多得《盛女愛作戰》，也因新劇《拳王》的推波助瀾，才31歲的胡定欣先被傳媒列為「星級盛女」，跟着又被報道指一女追七男，而追封為「新一代姣精」，在《拳王》中如何刻苦扮演聾啞女拳手，都不及猶如《肉食女之桃花期》的劇情吸引。「其實我入行初已經有呢個稱呼，到今時今日隔咗咁多年，突然間又有呢啲緋聞，我已經冇感覺。我已經冇以前咁介意人哋會唔會覺得自己姣。」反正春風得意，錦上添花的花邊新聞，便當作人紅才多是非的自我安慰。「前十年一路累積（事業），又跌跌碰碰，方向又唔清晰；而呢幾年目標愈來愈明確，信心同工作量又多咗，所以家先至有真真正正做藝人同演員嘅感覺，自己嘅事業家先至開始。」上期訪問《盛女》Bonnie，只比胡定欣年少一歲，便已疾呼女人三十，即花期荼蘼，青春不再；那加入TVB十年、朝花旦之位進發的胡定欣，豈不行人止步？「其實唔係最好嘅嘢，都會在廿幾歲時發生嘅……你睇番（自己）廿幾歲時，做嘢都成飯咁添。反而覺得最燦爛最豐富嘅人生，就係家先開始，咁好嘅開始又點會用『剩』字形容？」也對，雖說花開有時，既曾用心栽種，哪怕開到荼蘼花事了？

改邪歸正
胡定欣剛在《當旺爸爸》飾演愛夫心切而又愛搬弄是非的家嫂，緊接在新劇《拳王》則飾演命途多舛的聾啞人士「丁丁」，在開拍前她還特意接受兩個月泰拳訓練，「我諗『丁丁』都算係我暫時嘅代表作」。相比以前在《銀樓金粉》演四姨太、《巾幗梟雄之義海豪情》演任性女等負面角色成名，這次的確正氣多了。她倒尷尬一笑並說：「其實唔係負面人物，而係觀眾所講嘅反派啫。我相信我做嘅角色，好多同事都想做，唯一我會抗拒去演嘅，就只有情婦嘅角色。我諗冇一個女artist會想做呢啲角色……但一個新人可以接到《銀樓金粉》嘅角色，我直頭開心到爆啦，我又未試過、演員又有分量，點解自己要介意呢？」 13年前胡定欣參加新秀歌唱比賽落選，當了2年OL，01年參加「TVB第三屆Cover Girl」奪冠、03年在藝員訓練班畢業的她，已經在《衝上雲霄》當馬德鐘的妹妹，前途被一度看好。「我由第一套劇已經唔係做純情小妹妹，呢啲係我嘅方向，或者監製覺得我適合，第一套古裝劇《大唐雙龍傳》，我已經演反派啦！「我好記得Flora（陳慧珊）問我『你第二套拍咩呀？總之趁後生，乜都試。』我一直記住呢句說話，當時我冇能力選擇唔拍，總之監製搵我就做。」普遍在訓練班出身的藝員，勝在從不揀擇，兼好喚好使，但就不怕永被定型做奸角？「最近我諗番我嘅路同其他同事唔同，大部分同事都係做正派，好想可以做反派，而我正正做咗某數量嘅反派，觀眾反而想睇我做正派。佢哋嘅突破係做反派，而我嘅突破係做正派，或者好似丁丁呢啲好可憐嘅角色。我同fans講2012年我係『好人年』，你哋唔會見到定欣做反派。」

擔正的期待
前年胡定欣憑《刑警》的性感卧底女警被提名「最佳女配角」，最後輸給《巾幗梟雄之義海豪情》的陳法拉，當時也牽扯到不少爭獎是非，甚至指胡定欣在facebook痛斥公平何在。事過境遷，當年的對手已穩坐一線花旦之位，胡定欣則仍在默默耕耘。
「無論出身係點都好，呢條路自己行成點、或者last幾耐，最終都係靠自己嘅……咁等待永遠都係好難捱嘅，可能以前會諗點解機會仲未到手，又未必會懷疑自己嘅能力唔夠人家好……以前會去諗點解佢係咁、點解我唔似佢咁？每一個人都會咁諗過，如果佢話冇，我唔信囉！點都會有諗過呢啲問題。
「我都已經入咗行10年喇……有一段時間對自己好冇信心，因為冇人話畀你聽，你做得好唔好，亦冇一樣嘢可以畀你去肯定，但呢幾年自己會識諗咗，有信心到可以cover咗『點解你仲做緊配角？點解你嘅機會仲未到？』嘅疑問。（08年）未攞『飛躍（進步女藝員獎）』之前自己會幾迷惘，成日會諗自己仲可以做啲咩？好似明明我識跳舞㗎喎，點解台慶又唔搵我去做嘅？自己唔會怪公司唔畀我做，因為可以在台慶表演，即係公司好support你。當你仲係一個新人嘅時候，又唔係香港小姐出身，呢啲機會未必咁快會有。」
現在電視台小生花旦大執位，總算守得雲開，胡定欣既然可以跟視帝黎耀祥有三次感情對手戲（《巾幗梟雄》、《法證先鋒Ⅲ》和《大太監》），即是能力屢獲肯定，欠的只是東風吧？「其實唔係要做第幾線嘅問題，而係我希望可以真真正正做女主角，希望可以有一套劇集屬於自己，即係領銜主演嘅意思。我相信呢個日子唔會遠囉！」

理智與感情
攀上花旦之位，尚且有待時日，胡定欣跟我說「希望一至兩年內可以做到」，但鮮有新聞的她，近日卻被報道踢爆有七段情，更獲封為「新一代姣精」，而其中所謂涉案人士如馬德鐘、吳卓羲，還真的跟上任姣精的佘詩曼鬧過緋聞，好不諷刺。
「撞啱《拳王》出街，就當你送個封面畀我，最緊要張相靚啫！自己從來唔係用呢啲（娛樂新聞）嚟包裝自己。身邊人都會話『你家一個人做大封面喎！一拖七，仲有監製潘嘉德陪你喎！你真係贏晒啦！』嚟安慰我，都係好事嚟，如果你冇價值，人哋唔會送一個封面畀你。但我數嚟數去都數唔到有七個，傳都冇理由傳到德哥（潘嘉德）。德哥係帶我入行、好照顧我，報道寫我同佢按摩，假設我真係同佢按摩，都係因為我錫呢個人，做咩唔可以同佢按摩呀？Why not？即使我同佢按摩都唔係問題，因為佢當我係囡，我當佢係老豆。如果件事係好似報道所講咁親暱、咁曖昧，而我又做咗，咁我都要自己檢點啦！」
同為女人，我也不明白外表剛烈硬朗的胡定欣「姣」在哪裏？「自己就冇考究過點解人哋話我姣，可能我好容易同男仔嘻嘻哈哈、打成一片，我都鍾意講車，有時同好friend嘅artist，好似唯唯（梁烈唯）呢啲兄弟會搭膊頭，或者大家會誤會我別有用意，但同性同事就真係只講戲同車，只不過談得嚟。所以同我接觸開嘅人都唔會將呢個字聯想到我身上，可能佢哋會覺得我好talkative；甚至會好粗魯，識我嘅人都知我講嘢好直接、開心唔開心會表露出來。自己兩面睇，做藝人俾人話姣，即係一件幾吸引嘅事，咁樣寫其實都係讚賞啫。」
「姣精」封號可以以逆向思維來自我調解，但向來感情低調處理的胡定欣，仍只肯間接承認跟吳浩康、馬國明兩段圈內情。甚至早前她在被發現在馬國明主演的《On Call 36小時》中客串6秒，被懷疑是積極與男方復合的信號，而最後挺身自爆戀情，及維護女方沒有公主病的也是男方，還大讚女方多人追求呢。

 
「佢都係想大家唔好因為呢啲新聞，而標籤咗我係一個點嘅女仔，佢出發點係唔想一個女仔咁樣被人寫，始終唔係咁好。佢了解我係一個咩嘢嘅人，幫我同大家講番。」那究竟跟TVB「第二筍盤」的3年情因何緣盡呢？她繼續顧左右而言它說：「感情事都想留番畀自己，因為之前一段關係公開咗，其實自己都唔想在媒體上多講自己感情細節，兩個人知就得，其他人係唔需要理。自己都會覺得公開係一個問題，都會有好多唔同嘅聲音，對事業都有某程度嘅影響。自己唔想每次見傳媒都要答埋對方嘅嘢，都唔係一件好事。我到決定結婚，真係有呢一個人嘅時候，先再同大家分享，好似唐寧、蔡少芬咁到結婚先公開另一半囉。」

 

我的名字、你的姓氏
曾經在胡定欣的訪問，每多被問及的緋聞人物，倒是曾拍拖三年的吳浩康和舊情敵的莊思敏。相比起大家仍鍥而不捨的追問當年那句「你都係着我舊鞋咋！八婆！」對白孰真孰假，她更介懷的原來是稱呼。「有段時間自己會唔開心，點解『胡定欣』個名前面會有咁多個字嘅？因為佢係『某某某人嘅女朋友』胡定欣，當時自己嘅事業又係nothing，變咗大家要畀你呢個括弧，自己都諗要畀心機做嘢，我要我個名就係我自己個名，唔需要係任何人嘅乜乜乜乜！我家可以做到令大家認得我係胡定欣囉！當然我結咗婚，我先生個名在我前面，我梗係願意啦！」那祝你早日被冠名成功。 ####

 


在《巾幗梟雄之義海豪情》中胡定欣飾演十三點馬麗華，跟鄧萃雯和陳法拉多對手戲，曾引起不少熱話，最後卻以另一套不獲重視的《刑警》獲提名。


上月底播畢的《當旺爸爸》，胡定欣與麥包飾演恩愛夫妻，跟老爺夏雨和兩個姑仔鍾嘉欣和樂瞳經常發生磨擦，屬詼諧角色。


在《拳王》中，胡定欣飾演聾啞女生丁丁，靠打泰拳重拾自信，「其實都幾啱我做，其實自己試過拍古裝打戲，而且咁慘嘅角色自己又唔多試過。」


被指為向馬國明箍煲而特意到《On Call 36小時》探班兼客串，胡解釋：「嗰日我在隔籬廠拍《當旺》，趁放break過去打招呼，點知導演不斷叫我『埋位喇』，於是我就着咗楊怡件衫客串。」


08年胡定欣憑着《銀樓金粉》等劇，及在湖南《舞動奇蹟第二季》奪冠，而得「飛躍進步女藝員」獎，「我得『飛躍』之前真係零信心，有信心都係來自《舞動奇蹟》。」


01年胡定欣參加「Cover Girl」當踏腳石做歌手，「入咗訓練班出嚟拍劇，加上歌手真係唔易做，隨時在TVB工作都可能幸福過佢哋。」


胡定欣一家四口，家中曾經營海味鋪，生活算是小康，更自言家族大親戚多。


與吳浩康的三年情，分手後仍是非不斷，胡定欣說：「無論咩嘢新聞都已經過去咗，真真假假我控制唔到大家點睇，總之涉及嘅人已經過咗去。」

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄