身穿法國Charlie Le Mindu設計、真髮紫裙的GaGa向傳媒揮手飛吻影相時間，只有一分鐘。

今年二月已經掀起撲飛潮的美國百變天后Lady GaGa香港站演出，昨日（週三）正式開騷，其千五元一張的門票在網上曾炒至三萬，以為GaGa熱全城哄動銷情勁，誰知愈臨近開騷，銷情竟然反高潮，門票在開騷前出現大冧價，千五元門票三折有售，即使GaGa早四日現身香港救亡，一樣挽救不到爆煲慘況。

唔買黃牛飛
Lady GaGa的巡迴演唱會在四月底已展開，由亞洲作起點，第一站首爾，其餘為香港、東京、台灣、新加坡、澳洲等，首爾開騷前仲有飛賣，香港卻掀起撲飛熱，一班明星名人早於二月已經話要託人搵飛，不過到埋牙時，一班名人明星包括千嬅、四太等，竟然又懶懶閒唔去睇。千嬅老公丁子高說：「本來訂咗廿張，依家得四張，係坐位，太太自己話唔去，太嘈驚撞來撞去。」Ball后薛芷倫話買飛時仲有得揀坐位抑或企位，「聽講好多飛剩，我都係託主辦單位買，無買黃牛；我本來買企位，後來決定要坐位，雖然係側啲，但我想舒舒服服咁enjoy個concert。」薛芷倫還教路，買企位飛記得要早入場，「企位氣氛係好好，但要一早去霸位，否則只睇到頭殼同背脊。」何鴻燊四太梁安琪的長女超盈用原價買了飛，但四太一副不在乎樣子說：「未必去睇，要睇工作安排。」行會成員葉維義太太葉梁美蘭因為唔想企，最終也放棄了香港站的演出，「我唔喺香港睇啦，香港嗰場都惡搞，最靚係企位，但要同人鬆踭，我唔夠人鬥。」她決定棄港投日，「我花咗四千蚊美金買了兩場日本演唱會頭排門券，我一係睇頭場，一係睇尾場，早機去夜機返。」

扮親民
GaGa來港第三天、即本週一，原本一直匿在酒店彩排的她，終於按捺不住避過傳媒耳目，潛咗去中環健身及往IFC連卡佛掃貨兩粒幾鐘，佢出咗街先把坐車照片放上twitter，仲明褒暗踩話：「在香港上完健身單車班後好疲累，我愛這城市，你可以喺同一條街做運動，又可以買到老翻Birkin手袋。」 GaGa抵港頭兩日，只留在十萬元一晚的總統套房練習，又叫酒店保安叫記者唔使等，第三日就從秘道潛出街，與本週六晚坐私人飛機從首爾來港時，入住Ritz Carlton酒店，與粉絲親親，俾傳媒任影的親民態度大相逕庭。其實當晚她坐住平治房車抵達酒店時，有架子的GaGa不是立刻落車，而係等咗數分鐘，要在千呼萬喚下，才由助手替佢打開車門，一班粉絲即唱住其歌曲《Born This Way》歡呼迎接她，GaGa見小怪物咁識做，才跟唱住歌的粉絲一齊扭身扭勢，又簽名又玩自拍，著住逾六吋高跟鞋的她，還差啲PK。陪粉絲玩了十分鐘，她才轉身走向記者區，係咁意俾傳媒影吓相，派個飛吻就入酒店，前後不過一分鐘。而酒店大堂亦堆滿了欲睹天后風采的住客，郭秀雲兒子龐錢景峰藏身其中，成功埋身索取到簽名。龐錢景峰話：「我買晒佢啲album，上司問我想唔想見GaGa？我話係唔係真。佢好好人，我問佢可唔可以簽名，佢就即刻簽。」

反應不一
美國天后Lady GaGa自上月廿七日在韓國展開《The Born This Way Ball》巡迴演唱會，本週三香港開騷，但不少黃牛飛割價求售，亞洲區各地票房更滯銷。

twitter報料
GaGa之後上咗房，酒店住客及粉絲亦四散，原本話抵港後即晚去Dragon-i的GaGa，當晚亦只叫私人廚師在房內為她做五十人大餐，之後一直留在房，在twitter自動發料，確保繼續有noise。

火辣GaGa
GaGa造型個個超激，例必成為話題，惹起爭議。

色慾修女
GaGa推出的《Alejandro》MV中，她扮成修女吞食天主教唸珠，穿上全身貼滿倒十架的舞衣，令多個宗教團體不滿。

鮮牛上身
一○年MTV音樂錄影帶頒獎禮上的牛肉裙，全身造型花上三日用五十磅牛肉製成，被指會感染沙門氏菌及不環保，但她一於少理。 ####


首日來港，GaGa挨埋粉絲堆一齊影相扮nice。


龐錢景峰（左）成為第一個攞到GaGa簽名的名人。


GaGa在網上向粉絲謝票，碼實他們。


（《蘋果日報》圖片）


她下榻的Ritz Carlton酒店總統套房，每晚房租十萬元。（《蘋果日報》圖片）


網上掀起減價潮，千五門券到四百八十都有。


偷蹓了出街的她，上載身在車廂的相上twitter，又話鍾意香港有老翻Birkin賣。


GaGa在韓國演唱會上穿黑色T-back和黑絲襪，刻意露股；又戴住羊角頭套，白色通窿起角裙勁歌熱舞。


曾同GaGa合照的陳冠希，週日一早來酒店抽水，但未能上樓，只與GaGa經理人Troy Carter外出。



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄