客廳內擺放的古董傢具，大部分來自印度，而且超過百年歷史，木櫃上的花紋雕工精巧，充滿南亞風情。

登堂入室

效忠無綫多年的黃智賢（Ben），經《潛行追擊》辣薑一角後，終於走出長期留守的綠葉崗位，在兩部重頭劇《雷霆掃毒》和《名媛望族》中均孭重飛。運到了，搵錢機會隨之而來；但作風穩健的他不敢輕言入市，寧願跟老婆租住海邊村屋，兩公婆不造人仔砌屋仔，搜購印度古董傢俬，一手一腳精心設計私家居。

有價有市
黃智賢與太太婚後一直租住西貢海邊七百呎連天台村屋，屋內裝修，完全自己一手一腳搞掂，大部分傢俬，更是印度上百年的古董。
「大部分都係印度經過翻新嘅古董傢俬，我就係鍾意佢獨一無二，特別古樸又有氣派。」黃智賢說。
據了解，這類翻新古董傢俬，在香港一向有價有市，單是小小的一張几仔，已經要六、七千元。
「雖然古董傢俬價錢貴，但用料好，雖然件件上百年歷史，我用咗成十年咁耐，依家睇落仲係好新，計起上來就好抵用。」
阿Ben跟太太平日愛行家居用品店，即使去到外地旅行，一樣鍾意到處搜購精品。
「見到鍾意嘅擺設同畫就會買，試過捧住個花樽上機返香港。」同太太未有造人計劃，致力享受二人世界的黃智賢喜歡自製浪漫，他特別利用一個外形似壁爐的書櫃，作為兩公婆生活的見證。「上面有對燭台係我同太太喺紐西蘭結婚買嘅，小天使旁嘅水晶係朋友送嘅結婚禮物，有紀念價值嘅物品歸類擺埋一齊，覺得有意思啲。」

買樓Hold住
近期有份演出的《On Call 36小時》和《東西宮略》收視理想，黃智賢人氣幾級上；跟林峯合作《雷霆掃毒》，也升呢做他的死對頭。
加重戲加人工，已經儲夠買樓錢，但始終未有置業打算。「曾經想過買樓，不過見到鍾意嘅，人哋唔賣，而家係住得僻啲，租又唔算好平，但住得幾舒服，平時又可以帶隻狗行海灘，暫時都唔諗住囉。」 ####


阿Ben表示屋企雖然位置偏僻，不過返電視城也不過二十分鐘車程，加上這個無敵海景，貴租一點也值得。


天台是阿Ben曬太陽的地方，那把超大太陽傘，是他跟太太專程往深圳搜購，價廉物美。


家中大小事務主要由阿Ben太太負責，他則主力負責插花，圖中就是他的精心傑作。


這盞懷舊水晶座地燈，是阿Ben跟太太在英國搜購回來的。


結婚紀念角
古董傢具最大的特色，每件都是獨一無二，外形十足壁爐的書櫃，櫃頂放着的燭台和水晶，是黃智賢的結婚紀念品。


這個古董書櫃購自鴨脷洲的傢具店，價值不菲，而且重量十足，當年要凌空從屋外吊入屋。


未有打算做爸爸的阿Ben，與太太湊狗為樂，經常帶狗仔落屋外海灘散步，可惜他懷中的CoCo，去年已因病逝世。


今年無綫重頭劇《雷霆掃毒》，除有林峯和苗僑偉孭飛外，黃智賢將飾演兩人的死對頭。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄