面對面
瓦努亞肥 林二汶
打工仔都說有一天要博一鋪要做老闆，我忘了其實歌星也可以，只要你蝕得起。
18歲出道的林二汶，一轉眼已經 30，賣唱賣聲賣才藝兩年存來的七十萬私己錢，轉個頭為自資新碟《林二汶》 fing清光……蝕就梗，重點是，林二汶就是那種蝕得起的人。
論 outlook，從來沒漂亮過，也從來沒瘦過，第一次上台就被觀眾柴台「好樣衰」，再衰，衰得過第一次？
論收入，雖然不是 Twins，好歹唱得作得音樂會長開長有還是廣告界最搶手的女聲，蝕完，再搵過囉！
至於家庭，林媽媽出名開通，林哥哥一峰第一天入行就已經是自己的老闆，全家都撐，點解唔去馬？
「阿哥教曉我咩叫 fat power。所謂 fat power，你眼凸、鼻扁，總之你邊樣嘢俾人笑，就要以邊樣嘢做武器，終有一日要令到自己為嗰個缺點自豪。」
始終一天，林二汶成為這一代這個圈最會唱也最有想法的肥妹。
如果瓦努亞圖係我想住嘅地方，瓦努亞視係我想睇嘅電視，林二汶，咪係我覺得最型嘅肥妹囉。做肥妹，該做林二汶這種。
11歲開始步哥哥後塵學結他，然後跑商場 show， 18歲認識盧凱彤組成 at17，兩年前分道揚鑣各自發展。舊拍檔繼續泊大碼頭東亞唱片，郁啲都有老闆同巨星 Sammi、 Eason聲援，林二汶偏偏唔志在，係都要自己話事蝕自己啲錢。
唔係話做唱片公司就好冇自由，但係始終喺間大公司入面，我係員工，好多嘢唔到我揀。係我阿哥第一日出嚟已經靠自己，直接影響我，亦都幫我哋屋企 嘅經濟建立咗信心。講到尾，我係諗通咗。根本唔會有唱片公司會投資咁大錢落一個人身上，我係投資緊去我自己嘅事業喎……三十歲喇，三十歲咪博一鋪囉。
做一隻碟用咗幾十萬咁貴，因為我嘅做法好貴，自己請樂手、自己租錄音室，我一個月裏邊每日要錄六個鐘，每分鐘都係錢，仲有後期寄去美國，每樣嘢幾皮幾皮咁加落去就幾十皮㗎啦。我天生唔係做生意嘅人，唔識得壓低製作費，更加唔會壓低我班樂手嘅酬勞。賺錢？隻碟賣到七萬隻、 iTunes狂俾人 download咪有得賺囉……但係有錢賺，我一定要分畀幫過我嘅每一個人，呢條路，冇人幫，我邊有今日？不過今時今日咁嘅市道，發吓夢先啦！我下一個咁大嘅決心，係因為由出道、到單飛，我每個階段學自己應該點樣努力，自己想要啲咩。
我俾人歧視大
雖然預咗蝕，但一個外形不討好的肥妹仔夠膽死掉七十萬血汗錢投資到自己身上，我看到的是非一般的自信。這一世的自信好不容易建立了，林二汶的心聲其實是：「如果有下一世，我想做舒拉寶娃。」
阿哥中學係風頭躉，我唔係。我肥、大汗，唔識打理自己，着藍色旗袍，但係又唔識着打底衫，一流汗就成個印印出嚟，好騎呢。夏天排隊，硬係有啲把口好賤嘅人一齊喺我經過時講：「嘩……水塘呀！」。科學堂分組，我永遠係嗰啲零零丁丁最後剩番嗰個，冇人願意同我一組。初出道第一次去個新人巡禮，人哋出嚟「 he he hom hom」好勁，輪到我哋出場，成場 dead air，仲有人嗌：「好樣衰呀！」我哋唔理咁多照入歌，唱〈始終一天〉，跟住大家一齊拍手。我證明到，有啲嘢喺個台度，我係可以令到你哋收聲。我都覺得好唔公平，點解 model一定要靚、一定要瘦。但係好老實講，換着有一日我見到名牌廣告大海報係一個唔靚又唔瘦嘅人拍，我第一句都要問，點解唔搵個靚啲嘅人嚟拍呀？內在美同外在美都重要，但係外在美都係藥引，吸引人哋埋嚟睇你嘅內在美。當然有外在美，條路易行啲、方便啲。我今世冇一個一嚟就得到所有嘢嘅外表，呢個過程我需要用好多心力同體力去克服，呢樣嘢好美好，但係一次就夠啦，下一世我都想懶啲……
二汶話兩兄妹對得住父母同家庭：「阿媽唔關心我同阿哥鍾意男仔定女仔，淨係關心 嗰個係唔係好人。」
由細肥到大，林二汶說自己被人歧視慣：「細個我都唔鍾意騎呢人，直到中學俾人當面笑，先至發覺原來我係騎呢 嗰批。」
兩年前與東亞唱片約滿，亦與拍檔盧凱彤分開發展：「感情冇變，對我 哋兩個 嚟講係成長階段。」
02年被黃耀明睇中與盧凱彤合組 at17出道，同屆新人有 Cookies、鄭希怡和趙頌茹：「同年好多偶像派，人 哋上台『 he he hom hom』，輪到我 哋就 dead air。」
8月出碟， 9月在演藝學院開 5場個唱，靠把聲，林二汶說錢蝕 咗，一定可以搵得番。
男男與女女
哥哥林一峰一出道已經出櫃，有關喜歡男孩還是女孩的問題，林二汶的答案和前拍檔盧凱彤雷同：「我愛嘅人有男仔亦有女仔。」不過，林二汶回答的再直接一點：「第一個告白對象同初戀，都係女仔。」
我聽過一句說話，有人話我屋企仔又攣女又攣，都唔知父母前世做錯咩事……唔係喺我面前講，係我阿媽上網見到講番畀我聽。我到 𠵱家都好難過，你憑咩斷定我呢世會鍾意咩人，我從來冇話過我係攣，我都唔擔保我下一個鍾意男仔定女仔；你咁樣講都唔緊要，點解要俾我阿媽見到話番我聽？我阿媽嗰個傷心嘅樣，我會記一世。呢啲咪毒囉、黑心囉，你根本唔知人哋屋企發生咩事，首先覺得攣係錯已經唔啱，你仲要講埋阿爸阿媽！點解人哋做呢行，你就有權毒呢？根本我第一日入呢行，已經冇人畀過機會我做直，永遠身邊女性就係密友，男性係兄弟。對我嚟講男仔同女仔都吸引，男人同女人我都會愛上。我試過鍾意男仔，同男仔一齊。我喺愛情裏邊經驗好豐富，呢個係我探索生命嘅一部分，我唔會阻止自己去愛任何一個人，一日未死，我一日都唔知最後嗰個係男定女。
現在，我好開心，雖然最好嘅愛情我未遇上，但係我信因果，我信我每次戀愛，我愛過嘅每一個人，都係一堂課。每個人同我講 bye bye，我冇得揀，我亦會掛住，但佢哋離開時帶走咗你嘅一忽，同時亦都填補咗你嘅一忽。佢哋每個人畀我嘅養分我都帶住，帶一世。 
林二汶歷年被偷拍與同性一齊，一概被定為同性密友：「傳媒根本冇畀過機會我做『直』。」
從小在哥哥林一峰影響下學結他、入行、一齊唱歌、一齊開騷，今年甚至一齊建立慈善基金，上陣不離兄妹兵。
對得起
林一峰與林二汶為媽媽寫的〈愛你枕邊暖〉至今網上點擊率三十多萬，二汶唱腔話變就變，扮勻葉蒨文、薛家燕和衞蘭衞詩更是驚艷。
上次訪問林哥哥，已經讚到林媽媽天上有地下無，這次輪到林妹妹，一樣是世上只有：「我阿媽係我最好嘅朋友，佢唔會覺得我騎呢，淨係話畀我聽我好特別；佢唔只係世上第一個覺得我好美麗嘅人，亦都不停鼓勵我去發掘自己美麗之處；佢唔會干涉我同阿哥鍾意男定女，佢淨係關心嗰個係唔係好人。我唔覺得我哋對唔住阿媽，我覺得我同阿哥對得起阿媽、對得起呢個家庭有餘。」
那個說林媽媽上世做錯事的人，才真的是大錯特錯。作為一個媽媽，我倒覺得能有一對為自己作了一首〈愛你枕邊暖〉的兒女，才真的是幾世修來的福分。 
留言列表
{{ article.title }}
