好 high呀！
Petbook
狗狗新蒲點 東涌北寵物公園
2010年06月16日
平時狗主要帶狗狗去玩，真係幾煩！香港地方有限，想搵個地方畀狗仔自由活動、隨處奔跑一啲都唔易，好在呢幾年，康文署因應市民要求，陸續增設寵物公園，主人想去公園放狗，終於有個合法地方。而最近又有新場落成，位於東涌嘅狗公園喺今個月開放畀市民使用，佔地有成 2,200平方米 o架，對狗主嚟講，又多咗一個新蒲點，簡直係一大喜訊！
Sharon成日帶薯餅四圍玩，今次嚟踩新場覺得好滿意。
東涌北公園位於東涌文東路，公園本身佔地過萬平方米，分咗幾個區域，例如兒童遊樂處、滑板場等，不過家仍然興建中，預計會喺今年內分階段開放，不過其中佔地 2,200平方米嘅寵物公園，已經喺今個月正式開放畀市民使用。見有新場，主人 Sharon即刻帶同貴婦狗薯餅嚟玩吓。「知道呢個狗公園面積咁大，梗係要帶薯餅嚟試吓新場啦！」
環形設計慢慢散步
寵物公園採用環形設計，一入門口就有一大片空地，跟住有一條通道連接各項設施，空地可以畀狗仔隨意奔跑，薯餅入到門口即刻 high晒， Sharon於是鬆狗繩畀佢跑番一轉先。跑完一輪，薯餅走埋嗰砂池（狗廁所）度，眼望望，唔通想屙臭臭？為咗保持公園清潔，園內除咗有 1大、 1細嘅狗廁所外，仲有超過 5個狗糞收集箱，地方咁乾淨，主人放狗都特別安心。
公園裏面仲有唔少寵物設施，好似沿路就有 2個飲水器。唔只狗狗，連主人都照顧埋一份，放狗放得攰，公園有 5張有蓋長椅，畀主人遮蔭及休息。 Sharon坐喺長椅，薯餅就撩其他狗狗玩，邊度有冷場 o架！ Sharon大讚呢度設施齊全，「平日一得閒就帶薯餅去唔同嘅地方玩，一般狗公園面積都好細，活動空間有限，但呢度就大好多，四面有住宅圍住，唔覺偏僻，狗用嘅設施好齊，又有長廊可以畀我同薯餅慢慢散步！」
其實除咗東涌之外，康文署陸續喺一啲現有公園，例如元朗市鎮公園北兒童遊樂場等，都已經加設咗寵物公園，而未來 2年喺北角同將軍澳落成嘅休憩場地，亦會附設寵物公園，方便各區嘅狗主，以後帶狗狗散步，又多咗選擇喇！
公園設施大解構
等我屙臭臭先！
A.設有一大和一細嘅狗廁所，方便唔同 size嘅狗隻使用。
B.公園內有兩個飲水器，狗狗跑完索晒氣，可以飲番啖水解吓渴。
C.公園內有 5張有蓋長椅，可以休息之餘，仲可以畀一班狗主同狗狗聚埋一齊玩。
我不知幾乖！
D.公園盡頭有兩個綁狗繩的柱位，狗仔唔乖，或者主人想坐低唞吓，唔想狗狗亂走，可以綁住佢哋。
E.為保持清潔，園內隨處可見狗糞收集箱。
F.公園入口有大空地，可以畀狗狗周圍跑。
東涌北寵物公園
地址：東涌文東路
設施：狗廁所、狗糞收集、飲水器、長座椅
開放時間： 7am至 11pm
查詢電話： 2852 3220
街坊齊讚！
公園鄰近東涌北多個大型屋苑，如映灣園、藍天海岸等，吸引唔少街坊嚟放狗。
Teresa
平時放狗，主要係圍繞住屋苑散步，由於有唔少人行，大部分都要用狗繩拖住隻狗，但有咗狗公園之後，可以畀狗仔四圍跑，自由好多。
劉太
呢個狗公園有 2千幾平方米，地方幾大，而且設施齊全，以後放狗，我都會帶狗仔嚟呢度。
狗公園大晒冷
除咗東涌外，康文署仲有 17個寵物公園（包括 2個臨時地方），大部分 24小時開放，設有狗廁所及狗糞收集箱，其中以下 6個面積較大，設施亦較齊全。
留言列表
{{ article.title }}
