買樓初哥

曾特首最後一份施政報告冇料到，80後想買樓，分分鐘2012都冇機會。
普通市民買唔起貴樓，愈撈愈掂的25歲陳偉霆（William）就快人一步，上月已經上到車做業主。雖然屋企有米，不過威廉自己畀首期自己供樓，仲加埋媽咪個名，超級廿四孝。
女友阿Sa出名係娛圈小富婆，炒樓有一手，每次買賣都有斬獲，今次威廉首度投資又做包租公咁大件事，阿Sa唔係唔幫吓眼呀？

 
新手買樓
．約500萬港島樓
．做包租公

8萬貴表
陳偉霆搵得到，週日出席活動時手戴價值約8萬的Panerai名表，林峯及張智霖等有米一族亦愛戴此品牌。

 
身為家中孻仔的陳偉霆，07年開始與母親以3萬3租住九龍塘和域臺1,600呎豪宅，上年10月公開同蔡卓妍拍拖後，阿Sa更不時被影到上男友屋企見面短聚。

續住風水屋
眼見事業發展唔錯，加上已經25歲大個仔，威廉上月決定一擲約500萬入市做業主。據知在九龍區長大的威廉，認為港島樓比九龍樓保值，因此首次置業即揀香港島的中價樓入手。雖然新屋接近家住跑馬地的阿Sa，但威廉同媽咪住開有感情，而且現居的單位非常旺威廉，所以物業只作投資，暫時唔會放棄風水屋搬過對面海。

買樓唔玩股
有阿Sa呢盞樓市明燈照實，絕對有賺冇蝕，不過一向對戀情低調的威廉，週日（16日）回應升呢做業主時，竟然搵家姐做擋箭牌，唔認係女友教路。 F：《FACE》陳：陳偉霆 F：上個月買樓做咗業主？陳：係呀，因為媽咪驚我亂使錢，所以買層樓等佢安心。我家姐一路有畀啲知識我，今次我親自去睇樓，首期同供樓自己搞掂。 F：自住定投資？陳：我住開九龍塘，媽咪覺得舒服，所以試吓做包租公，都唔怕遇到租霸，我對香港區嘅租客好有信心！ F： 係咪阿Sa教你炒樓？陳：冇呀！其實我以前讀econ（經濟）嘅！因為嗰時未起步，未儲夠錢買樓，咪買股票囉，家覺得股票唔穩陣，同埋男仔喺呢個年齡都要開始有物業。但係唔好講到我咁勁呀，我唔係嗰啲咁高level㗎！識買磚頭保值，下一個level，買個愛巢都得！

阿Sa有賺冇蝕
出道10年，阿Sa由海怡半島到現時的跑馬地豪宅慧莉苑頂層複式單位，愈搬愈豪。

吸金養家
要努力賺錢養家供樓的陳偉霆，年尾至出年的工作排到密麻麻，又出碟又拍戲，吸金能力咁強，唔怪得一向鍾情歐洲車的威廉想換架Benz作為下月生日禮物啦！ ####


威廉同阿Sa今年2月去布吉旅行，亦入住約5千元一晚的Sri Panwa酒店，非常識歎。《忽然1周》圖片



風水屋
和域臺樓齡雖有47年，但面積有成1,600呎，又難怪威廉唔願搬嘅！《蘋果日報》圖片


阿Sa一有時間就會上男友的九龍塘豪宅見面，如果威廉搬去港島區間新屋住，阿Sa就唔使咁頻撲啦！


母親聯名
威廉自幼喪父，同媽咪感情好好，更講到明婚後都會同媽咪住，今次買樓又預埋媽咪，認真抵錫！《蘋果日報》圖片


投資有道，阿Sa亦為英皇旗下樓盤「港島•東18」做生招牌。《壹週刊》圖片


孖住搵銀 Sa霆戀公開後，兩人的粉絲亦好受落，今年更繼續情侶檔拍住上做adidas代言人。


《忽然1周》圖片



出騷剛成為銅鑼灣啤酒節大使，年尾又忙住出席聖誕及除夕倒數活動，檔期非常爆。


出騷去完內蒙同日本拍《五行攻略》，12月又會開拍新戲，有機會扮演江湖人物。


廣告手頭上有多個大牌子廣告，如adidas、Rexona等將繼續搵威廉做代言人。


唱片即將要中港兩邊宣傳新碟，威廉下年頭又會再出碟，希望打入內地及台灣市場。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄