寶貝計劃  

頻頻傳大肚的梁詠琪（Gigi），上週六終於完成台北站演唱會，不過巡迴騷將會暫停，原因係下星期Gigi將會同西班牙籍老公Sergio返西班牙夫家，進行2星期「造人」之旅，而Sergio更開到聲話要生好多件，Gigi個肚有排唔得閒。為咗生個優質混血B，Gigi已經戒掉心愛的魚生，今次台北演唱會，除咗G媽煲大補湯，Sergio亦為免老婆大住肚開騷而禁慾2個月，又全程匿喺後台服侍老婆，真係羨慕死香港班剩女！

 
等咗15年，梁詠琪終於完成心願於台灣舉行演唱會。Encore 2次，歌迷都唔肯走，演唱會後的簽名會，2千個籌都唔夠派，製作單位想Gigi繼續唱多幾站。不過，恨生B的Gigi決定暫停一下，專心造人。Gigi說︰「年初拍完《光輝歲月》（內地電影）之後，都唔再接戲住，而6月出嘅國語碟已經錄好，手頭上嘅工作算係完成。」

Gigi：「起碼生多過1個」
今次台北演唱會，Sergio同Gigi嘅家人都飛往捧場。其實開騷前2個月，Sergio已經同Gigi經理人同導演夾計，要畀個驚喜老婆，特別練習用國語於騷內讀出愛的宣言，話：「我要和你生很多很多baby，可以嗎？」講到出口，Gigi好難唔應承，Gigi說︰「都調理差唔多半年，連魚生都戒埋。同老公都講好會喺演唱會之後努力，我哋都鍾意小朋友，起碼生多過1個，希望好似媽咪咁生一對龍鳳胎。演唱會之後會返西班牙2個星期，差唔多半年未返過去，順便『努力』一下。」

Sergio後台打點
於演唱會舉行前2天，Sergio已經飛到台北會合Gigi，又到會場幫老婆打點，而一直匿喺後台服侍老婆的Sergio，亦被禁止拎出任何食物，事關Gigi婚後增磅，都係拜Sergio所賜。Gigi說︰「只要佢手上有咩食物，都會遞畀我食，我出名為食，好難忍口，而且Sergio習慣餐後一定要食甜品，所以大家都好驚我再肥落去。」心廣自然體胖，Gigi愈肥等如愈幸福囉。

一路唱一路喊
Gigi說每次Sergio炮製驚喜，事前一定會俾佢發現，而今次喺演唱會的「愛的宣言」竟然令Gigi嚇咗一跳，Gigi話︰「原來事前只有經理人同導演2個人知。我唱完歌，見到佢企起身拎起支咪，都唔知發生咩事，之後見到有字幕，先知道係一早準備。今次呢個騷係好多喊位，亦係我開騷以來最有感覺的1次，我唱〈短髮〉嗰陣，台灣只流行簽唱會，到後期一直把事業放在國內，足足等咗15年先返台灣開騷，所以歌迷都好大反應。」

食齋都夠力生
雖然Gigi未算茹素，但只要在屋企開餐，都會跟G媽食齋，坊間話男人最好食牛同食蠔有助生育力，係咪真呢？勞永樂醫生說：「完全冇影響，食物最緊要營養夠、熱量夠，男女都係，成年人所需嘅蛋白質，素菜都已經可以提供，只要唔好偏食就可以。」 ####

 


Gigi今次演唱會，由名牌Lanvin贊助所有晚裝。完騷後，Sergio即一支箭跑到台後扶Gigi落樓梯，知道老婆唱到口乾，仲拎定支蜜糖水畀Gigi潤喉，唔冧就假啦！


開騷前1日，Sergio陪住Gigi綵排，Gigi練習西班牙扇舞，Sergio就幫老婆打拍子，兩公婆喺後台好鬼煙韌。


國語冧老婆 Sergio突然企起身用國語讀「愛的宣言」，成為全晚高潮位，叫Gigi生多幾個baby時，全場即時起哄，連G媽都忍唔住喊。


其中一環節Gigi要跳西班牙傳統舞「Quizas, Quizas, Quizas」，Sergio亦教Gigi點擺甫士，難怪Gigi咁有西班牙妹神髓。


拍完內地電影《光輝歲月》之後，Gigi就冇再收劇本，驚拍攝中途大肚，佢仲講明未來會放多些時間在家庭上，做個賢妻良母呀！


〈短髮〉、〈洗臉〉、〈膽小鬼〉都係Gigi的經典金歌，演唱會又點少得，為咗冧台灣歌迷，Gigi仲學咗首台語歌〈向前走〉。


G媽茹素已經有8年，近年Gigi亦受她影響，就連燉湯都只放蔬菜和藥材。


勞永樂醫生

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄