突然有喜，楊千嬅要即暫停所有工作，留家安胎。直至最近胎兒穩定，她才局部恢復工作。早前千嬅到澳門出席威尼斯人酒店活動，半小時有五十萬落袋，BB好腳頭，帶挈媽打執快錢過年；早個禮拜，千嬅由媽媽及奶奶兩老護住，到上環買補品，不足一小時，掃了一車鮑魚、花膠、燕窩，估計使近三十萬。

日日隊兩杯奶
已經懷孕十八週的楊千嬅，停工個多月安胎，每天睇碟、瞓覺、織冷衫打發時間，令本來無時停的工作狂千嬅悶壞，經常扭老公陪她外出，又自己揸車到朋友家聊天；怕老婆操勞，丁子高於是下令嚴禁老婆出街。
「千嬅好怕悶，但係懷孕初期因為做演唱會操勞過度，醫生建議佢最好要多啲瞓床，雖然佢都有聽話照做，但如果瞓咗晏覺，夜晚又瞓唔到，所以而家千嬅日頭都唔敢瞓咁多。」千嬅身邊人說。
雖然未夠五個月，但千嬅個肚已相當大，比較容易攰。「為咗BB健康，千嬅依家食好多高鈣食物，每日都飲兩杯奶，奶奶又會煲魚湯同花膠湯俾佢。過咗聖誕之後，佢個肚更加明顯，丁生買咗個俾大肚婆墊住條腰瞓覺嘅床墊俾老婆，等佢舒服啲。」

半個鐘五十萬
佗B開始穩定，千嬅亦局部恢復工作。早前她挺着巨肚，到澳門威尼斯人酒店，與老拍檔吳彥祖出席金龍亮燈儀式；由於這是千嬅公告懷孕後首度出席公開活動，據知半小時活動，已經穩袋五十萬。「BB腳頭好，千嬅有咗之後，好多廣告送上門，除咗之前屈臣氏、威路士要拍新一輯廣告，仲有奶粉、電器同埋減肥廣告搵上門，啲廣告商好好，全部肯遷就千嬅，等佢ready先至拍。嚟緊佢會陸續搞掂埋手頭上嘅工作，做多幾個月就全面停工生仔。」

BB打側瞓
由胎兒三個月開始，千嬅每月儲起BB的4D掃描，又花時間上網，睇BB用品。「儲起BB啲4D掃描，係因為千嬅為BB寫緊日記，留為紀念。」千嬅好友說。外間盛傳千嬅今胎生仔，連老闆林建岳亦漏嘴，恭喜千嬅生龍仔，但據知千嬅至今仍未知胎兒性別。「因為照過幾次超聲波，BB都打側咗，暫時睇唔清楚，所以仲未知係男定女。千嬅同老公都覺得仔女都無所謂。」知情者說。農曆新年將至，大肚千嬅大條道理出街辦貨。

出動私人飛機
已懷有四個多月身孕的楊千嬅，為了專心安胎，雖然已推掉四部片約及將巡迴演唱會舉行日期順延，但由於仍有不少手尾要做，未能立即全面停工。上週她坐直升機到澳門出席春節活動外，還要佗住BB完成新碟《火鳥》錄音及出席新碟大型簽名會。至3月初，她會投入新片《春嬌與志明》的宣傳工作，到時老闆林建岳將會出動私人飛機，接載千嬅到北京宣傳。

兩母護航
上週五（十三日），本刊發現千嬅挺住巨肚，大褸、口罩包到實，與媽咪及奶奶到上環一間參茸海味店選購補品。只見兩老入到鋪頭即郁手，花膠、燕窩執齊，為千嬅補胎大手入貨，當中亦揀了不少賀年海味。
至於千嬅，則在店內狂掃鮑魚及花膠，只見她邊揀邊數手指計數，似乎是準備送禮。呢個潮媽，原來不失傳統。

龍B當旺
近幾年娛樂圈特別多喜事，早前有結婚潮，近月又有唔少藝人先後宣布造人成功，龍年星B排隊出世。 劉德華、朱麗倩劉華去年11月奪金馬影帝後，在網上自爆雙喜臨門「吾家有喜」，今個月初，他公開親證45歲太太朱麗倩懷有龍B四個多月，但未肯透露是龍仔定龍女。


王浩信、陳自瑤 30歲的陳自瑤去年11月與王浩信「奉子成婚」，現懷有四個多月「小龍女」，預產期為五至六月。


陳慧琳、劉建浩去年3月，39歲的陳慧琳不幸流產，痛失一對孖女，經一段時間調理後，Kelly再接受人工受孕，未夠半年，Kelly成功再懷有男嬰，她已幫B仔改定乳名「小籠包」。


楊思琦、吳帥去年6月，楊思琦自行宣布與李泳豪分手，即被踢爆搭上前香港跳水隊員吳帥，並懷有身孕。已懷孕七個月的她，早前已秘密到美國安胎，預產期為今年2月。


郭羨妮、朱少杰郭羨妮跟武指朱少杰於去年4月結婚，10月在關島補行禮，現懷有龍B三個多月。 ####

 
懷胎四個多月，千嬅近日外出到人多地方都會戴上口罩，買貨期間，千嬅與身邊友人不停傾偈，有商有量。

 
除了為胎兒買補品，千嬅亦買下大量鮑魚、花膠及燕窩，作為農曆新年賀禮。

 
店員幫千嬅將花膠包裝好，千嬅則不斷計算數量。

 
老公嚴禁千嬅出街，挺住大肚子的千嬅，買補品亦被媽咪全程傍住。

 
入到鋪頭，千嬅仍未決定要買乜，反而媽咪奶奶已出手揀貨。




千嬅在微博放上她在床上織冷衫及吃橙的相片。


千嬅已開始為《春嬌與志明》宣傳。


林建岳揚言千嬅可以隨時放假，最重要安心養胎。


千嬅坦言，為配襯這條長裙，穿上六吋高踭鞋，老公睇到一度唔高興，每行一步亦有幾個工作人員扶到實。


千嬅手執一袋燕窩離開店鋪，與媽咪在門外等保母車。


千嬅挺住大肚到澳門出席活動，正是丁子高的公關公司負責，明撐老公。


閉關期間，千嬅出席公司的聖誕party，表現high爆。











arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄