拍住上

 

以往藝人拍拖忌公開，但原來情侶檔搵到真銀，有錢途即刻唔同講法。
好似陳茵媺同陳豪呢pair情侶戀情浮面，拍拖甜到漏外，重點係孖住接job接到手軟。週日（16日）陳茵媺就孖住男友出席「莎莎婦女銀袋日」活動，據知無綫以15萬優惠價送埋陳豪，情侶檔買一送一又有話題；而企硬20萬唔肯減價的諸葛紫岐，忙結婚唔憂做，由形象大使變普通嘉賓亦冇所謂。
雙陳戀人氣高價錢低，難怪客戶超like！

拍拖出騷
公開戀情嘅陳豪同陳茵媺最近頻頻出show，週日（16日）陳茵媺擔任活動形象大使，阿Mo亦被邀請做護花使者，阿Mo手指指咁提示女友面向鏡頭，好細心喎！

頻護花
陳豪雖然只係豬頭骨，不過用得情侶檔見人，筍盤豪亦全程護到女友實一實，包保班傳媒有相交差。

「豪」築愛巢
上月底，陳茵媺同陳豪被偷拍到秘密同居照，兩人互餵，超sweet！

晒恩愛
同居關係曝光後，翌日（9月30日）陳豪便同陳茵媺夾啱出席公開活動，仲着埋婚紗禮服，十足行禮一樣超配合。

 
上月，陳豪同陳茵媺被傳媒踢爆同居3個月之後，兩人感情昇華，筍盤搭純女形象滿分，TVB更加食住個勢，狂幫兩人接job，多啲嚟，密啲做。

唔恨爭
諸葛紫岐對於被搶去形象大使，變為普通嘉賓行騷，佢表示唔介意，都係公司安排，不過亦話有人降價搶job唔出奇。

「雙陳」吸金
週日（16日），兩人就以情侶身份出席「莎莎婦女銀袋日」活動。陳茵媺是大會的形象大使，而男友陳豪就擔任當日嘉賓。據知情者透露：「大會本來以20萬價錢想搵Marie（諸葛），大家傾得七七八八，點知後來TVB出15萬推介陳茵媺，仲話可以搭多件陳豪添，TVB仲猛sell話佢哋情侶檔實有coverage（版位）！反正Marie企硬價唔憂做，家TVB肯買一送一，所以咪應承陳茵媺做形象大使囉！」

「總之開心價」
對於做咗豬頭骨，陳豪卻一點都不介意：「呢啲嘢我唔理㗎，都係經理人安排。藝人往往都係最後被通知嘅人，總之係開心價啦！（今次用15萬爭贏咗？）吓？呢個我真係唔清楚喎。（多咗人搵你哋出騷？）呢個就真嘅，我見啲客戶都幾鍾意用我哋，開心咪得囉！」至於諸葛紫岐就話：「因為我最近都要忙婚事，工作量係減少咗。（有人用低價搶你啲job？）其實都會㗎，不過好難避免。公司認為形象好緊要，所以個價要企硬！」諸葛紫岐都泊到好碼頭咯，少少錢，唔志在嘅！

筍盤孖女搵食有計
小生黐女一向冇運行，惟獨陳豪例外，有女在身廣告客戶特別受，之前同廖碧兒拍住上搵唔少，家陣換咗陳茵媺一樣受，得天獨厚，冇計。

諸葛等做少奶
諸葛紫岐同Neway二少薛嘉麟的戀情穩定，更多次傳出二人的婚訊。今年初，諸葛紫岐終大方承認已訂婚。為籌備婚事，實行減少工作量，等做薛家少奶奶，有條大水喉射住，賺少啲都唔緊要啦！ ####


客戶鍾意用我哋
真實對白


《壹週刊》圖片


個價要企硬真實對白


過氣女孤單陳豪前任女友廖碧兒（Bernice）上年9月亦曾以情侶檔身份孖住出席活動，當時Bernice仲當眾摸陳豪塊面，不過呢啲開心事都已成過去了！《蘋果日報》圖片


現任孖住上同居事件未曝光之前，陳豪同陳茵媺在9月首次出席手表活動，兩人酬勞比單人時高出三分之一。


得番隻狗同陳豪甩拖黐上林忠豪嘅廖碧兒，近排被莊思敏撬牆腳事件影響，個樣殘到爆，10月9日出席活動時更孤單到得隻狗陪。


假戲真做新劇《天梯》入面，陳豪同陳茵媺安排做情侶。連拍劇都同現實一樣，套劇出埋街，陳豪啲job更加接唔停！《蘋果日報》圖片


出入拖手上年10月，諸葛紫岐同薛嘉麟被拍到喺尖沙咀晚飯後拖手離開。見到諸葛紫岐一副冧樣，睇怕二少都好難走得甩囉！


薛氏愛巢薛嘉麟以自己名義買下九肚山寶柏苑作為同居之用，諸葛紫岐嫁入薛家後名正言順做女主人！《蘋果日報》圖片

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄