韓佳人（右）同「神話」成員文晸赫，在《超級上位王》飾演一對歡喜寃家。
亞熱帶
那些年的…韓佳人
《那些年》熱潮吹到去韓國，大賣初戀 feel的韓片《初戀築跡 101》亦在當地熱爆，入場人次突破 410萬，成為韓國史上最賣座愛情片。
片中飾演成年版「沈佳宜」的韓佳人，加埋早前同金秀賢的電視劇《擁抱太陽的月亮》又成收視冠軍，令她人氣再爆燈！ 30歲的韓佳人早婚收山再復出，但仍然可以穩守一線地位，她的《那些年》絕對精彩過電影橋段。
生成一副娃娃臉的韓佳人，今年三張 嘢，已結婚 7年。她 05年拍《愛情的條件》及《超級上位王》剛走紅，但她居然走去嫁人，同出道時拍攝《黃手帕》撻着的延政勳結婚，兩人仲唔係玩暗婚，而係叫晒記者採訪。婚後兩年，韓佳人的演員老公延政勳就要當兵，韓佳人為了照顧老爺奶奶，更在拍完話題韓劇《魔女遊戲》之後，不惜收山三年。
當人人以為老公當完兵，韓佳人就會疊埋心水相夫教子之時，韓佳人忽然在 2010年復出，又表明 2013年至打算做媽媽。
下周抵港的《初戀築跡 101》在韓國大收，又獲百想藝術大賞 11項提名，但偏偏冇最佳女主角份！鬼咩，韓版柯騰係嚴泰雄（左），「大雄」年初部新戲只有 28萬人睇，拍檔個勢太弱，難有火花。
激罕出浴
在 07年的《魔女遊戲》，韓佳人飾刁蠻富家女，同老竇水溝油。由於不想盲婚啞嫁，於是主動溝仔，搞出不少笑料。大家睇慣佢做乖女，呢幕濕身戲情挑在熙，激罕！
熱爆全國
在今年熱爆的《擁抱太陽的月亮》中，飾演失憶巫女的韓佳人周旋於國王金秀炫與皇弟丁一宇之間。《擁》劇以結局逾 40%的收視，被譽為繼《大長今》後，另一套國民電視劇。
《狼君》照抄
10年的《 Bad Boy》，男主角兒時被富商誤以為是私生子，後來真私生子出現，被狠心拋棄的男主角長大復仇。劇集上半部同《我的如意狼君》似足八成，而韓佳人咪就係飾演周麗淇個角色。
反底 OL
韓佳人做慣乖乖女，連錫錫都被動過人。在 05年的《超級上位王》，韓佳人飾演一名愛情事業雙失的 OL，最終成功反底。
師奶仔愛追星
韓佳人性格其實勁「師奶仔」，她冬天拍戲等埋位時，會披上毯子取暖，她一用就五年，污糟就用手洗，鬼咁慳家。曾經有工作人員睇唔過眼韓佳人咁慳，想送一條新毯俾佢，韓佳人反而話：「我對呢張毯有感情，唔換得 㗎！」慳得來，都幾長情！
另外一樣師奶性格，就係追星。她同好多潮媽、潮太一樣，都好 like韓國靚仔男星，而韓佳人的「賣飛佛」，就係早前來香港蒲吧攬女攬到出晒位的「 Big Bang」。今年三月， Big Bang開騷，韓佳人都有捧場，而且一睇就係兩場，搞到老公延政勳對記者都忍唔住呻老婆唔黐家。
戲外鍾意仔，而拍戲時由於一副「童姥」樣貌，韓佳人的拍檔亦多數係花 𡃁，好似《擁抱太陽的月亮》，她的兩名拍檔金秀賢、丁一宇都細過她五年以上。被問到「老牛食嫩草」，韓佳人笑笑口話：「我 嘅年紀大過拍檔，我都覺得唔好意思，希望佢 哋唔介意啦！」復出以來，韓佳人再成為收視保證，做她拍檔有着數，有邊個會介意吖！
韓佳人 05年結婚，事業上一直女尊男卑，韓國多大男人，難得老公延政勳唔介意。
一度傳出宋承憲暗戀韓佳人，上電視遊戲節目時，憲哥亦被人攞 嚟玩。
《擁抱太陽的月亮》收得，在 fans參與的祝捷會上，韓佳人五體投地向 fans謝票，盡現真性情。
解構韓版《那些年》
在《初戀築跡 101》中，建築師承民（嚴泰雄飾）受大學同學書妍（韓佳人飾）委託，要替她重建在濟洲島上的祖屋。由踏進小屋的一剎那起，他憶起第一次見到少年書妍（秀智飾）及當年暗戀她的過程……當年一段未完的初戀，竟然大有機會續緣！
《初戀築跡 101》一樣大玩清純，勾手指尾都出埋，不過《初》片景色同畫面都比《那些年》更靚。少年版沈佳宜由 Miss A成員秀智演出，她亦憑本片贏得「國民初戀」稱號。
台版
韓版
《初戀築跡 101》同《那些年》都有行火車軌。連細位都咁似，唔怪得《初戀築跡 101》被稱為韓版《那些年》！
留言列表
{{ article.title }}
