要孭住官恩娜拍戲，峯哥拍心口話無問題，仲可以邊孭邊行，roll機前仲拉起褲腳紮行馬！

宇宙最強 無綫一哥林峯chok樣遠近馳名，前週六（28日）林峯到石硤尾公共屋邨拍外景，例牌大量屋邨妹妹仔粉絲到場，個個輪住要影合照。冧死妹未夠喉，林峯要拍檔都讚埋自己先滿足，唔怕醜攞部iPhone播自己套電影《忠烈楊家將》預告片段，焗拍檔官恩娜睇。難得官恩娜又肯睇，仲話：「阿峯好勁呀！」咁識講嘢，林峯請食飯啦！

 
32歲林峯雖然上年被爆同潘霜霜拍拖，年頭又有〈Chok〉攞金曲金獎，成為網友熱話，鋒頭一時無兩。前週六（28日）林峯御駕到石硤尾大坑東屋邨（咪就係楊思琦出身嘅大坑東！）拍攝新劇《雷霆掃毒》外景，果然吸引大批師奶妹圍觀。

腰傷頂硬上
當晚劇情講述林峯要扶受傷嘅官恩娜返屋企，雖然官恩娜得百多磅，但要腰傷舊患初癒嘅峯哥孭住拍戲實在冒險，所以事前導演都問吓少爺仔頂唔頂得住，不過峯哥就話：「拍啦！導演！ 一roll機就叫Ella跳上嚟就得喇！」峯哥咁man，大家當然配合，可惜導演要拍多個角度，又前又後又高炒，峯哥前後孭住Ella廿幾次，搞到峯哥忍唔住話：「孭得多都幾『金』喎！」由於現場鄰近城大，勁多大學女粉絲聞「峯」而至，有靚女粉絲想趁林峯未埋位影合照，可惜峯哥話：「唔好意思呀，我拍緊嘢唔影住喇！」峯哥咁專業，fans當然唔勉強，但轉頭又見峯哥拿住iPhone播自己套電影《忠烈楊家將》預告畀官恩娜睇。雖然戲中峯哥戲份不多，不過段trailer咁啱有他的殺敵英姿。難得Ella又冇hea成條睇晒之餘，之後仲話：「阿峯畀我睇㗎，阿峯好勁呀！打得好勁！」峯哥直頭勁過Ironman啦！

儲埋年尾谷
林峯力sell官恩娜嘅大片《忠烈楊家將》，雖然峯哥飾演楊五郎，不過據知戲份其實只屬配角，反而全片唯一愛情線去咗六郎吳尊身上。《忠》片預計最快要年底先上到，電影未上得，原定6月播出的林峯年度大作《回到三國》最近又有傳遭臨時抽起，無綫外事部總監曾醒明說：「未知《回》劇會幾時上，一切都由節目部決定！」據知無綫打算將《回》劇安排在台慶10月播出，到時電視電影雙料谷，林峯仲唔威到震？

官恩娜狗肉阿哥係model
官恩娜好識撈，不過佢胞兄官仲銘，最近卻被網民圍插。事緣佢喺微博上載全狗宴，疑似食狗肉。雖然官恩娜已喺微博力撐胞兄，不過網民繼續鬧爆。官仲銘現為Wild Pelican罐裝葡萄酒亞太區執行總監。他曾在無綫讀訓練班，仲同周家怡、任港秀一屆，可惜發展平平，曾經喺《創世紀》做過文員一角。不過官仲銘人緣甚佳，離開後仲贊助TVB藝員足球隊波衫。 ####

 


連孭廿次導演一聲令下，官恩娜成隻樹熊跳落峯哥背脊，初時峯哥都頂得住，不過前後廿幾次，好彩少爺夠硬淨！


掛住摷片女粉絲（左）要求合照，峯哥婉拒，他說：「拍緊嘢唔影住喇！陣間先！同埋大家細聲少少，要現場收音！」不過左手就揸住iPhone搵緊自己套《忠烈楊家將》。


緊張住峯哥同徐子珊拍戲，埋位前仲下官恩娜有無真係睇，好彩官恩娜真係有睇啫！


有求必應峯哥冇吹水，一拍完即刻搵番頭先話想合照嘅靚女粉絲影相，咁有口齒，有品囉！


《雷霆掃毒》劇中林峯、官恩娜、徐子珊三角關係，當晚拍攝林峯孭官恩娜，但咁啱被女友徐子珊撞到正，幾十年都係呢啲橋段！徐子珊嚟到拍咗一個鏡頭就走得。


在《忠烈楊家將》中飾演楊五郎的林峯，據知拍攝時，林峯曾力sell導演于仁泰，話如果加重佢戲份，《楊》片在港上映時，可獲TVB無限量宣傳支持，可惜套戲擺明打內地市場，于仁泰都冇心動。


《回到三國》臨時抽起改為播陳展鵬擔正的《衝呀！瘦薪兵團》（個名好out！），論卡士當然係《回》劇勁啲啦，仲要峯哥擔正做諸葛亮，留番台慶月又可以衝擊視帝寶座啦！


01年當時官仲銘係Elite model，仲同埋徐子淇、唐詩詠、蕭正楠一齊接受本刊訪問。


官恩娜同胞兄官仲銘感情深厚，阿哥被網民插，官恩娜即喺微博力撐阿哥唔係食狗肉嘅人。《蘋果日報》圖片


官仲銘月中喺微博上載全狗宴相，被誤會為食狗之人，此相已在微博刪除，不過網民依然未放過佢！

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄