8/11
髮型屋氹番︰從台灣趕回香港宣傳新片的 Chrissie，工作完畢急不及待趕見男友，在男友店內換上另一身裝束，出席朋友婚宴。
樣靚身材正、作風又夠放， 32D女神周秀娜出道三年俘虜無數宅男、郁啲就話有富豪問價，不過飯局價叫到幾勁都冇用，皆因女神對髮型師男朋友 Avis一條心，打風都打唔甩！
點知堅好感情都有暗湧，娜姐突然網交英超球星里奧費迪南玩示威， Avis出力挽救三年戀：「惟有喺屋企 多幾餐佢食，餵飽佢囉！」
25歲的周秀娜， D Cup與智慧並重，從 o靚模一姐迅速殺入影圈，呢頭完成《抱抱俏佳人》宣傳，新戲《殭屍新戰士》及《婚前試愛》又排期上映，上週再飛往台灣，為將與蕭敬騰合演的新片試造型，明年初仲話要去台灣拍偶像劇。人氣愈勁工作愈多，與男朋友 Avis見面時間自然愈嚟愈少。
戀情考驗
娜姐出道至今事業順境，雖然被有米富豪力追新聞傳個不斷，娜姐一直企得硬：「我唔會變心，冇人鍊得贏我男朋友 Avis！」
不過上週二周秀娜出席網絡活動時，主動自爆與男友冷戰中，更透過 facebook結識曼聯隊長、已婚球星里奧費迪南：「我話我喺香港係演員同 model佢唔信，我就 send咗寫真啲相畀佢睇！我哋月尾會見面添！」出動世界球星代替男友，上週六身在台灣工作時， Chrissie又在微博自爆，有內地富豪中間人請去飯局。雖然 Chrissie即時拒絕對方，不過據知情人士透露，一向人前人後不怕與男友冤氣的 Chrissie，近月因為工作聚少離多，確實再少提起男友，二人感情正歷考驗。
餵飽女神
週日（ 7日），剛從台灣試造型回港的 Chrissie馬不停蹄趕到旺角為《殭屍新戰士》宣傳，活動結束，記者發現 Chrissie鬼祟與其他演員告別，由保母車接載來到男友 Avis位於佐敦的髮型屋。
雖然男友不在場，職員一見 Chrissie連忙開門，可見 Chrissie的老闆娘身份一點沒動搖。大半個鐘後，出外工作的 Avis回到店內，見到幾天不見的女友，二話不說走到店尾僻靜處細語一番。兩人頭貼頭、面對面，又講又笑一輪， Chrissie再撒嬌擺 pose請男友為她拍下全身玉照，然後換掉一身工作服裝，齊齊登上男友座駕，驅車往北角君綽海逸酒店赴友人飲宴。
F：《 FACE》 周：周秀娜 A： Avis
F：今日一齊約嚟酒店？
周：係呀，有個朋友結婚，我哋兩個都識 o架！
F：之前係唔係嗌交呀？
周：呢啲情趣嚟嘅，一早好番，冇事啦！
F： Avis，費迪南同你爭，驚唔驚呀？
A：最驚就係費迪南——鬥踢波嘅話！
F： Chrissie最近桃花好勁，有富豪請去飯局喎！
周：我一日三餐都食得好飽，唔使去飯局！
A：一係喺屋企餵佢食多幾餐，餵飽佢就唔使去出邊飯局啦！
麥玲玲︰ Avis精力旺盛
有份同 Chrissie合演《抱抱俏佳人》的堪輿甜心麥玲玲就話， 81年出世既 Avis性格好又顧家，再加上命格屬於精力旺盛、四肢發達型男性，無論性格定體力都有能耐留得住 Chrissie芳心：「不過 85年出世嘅 Chrissie，命帶兩粒超級桃花星『紅艷殺』，桃花因此都多人兩倍有多，明年桃花比今年更盛， Chrissie工作多聚少離多，反而有助佢哋減少磨擦。」師傅仲話， Chrissie大婚之日要等到 11年後滿 36歲， Avis等唔等到呢？
留言列表
{{ article.title }}
