痰。

氹做鄰居

「馬賽嗰陣得 21歲，讀完浸大就去選港姐，喺香港又係第一次拍劇，又靚女又傻更更咁，以阿 Ron性格，又點會放過！喺大陸返嚟之後，阿 Ron好似乖咗好多，其實係受過教訓，玩得醒目咗啫，佢哋場場戲都一齊拍，幾乎日日都接送馬賽返大坑舊居，又成日喺車或者屋企準備啲小禮物氹佢開心，馬賽係純情妹，又靚仔又細心仲要日對夜對，梗係信晒佢啦！」
知情人士續說，想密密見又要避過傳媒耳目，馬賽今年初索性在清水灣半島置業，與吳卓羲做鄰居：「年頭馬賽爸爸想送層樓畀馬賽，本來一早睇好將軍澳中心，都係吳卓羲講咗一句想多啲見面住近啲好，後來馬賽就忽然買咗清水灣半島，仲話因為有個朋友住嗰度，多個照應喎！」

最怕黐身

見面多住得近，亦未必能修成正果，尤其男方情史咁多姿多采。 06年官恩娜真空過夜斷正， 08年落選港姐黃瑩亦送上門，最愛用租住的清水灣半島居所招呼女友的吳卓羲，出名感情來得快去得更快，尤其女友一片癡心愈嚟愈黐身時更加走得快：「好似個黃瑩咁，一心以為阿 Ron同佢嚟真，飛咗個拍拖好多年嘅男朋友，前排同啲女藝員打打吓牌無啦啦喊咗出嚟：『佢唔搵我啦，佢玩我咋！』後悔都嚟唔切！聽講阿 Ron呢排已經搬咗，擺明又玩厭啦！」
回應緋聞經應豐富，週一吳卓羲面對記者，一樣面不改容。

F：《 FACE》 吳：吳卓羲
F：聽聞你管接送溝掂「君女」馬賽？
吳：絕對冇坐過我車！如果唔係都唔會一張相都影唔到啦！我夠膽發誓冇接送過佢！
F：但係佢同你係鄰居喎！同你住同一個屋苑。
吳：我都係睇報紙先知佢搬咗入將軍澳，何況我都搬咗出去尖沙咀成年啦！
F：但你哋喺微博好多親密合照喎！仲有合成 BB相添！
吳：微博嘅相都係佢問過我至 post上去，但係 BB嗰張我就真係唔知喇！