意外激嘴拍攝期間意外錫到張家輝，導演 like爆，要求再拍，影帝事先講明，不用太認真，點知彭于晏當耳邊風，大力啜到實。 

探熱針

肌男鬥　彭于晏皮肉價 200萬

○九年靠《証人》一片，成為六料影帝的張家輝，在新片《激戰》做過氣拳手，為角色狂操四個月，由鋼條變肌佬，甚至搞到斷指彎成 S形，換來五百萬辛苦錢。
同片對手，近日被內地起朵「破億哥」（主演電影票房過億）的台灣小生彭于晏，唔想輸俾影帝，開工前三個月，亦全面戒油、鹽、糖、澱粉，再日啪廿隻蛋白及飲健身奶粉，成功將全身的脂肪比例降到 3%。
同張家輝鬥操谷肌，並齊齊接受職業拳手特訓三個月，彭于晏皮肉價 200萬人仔有找，相比影帝，平一半唔止！

日啪廿蛋白

入行超過十年的彭于晏，當年同楊丞琳、余文樂合作台劇《愛情白皮書》起朵，後因與經理人反面打官司，被雪多年，直至一○年《翻滾吧！阿信》才翻身。
據導演林超賢表示，《激戰》劇本五年前已在手，但一直搵唔到合心水，又願意配合特訓半年操 fit身形的演員，碰上解凍翻生的彭于晏，還有對角色向來投入的張家輝，彼此一拍即合，等咗五年，全無白費。
同四十五歲的影帝較技，只有三十一歲，比張家輝後生得多的彭于晏並未有鬆懈。生得高大的他，兩年多前拍《翻滾吧！阿信》已經練到全身脂肪比例只有 6%，開拍《激》片前三個月要接受職業拳手格鬥訓練外，還積極修身；油、鹽、糖、澱粉全戒唔在講，為求練到爆肌效果，日食白烚雞胸加廿隻蛋白，飲健身奶粉，日日如是。
「未開工一個人匿埋喺屋企食，還 OK！但一開工，尤其係放飯時間，一聞到 crew（工作人員）嗰陣飯盒香，就好似家輝所講，覺得自己食緊嗰啲連狗都唔吼。所以每次放飯，我都會匿埋一邊，因為引誘（飯盒）真係好大！」彭于晏說。

張家輝同彭于晏合演師徒，齊齊戒油、鹽、糖，食蛋白谷到一身肌肉。 

45歲的張家輝日日頭拉鐵餅練背肌，可惜老婆關詠荷毫不欣賞，反而促使彭于晏更積極修身，免得被影帝比下去。 


贏出比賽，俾多次機會彭于晏激嘴張家輝。 

借尿遁

成功將全身的脂肪比例由原有 6%降至 3%（正常男性約 20%），彭于晏在電影正式開拍後，仍堅持繼續每日二至三小時 weight training，再加三至四小時 MMA拳擊訓練；初期他還頂得住，但去到拍格鬥比賽那十日，每日開工至少要被對手打二百下的他，每次一聽到導演嗌開工，便忍不住打冷顫。
「一入去個籠（比賽場地）就好難出番嚟，除非要去廁所，所以一有機會就借尿遁，入去廁所抖下！」彭于晏說。
重新振作兩年，彭于晏片約不斷，其中《愛 Love》、《分手合約》在內地均有過億票房，被起朵「破億哥」，不過，因官司浪費多年時間，彭于晏片酬至今仍二百萬人仔有找，比起同期入行的余文樂，片酬六百萬起跳，大落後。

張家輝扮童話中的豺狼，博梅婷一笑。 

張家輝同內地演員梅婷的感情線，似是而非，電影未有清楚交代。 

格鬥比賽拍足十日，彭于晏手腳傷痕纍纍。

女主角捱剪

原本是女主角之一的李菲兒，同導演、張家輝及彭于晏出席記者會，但最終戲份無故被刪剪。 

為免肌男格鬥太 dry，導演原安排黃曉明前度李菲兒，在片中與彭于晏發展感情線，但有指她演技差，得一個表情仲要頻頻 NG，最終戲份被剪清。
「開工有佢（李菲兒）嗰日一定超時，所以班手足一知佢有份，都會食定嘢打底，免得遲收工要捱餓。」一名幕後人員透露。
據了解，香港版本李菲兒的戲份已全數被剪走，至於內地版，也被剪走八成，形同路人甲乙。

美國熱爆

《激戰》入面的 MMA（ Mixed Martial Arts），即綜合格鬥，是外國一種極流行的職業運動。比賽時，選手可用任何拳擊、摔技、踢擊等攻擊對手身體任何部位。
MMA主要分立技和地戰，立技即用手打對方，武術包括泰拳、西洋拳、空手道等；地戰又名寢技，如巴西柔術等，因此， MMA是包涵各門各派武術，難度極高，參賽者在比賽過程中亦絕不手軟，即使對手倒地仍可繼續進行比賽，與 K-1不同， K-1以立技為主，對手跌倒，裁判會即刻嗌停。
早年，有美國政客批評 MMA太暴力而列為犯法活動，近年經改良定下新規則，插眼、咬人、吐口水、踢下陰等不能用。目前以美國的 UFC（ Ultimate Fighting Championship終極格鬥冠軍賽）最備受注目，賽事場場爆滿，加埋電視直播收入，估值超過二十億美元。

撰文、攝影：娛樂組