終於有戲拍！
你係茄喱啡咋！

Pets

我要做明星

2012年10月12日 ~~ 第898期忽然１周

近年愈來愈多寵物做明星名模，拍廣告出 show做舞台劇瓣瓣掂。
好多主人都「望子成龍」，但人也好動物也好，要做 super star殊不簡單，找來寵物經理人 Conny，談談星光背後的故事。

profile

（左）狗名：老虎狗 Cuby
演出經驗：零
特徵：倒 牙成寸樣標誌，最希望做牙擦仔角色。
（右）狗名：金毛尋回犬 Gucci
演出經驗：在今夏舞台劇《 Annie小安妮》扮演 Sandy一角，一鳴驚人。
特徵：性格乖巧，最叻扮死。

Conny旗下的「明星」、「名模」過百，包括金毛、沙皮狗、貴婦狗等幾十款狗種，還有貓、兔仔，甚至箭豬和蠍子都有。 TVB御用的史納莎阿 Jack（曾拍過《有營煮婦》和《最美麗的第七天》）當年亦曾屬 Conny旗下。
「呢隻狗真係好叻，踩滑板倒吊已經是小兒科，牠識得吹蠟燭和認顏色，拍戲好少 NG，後來 TVB直頭簽佢做合約演員。」跟人類一樣，狗一紅便遠走高飛，據聞阿 Jack的身價曾跟馬德鐘看齊，過萬元一集，成狗界馬德鐘。
人類有最低工資保障，寵物界又有無呢？
「視乎咩 job而定酬勞，最多每小時二百蚊車馬費。不過太多主人恨做星媽，自己貼埋車錢，請晒成隊 crew（拍攝團隊）食嘢，所以我哋 agency好難做。」
主人貪慕虛榮一回事，寵物本身有咩酬勞？「雞條（狗零食）囉！」但甲蟲蠍子唔食雞條喎！「嗰啲惟有俾錢。不過我記得上次搵蠍子拍攝，因為牠主人有養狗，所以都是送雞條。」嘩！真係牛耕田馬食穀，蠍子賺錢狗享福！

經過狗導師訓練，有狗界馬德鐘美譽的阿 Jack能狗所不能，在《有營煮婦》中識聽 NG再來過。

Conny說因為太多人想做星媽，願免費供狗給廣告商拍廣告，所以做竉　物經理人不算很賺錢，只佔她營業額 1/3左右，其餘收入靠寵物客戶在網站登廣告。

狗也要面試

Conny經營寵物模特兒中介服務網站（ http://www.ipetchannel.com)多年，她說每天都有成千上萬的主人寄相自薦寵物，但求「仔女」他日可以飛上枝頭變鳳凰，其中以狗來應徵最多。
主人想做星媽，但不是隻隻狗都喜歡出風頭，不少來到 casting才玩嘢。「有啲平日好乖， casting時主人叫佢坐佢死都唔肯坐，就知佢根本唔想做明星。」
像人一樣，不是靚就一定紅，做巨星的首要條件是可以任人點。
「係狗都聽主人話㗎啦，但做明星要肯聽導演和工作人員的話，因為拍攝時主人不可在場，以免影響牠的情緒。」

影帝係隻豬

成功通過面試的寵物可簽兩年合約，有 job就有報酬。每隻寵物都有自己的 com card。「客人跟番 com card個樣來揀蟀。試過有客搵古代牧羊犬影相，主人即刻幫佢剪咗個史納莎頭，以為上鏡靚仔啲，但來到拍攝現場即刻被客彈鐘，所以我常提醒主人，唔好隨便幫狗改形象。」
像星探一樣， Conny在街上若遇到天生麗質的寵物，都會主動出擊發掘新星。「有次去嘉湖山莊碰上寵物豬競跑比賽，有隻叫豬豬的跑贏咗。」
豬豬成為旗下演員，剛巧碰上豬年，出鏡率成為同行之冠。「豬豬好識做戲，個樣好似識笑咁，所以好多客搵佢。」有次牠和官恩娜拍戲，拍拍吓官恩娜發現隻豬唔見咗，結果成 crew人幫官恩娜四圍搵番隻豬。
可惜紅顏薄命，豬豬年前因病過身，也算是一顆巨星的隕落了。

豬豬當年紅極一時，但後來牠日漸長大，才知牠是農場豬不是寵物豬。

Gucci在舞台劇《 Annie小安妮》中當主角，牠是經 100隻金毛挑選出來，之後由狗導師訓練半年，教牠走位和戲中狗名 Sandy，才正式演出。

很多活動都要狗出席，像這個狗婚禮，主辦單位要兩歲的沙皮狗和十歲的牧羊犬結婚，上演一段忘年戀。

寵物 com card簡單介紹身高品種、性格和特異功能，兼詳列其工作經驗。