在工作上，努力必定是成功的主要原因，但若加上少許的運氣，就能事半功倍。龔嘉欣就是一個成功的典範，近年於很多的電視劇都見到她努力演出，形象「入屋」，已經令不少的觀眾留下深刻印象，今年更成為飛躍進步女藝人獎的大熱，難怪嘉欣都大呼：「我真係好好彩！」經常將「好彩」掛在口邊的嘉欣，儼如當年鍾嘉欣的「好彩妹」般，莫非真係「笑口常開，好彩自然來」？難怪兩個嘉欣都經常笑面迎人啦！
撰文：Crystal Leung
攝影：Sing
場地：Le 188° Restaurant & Lounge @ Harbour Grand Hong Kong
我不是「港女」
播放中的《天梯》，嘉欣與楊明飾演兩夫婦，首次飾演少婦的她，有別於以往小妹妹的形象。劇中她更不理家人反對，孤身嫁到遠方，最後卻因丈夫的家境問題，要變賣自己的家當幫補家計，可說是悲情角色。雖然首次嘗試演少婦，嘉欣就話自己並不介意。「我反而覺得好好，今次對我來講都係新鮮，造型的確較之前成熟，可以畀觀眾見到我唔同的形象，相比以前都係活潑或刁蠻的角色，今次係一個大突破，好似踏入另一個階段。」劇集由至死不渝的愛情故事改編，對於愛情，嘉欣表示自己唔追求轟轟烈烈，反而希望有細水長流。
「我係一個唔鍾意刺激的人，又鍾意儲錢，真係好似阿婆！哈哈！」就連身邊的經理人也忍不住話：「佢真係好似一個阿婆㗎！」
劇中嘉欣能夠為丈夫無條件付出， 對一眾「港女」來講，絕對是腦殘的行為，但她卻表示現實中的自己同樣能做到。「我覺得可以喎！當然都要睇件事，如果大件事就一定要瞓身去幫！」能夠義無反顧地幫另一半，的確唔係人人做到，想不到又靚又搵到錢的嘉欣，更表示冇興趣使男友錢。「無論任何情況，我唔贊成要由男人畀晒錢，好多人覺得應該由男人孭起成頭家，我又覺得唔係。拍拖時，AA制唔代表男仔無風度， 就算男方話唔使女友畀錢，但女仔都應該有呢份心意。」
拍拖時財政獨立，即使已經結婚，嘉欣都覺得兩夫婦財政可以分開，「自己可以的話都畀番部分，係畀對方知道雙方願意一齊生活的證明。」有自己的想法，又肯分擔，鄧健泓真係有福啦！
拍劇必遇貴人
談到剛拍畢的《金枝慾孽II》，嘉欣坦認拍攝該劇是目前最大壓力的，因為角色的關係比較複雜，比起以前的角色相對較為有難度，而且慣常飾演富家小姐的她，這次首次飾演宮女，要服侍眾位主子。「其實我真係好好彩，每次拍的角色都係大小姐，唔會有太辛苦的戲分。今次在《金枝II》中我飾演宮女的首領，仲可以同咁多位前輩有好多對手戲，真係好開心。」
除了與眾多主角有對手戲，感情線亦較為複雜，嘉欣認為雖吃力，但富有挑戰性，還能夠把壓力轉化為動力。「如果永遠都做無難度的角色，好似失去一樣令到自己進步的壓力。」第一次拍攝如此大製作的電視劇，面對一班前輩們，多少都有些恐懼。「第一次好驚㗎！她們的角色都好有氣勢，熟絡後就發現她們都好樂意幫人。」口中的「她們」，當然是指蔡少芬與鄧萃雯。嘉欣又說：「所以我真係好好彩，每一套劇遇到的人都願意教我！」看來嘉欣每一次拍劇都獲益良多。
有傳劉德華會回巢拍劇，嘉欣雖表示不敢多想，但亦坦言渴望與他合作，不過她亦謙稱：「有得學東西都已經好好彩，真係唔敢諗太多！」
為安樂窩儲錢
除拍劇外，嘉欣現在正主持節目《更上一層樓》，拍攝時見盡各式各樣的豪宅，更令她增添買樓的意欲。「想買來自住，但我唔希望畀完首期之後，戶口無晒存款，自己係一個有兩手準備的人，希望畀完重有錢傍身。」
嘉欣話對住所的要求不大， 舒舒服服，有屬於自己的安樂窩就好滿足。現正獨居在雙親名下物業的嘉欣，少了租金的壓力，理應很輕鬆，但嘉欣卻表示，能夠靠自己的能力，擁有一間屬於自己的安樂窩，當中的滿足感是難以形容的。「正因為希望買樓自住，所以我會好小心去選擇，以免住落才後悔嘛！」以嘉欣的「慳家」性格，相信離她成功置業都不遠了！
除了主持外，嘉欣亦正替新劇《初五啟市錄》展開拍攝工作，劇中她飾演間諜，更會以不同的造型亮相，非常搞笑，「劇中有好多趣怪的造型，我成日都會畀提議，希望角色更有趣。」
近年很多電視藝人除了拍劇外，都開拓不同領域的工作，例如電影、唱歌或演舞台劇等，嘉欣卻表示自己未有考慮，「呢行其實好被動，所以冇工開我都唔會怨天尤人，會撥些時間畀自己增值一下。」她說。
說起自我增值，原來嘉欣一直都有學唱歌，希望對拍戲有幫助。「唔單止拍劇有用，藝人都會經常登台，至於出唱片就真係唔諗，如果有機會就當Bonus啦！」一直排滿工作，她都能抽空自我增值，小妮子認真唔簡單！
飛躍誰屬？
臨近年尾，台慶頒獎典禮即將舉行，估計飛躍進步女藝人獎的提名，相信會是苟芸慧、岑麗香、樂曈、黄智雯與龔嘉欣之爭。嘉欣在眾多的劇集中都表現出色，與黄智雯同被視為頂頭大熱門，但她就表示反而看好黃智雯得獎，「今年智雯的表現好突出，機會更大。」話就咁講，但有邊個唔恨攞獎？所以特別為大家分析吓飛躍五強形勢啦！
苟芸慧
減肥後的苟姑娘狀態大勇，接連推出《飛虎》、《怒火街頭2》兩套劇，可惜廣東話仍未講得好，令演出有所影響，似乎今年陪跑居多。
岑麗香
於《巴不得媽媽》中飾演香香公主，令網民眼前一亮，更旋即被捧為「高登女神」，不過演技幼嫩，相信仍未能在今年頒獎禮突圍而出。
樂瞳
今年參與過《當旺爸爸》、《護花危情》及《回到三國》的演出，台慶劇《大太監》更橫跨頒獎禮播映，故此分分鐘以黑馬姿態奪獎。
黄智雯
《缺宅男女》中飾演「關二嫂」，入型入格的演出令觀眾看得咬牙切齒，另外 《飛虎》、《巴不得媽媽》及《On Call 36小時》亦令人留下深刻印象。
龔嘉欣
《拳王》、《我的如意狼君》中的小三角色令人刮目相看，最近於《天梯》中飾演的悲情少婦，其演技更備受確認。
留言列表
{{ article.title }}
