黃浩然這天穿着牛仔恤衫、牛仔褲，背着大背囊，在經理人公司的助手陪同下到來，由化妝到換衫到埋位拍攝，前後不用十五分鐘。沒有排場、沒有chok樣、沒有要求多多，對着在場的一眾女性，也沒有擺出萬人迷的架勢。這大概就是演員和明星的分別——縱使在我身邊很多朋友也認為，浩然的靚仔程度，其實跟《拳王》的另一男主角鄭嘉穎有得揮；縱使以他的外形本錢，只要多些跟不同高層、監製和導演巴結，多些製造緋聞和話題，多些出席不同的公開活動博出位，查實，照理他早幾年已經可以走偶像派路線，兼攞埋甚麼電視男主角獎，不用辛辛苦苦拍足十三年戲，到一○年才在無綫拿到一個「飛躍進步男藝員」獎，然後又繼續日捱夜捱。「其實我係感恩o架！我始終唔係TVB management，但公司都畀咁多機會我，畀咁多唔同嘅角色我做。我唔係心急嘅人，好似我其實都有大陸劇拍，可以搵多啲錢，但我覺得既然有個機構（TVB）可以發展，又錫我，點解我唔留喺度賣命呢？錢，我夠使就算，依家我覺得幾OK、幾舒服呀！有好多嘢只係睇你點選擇啫。我睇我個仔（十三個月大），畀啖飯佢食，佢已經識笑，佢教曉我，做人簡單啲就最快樂！」是的，有很多事情確實不用想得 / 搞得太複雜。

正能量

黃浩然九七年被杜琪峯發掘拍《十萬火急》而入行，先拍電影再入亞視，繼而來到無綫。終於入到屋了，知名度高了，連帶整個人也變得積極了——他說，一切都是多得冼灝英。

入TVB係我當時最後一條路，冇o架啦！唔得就收皮o架啦！

○七年入去之前，我係最唔掂，九個月開得三日工！如果有人話定畀你知，半年後有工開，你會好享受嗰半年嘅假，或會趁嗰半年時間積極學嘢；但當你唔知幾時有工開時，個人就會變得好hea，冇目標、冇動力！

○七年本來當模特兒的他，被杜琪峯睇中拍了《十萬火急》，自此成為了杜Sir御用的散仔差佬、PTU。

當我啱啱入去時，其實個人都幾沉、瀨瀨哋嘢，好似回回哋塘咁，好彩，當其時畀我認識到冼灝英師傅，佢係一個正能量好強嘅人，我個人變得積極咗，佢幫咗我好多好多！

以前我個人好物質，嚿錢未到手，我已經會訂定隻手表。但跟咗冼師傅學功夫之後，我哋一有時間就會朝早六點半起身跑步、練功夫，食個廿蚊嘅早餐，再由跑馬地行路返北角屋企，咁就已經好開心，嗰一日做乜都會變得好舒服，instead of我買啲物質嘢。

其實有好多快樂，未必一定要金錢買返嚟。

有啖火

除了冼師傅，黃浩然說，加入TVB後的另一大得着，是憑着《情越雙白線》認識了他第二位接觸得最多的圈中人鄭則士。

Kent哥（鄭則士）喺我見過嘅圈中人裏面，真係No.1！編、導、演都識，層次仲要係極高！你諗吓，一個六十歲嘅人，到依家仲有嗰啖火，真係好犀利！

當年《情越雙白線》可以話係我嘅轉捩點，因為認識到Kent哥，佢當我真係好似個仔咁，我好多演戲嘅嘢，都係佢指點我。

黃浩然（左一）說，在亞視拍劇的歲月，賺不到名氣，但賺到了金錢。

之前我同佢咁啱都喺橫店拍嘢，逗留咗三晚，有兩晚都係同佢食飯，都係同佢傾演戲嘅嘢，佢教我拍完嘅戲出咗街，最好睇番網上嘅討論區反應，咁樣先可以同觀眾嘅思維同步，咁樣先會知道自己仲有乜嘢可以改進。

試過有次佢打嚟約我出去食飯，結果就鬧足我三粒鐘！佢嘅要求真係好高，好多時只係鬧，只係同我講，呢度其實爭啲乜，嗰度其實應該點樣點樣！

所以，尋晚（訪問前一晚）佢睇完《拳王》講我追唐詩詠嗰場戲之後，打嚟讚我做得好，我真係好開心o架！

一○年獲「飛躍進步男藝員」獎，是他入行十三年來首個獎項。

爭乜鬼

猶幸黃浩然也很爭氣，加入TVB這五年來，既沒有白費冼師傅的「人生指導」，也沒有當Kent哥的訓話為耳邊風。一○年，他終於拿到了「飛躍進步男藝員」獎；去年又憑《囧探查過界》在大馬成為「我的最喜愛電視男配角」。

攞到獎，我只可以話感恩。

我入咗TVB之後，有啲人話我好唔爭嘢，但老實講，有乜嘢好爭呢？爭乜啫？我只係想自己做自己嘢咋嘛。跟住好多人都覺得我個人冇乜殺傷力，咁就最好！大家可以用平常心去做嘢。

正等於我同鄭嘉穎合作，其實都OK愉快o架！只不過係，好多時人與人之間係要溝通，可能溝通唔夠，就產生咗啲衝突（早前拍《拳王》後，冼灝英公開指摘鄭嘉穎性格有缺陷。），但so far，我喺裏面學到最多嘅，就係溝通上嘅技巧，學習點可以喺最輕鬆嘅情況下做到大家所需要嘅嘢，令到大家都舒服，就算大家唔係朋友，對方都唔會過你一戙。

《我的如意狼君》成為了他的上位作。

由於一直學習功夫，很多網友都讚黃浩然（左）是《拳王》中最有姿勢的主角。

造新聞

黃浩然坦言，入行十五年來，這幾年的星途才真正說得上為順利，才真正說得上開始有觀眾緣——即使他的見報率仍然不算高。

好多人都叫我做多啲宣傳，我都好明白，呢樣係我嘅工作之一，但我一定唔會刻意去做呢啲嘢。

咁多年嚟，有啲記者都會問我，有啲乜嘢可以夾嚟造吓，其實如果我要夾，早就夾咗啦，如果我同得一間報館夾，咁全行都會知，然後個個都會搵我夾，跟住我以後啲新聞，都會係夾出嚟！表面上我係幫記者交到功課，亦都會令我有見報率，但同時我嘅形象亦一定會因為咁更加衰——當然，我唔係話同記者夾造新聞係錯，只係對我嚟講，唔係一件舒服嘅事囉！

OK，我選擇咗唔夾造新聞，咁我咪安份地接受自己冇乜新聞囉。不過咁都好o架，有好多狗仔隊知我唔係啲咁嘅人，就算跟我，都會幾尊重我，對我不薄o架，因為我好多時都會盡量畀佢哋影，佢哋亦都會盡量影完就走，呢啲嘢係雙向嘅，你平時係寸嘅，人哋咪對你寸囉，大家尊重啫。