Webber

美麗政客　袁彌明

由參選港姐、跳出電視台自拍美容片變 YouTuber，再搖身一變做埋美容店老闆，仲未夠特別？轉頭走去拍片介紹何謂政治、參選立法會議員，雖然未能入局，最近又獲政黨人民力量選為黨主席。美容界、政界都吃得開，叫袁彌明（ Erica）做美麗政客，相信冇人有異議！

Webber's　 profile

原名：袁彌明
職業：袁彌明生活百貨老闆、人民力量主席
作品總數：超過 100個項目
拍片資歷：約 7年
YouTube頻道：
youtube.com/user/ericayuen
總 hit rate： 1,300萬以上
subscribers： 30,337

點解由美容跳去政界？

平日拍片，除了自己屋企 set腳架慢慢拍，間中都會有人幫手揸機介紹店鋪特色。 

當年袁彌明將參選宣言拍成短片，影片入面話好似 Erica一個咁貪靚嘅女人，都肯曬黑捱夜參政，只係想要叫大家關心政治，爭取民主，即時在討論區熱傳，唔少人俾佢感動過！今日記者循例再問多少少，點解偏偏要揀政治呢條崎嶇路？ Erica話：「拍美容護膚片，都係想幫班姊妹變靚。再上一個層次想幫更多人，我就決心揀政治呢條路，希望爭取民主，幫更多人！」記者訪問完 Erica第二日，佢已經參加 48小時民主倒梁絕食行動，順便當 keep fit，人都靚啲。

美麗有罪？

雖然貴為人力主席， Erica依然盡量抽時間落鋪幫手，有心想撞真人，應該唔難！ 

近排有政客發表「艷星選特首論」， Erica提起都嗤之以鼻：「佢對民主冇認識啦，如果艷星有民意授權，係一人一票選出嚟，咁佢好過梁振英啦！」選美出身的 Erica，參選時都有人攻擊佢係政治花瓶，但 Erica就覺得對於佢政途係正面多過負面，「選唔選美出身都冇乜關係，反而係自己有一定知名度，令到一些政治訊息可以宣揚得更好。政敵的確會喺我個 YouTube留言，但我覺得做得呢類小動作嘅人，分量有限，只係滋事分子罷。」

拍片好難？

雖然 Erica以美容片出名，但佢直言最喜歡自己第一套嘗試講政治嘅影片《政治 BB班》，佢話回響最大，令唔少人留意咗政治。 

當上政客後，令 Erica減少投放時間喺美容生意上面，佢話𠵱家都係七三比率，七係政治、三係美容。 Erica嘅 YouTube Channel明顯減產(最 update美容片係 6月拍)「因為我對每段片要求都好高！如果你有留意，其實我所有片都係一 take過，觀眾話咁先夠真。所以我每拍一條片，事前做好多準備工夫，會諗好成個 flow，配合唔同道具，令到幾分鐘的片段都係一口氣拍晒。」但姊妹們放心， Erica透露下一段片，會同美容店有關，大家記得留意！

撰文：鄺浿鏇
攝影：吳偉業
嗚謝： Nelson at hair