單人訪
春田采花 陳小春
陳小春為宣傳慘情新歌而來，但不知怎地總是笑口噬噬，面有「難」色。
「可能最近『嫁』咗俾人，硬係唱唔番以前陣慘味！」
幸福滿溢的說話從紀錄驍勇善戰的陳小春口中吐出，實在叫人嘆為觀止。
是天意吧。從前喜歡到處灌溉的農夫，遇上繞口劖手的小花，赫然發現悉心栽種原來不會損手爛腳，還會帶來無比快樂。農夫從此專心一意，為了一朵花放棄整片田園。
陳小春專訪
「係自己揀嘅，如果唔搵個咁牙牙擦擦嘅老婆，又點 㩒低我嘅脾氣？」
與應采兒結婚才兩年，陳小春像換了另一個人。現在無時無刻愛回家，甘心被收伏。
「耕田其實好辛苦，因為，我真係耕過。」
我鍾意呀，吹咩！
陳小春新歌〈難怪〉，他一貫手到拿來的慘歌，但今次居然大有難度。
「都係拎住份歌詞講古仔，可能因為我『嫁』咗啦，心態真係唔同咗！」
他笑得陽光燦爛，也懶理這樣說其實是替自己倒米。他說他「嫁」了給應采兒，很能代表他現在甜蜜幸福的心情。
「嫁、娶都係一樣啫！甜蜜係大家一點一滴儲番嚟，但嘈嘈鬧鬧都要有，否則唔會成長。佢呀，都真係幾惡。」
在這段關係裏，應采兒的確佔了上風。她把一頭家打理得有規有矩，把老公弄得貼貼服服。
「以前一個人，鍾意點就點，夜晚九點收工，夠膽死即刻搭夜機去旅行。佢唔得㗎，佢鍾意凡事有 planning，話咗 10月 1日飛就 10月 1日，唔好突然改 30日或 2日。我遲到少少佢都好嬲，我心諗，又唔係趕唔切飛機，使唔使咁大反應？但佢真係會爆。從呢啲嘈嘈鬧鬧當中我知道，有啲壞習慣唔可以再做，而我又幾開心自己啲壞習慣終於有人糾正。」
一物治一物，都說陳小春被老婆「食住」，他點點頭，絲毫沒有打算自辯的意圖。
「呢種關係係我想要嘅！如果唔係有個咁牙牙擦擦尖尖利利嘅人，又點 㩒得低我？唔知點解我就係鍾意佢嘈，佢喺度我就有安全感，見到佢笑我就成個人軟化！」
兩人早在 2000年已認識，應采兒當年才十七歲，從美國來香港發展，簽了中國星，與陳小春同門。他們曾傳緋聞，但陳小春今次澄清二人從來沒有撻着，正式拍拖是 07年，三年後結婚。
「我聽佢講過，揀我係因為覺得我要玩嘅都玩夠，應該會定性，所以反而有信心。」
他四十五歲，她才廿九，兩人相差十六年。陳小春不用「湊女」，因為她一直在「湊仔」。
「其實我似佢個仔多啲。見到狗仔隊，佢會話：『嗱，唔准嘈呀、唔准發脾氣呀！』又會打嚟問我返唔返屋企食飯：『你係返我叫工人煲湯呀！你想食乜？唔好喇，等我同你諗埋。』有人幫自己安排起居飲食，真係幾窩心。自從阿媽走咗之後，已經冇人咁對我。」
現在晚晚回家吃飯，我笑他小春變「鵪鶉」，他一點也不介意。
「唔好咩？呢啲係我哋兩個嘅相處方式，唔係咩醜事。婚姻唔存在上、下把位，即使我返到屋企跪玻璃扭耳仔又如何？慘得過我鍾意呀，吹咩！佢發脾氣，我咪講句：『係，我知係我唔啱……』有幾難？兩公婆呃呃咁就一世，最緊要大家開心，唔開心我都唔會『嫁』俾佢啦！」
今年二月陳小春在北京拍電影《 3D詭婚》，被一女演員主動追求，應采兒在微博發功趕退小三：「那個女的，敢再發些奇怪的短信或照片給陳先生，我就在微博發你名字和電話，聽到沒？」小春今天談及此事，有點尷尬：「搞到咁大件事，少少無聊囉！但掉轉都一樣，邊個搞我老婆，我點止同佢死過，直頭殺佢全家！」比喻啫，春哥春嫂愛對方嘅程度，我哋知㗎啦！
搞我屋企，同你死過
我相信，眼前親切得來帶點幽默的陳小春是他的真實性格；從前滿身稜角動輒罵人，因為欠安全感，所以要保護自己。
「我其實係一個好幼稚嘅人。識朋友，會先對人好，但人哋未必一定會對我好。我有脾氣，因為唔想俾人同化。我做唔到一行出嚟就大嗌：『喂，早晨，大家好呀！』久而久之，咪唔出聲囉。但唔出聲唔等於好蝦，你搞我屋企，我當埋條底褲都要同你死過。我知我俾人印象暴戾，我唔介意大家點睇我，保護自己屋企係天經地義。」
家，永遠是陳小春神聖不可侵犯的最後防線，因為那裏有他最愛的家人。他在斧山道舊式公共屋邨長大，小時候家裏很窮，做地盤的爸爸怕他學壞，常用鎖鏈把他鎖在家。鏈頭扣鐵閘、末端纏雙腳，他的活動範圍，只有幾十呎。
「爸爸經歷過打仗，會長期放把刀在牀頭。我又唔算特別曳，呢種只係佢嘅教仔方式。十三歲嗰年暑假，佢甚至捉我返鄉下耕田。割禾、打禾、曬禾，之後再耙泥插秧，日曬雨淋好辛苦。爸爸沒收咗我本回港證，想偷走返香港都唔得。當時好嬲爸爸，但依家好多謝佢，如果唔係佢管教咁嚴，可能我已經做咗黑社會，或者坐緊監。」
2010年情人節，陳小春在美國拉斯維加斯「嫁」了給應采兒，同年 11月在香港迪士尼擺酒。《蘋果日報》圖片
去年與黎明拍《鴻門宴》，兩個成了交心好友。陳小春的新歌，就是屬黎明 Amusic旗下。
對上一次在無綫出現，已是 07年的《鐵咀銀牙》，飾陳夢吉。
《古惑仔》系列原本無陳小春份，「山雞」一角本屬意金城武。後來金城武因檔期問題，改由陳小春頂上，一切改寫。
93年《晚九朝五》，陳小春的第一套電影。電影屬 UFO，因而認識老闆之一曾志偉。陳小春之後做《獎門人》，緣份也是由此而來。
父親後來回鄉定居，陳小春和兩妹一弟便由母親養大。
「媽媽在酒樓做洗碗工人，一個養我哋幾個。我由細到大都好黐媽媽，睇見佢日捱夜捱，自己一啲都幫唔到手，真係好心痛。」
他原本考到無綫舞蹈藝員訓練班，但因為無人工，最後做回髮型師。後來得許愿看中，把他帶出來成立「豹小子」，之後又組「風火海」。 95年拍了《古惑仔》後才開始脫貧。
「其實媽媽都冇享到幾多福。入行後搬咗去跑馬地，之後再住康樂園。係去到康樂園嗰幾年，媽媽啲生活先叫做好啲。所以當有記者走嚟影相搞我阿媽，你話我㷫唔㷫？你夠膽入我屋企，我打死你都得。」
老爺奶奶
陳小春當然不會打死記者，但惡形惡相便不脛而走。其實，他內心一直脆弱。 01年在台灣出唱片，對外一副戰鬥格，回到家便馴如綿羊。
「其實我不嬲都係鱷魚頭老襯底，得個惡樣。嗰幾年成日去台灣，每次返嚟阿媽都好開心，講嘢講唔停。我就攬實佢錫，錫到佢唔好意思，推開我！媽媽好錫我，知我鍾意飲益力多，每日都會放一枝在雪櫃，飲完第二日又有……」
母親患癌，他為她走遍內地尋名醫，能做的他都做。可惜母親終在 05年病逝，陳小春之後兩年刻意減產，因為人生好像再沒意義。
「心情好 down，好似冇咗一忽肉咁。之後兩年根本唔知自己做緊乜……」他眼睛發紅。
母親過世後，他脾氣變得更壞。
「媽媽喺度時我都仲會避忌下；媽媽走咗，你一撻我就着。一來自己真係躁底，二來順便洩憤。我唔需要人同情或明白我。」
就在陳小春飽歷喪母之痛時，甚有母親影子的應采兒出現，今次一撻即着的，是愛情。
「近年已好少發脾氣，因為有咗另一個『媽媽』，要顧及佢感受。後來我發覺，做人其實根本冇必要發脾氣。」他回復笑容。
最近父親回港定居兼醫病，他叫做一家團聚。只是父親脾氣依然剛烈，叫醫護人員怕怕。
「我『老爺奶奶』都有勸過佢，叫佢睇開啲。哈，我真係好鍾意『老爺奶奶』呢幾個字……」
叫陳小春牽掛的一直只是家人，事業嘛，他知自己比上不足，比下有餘。
「託賴咁多年都有工開，事業一直幾好，滿足㗎啦！就算照顧埋爸爸同細佬妹都冇問題。我最開心嘅係老婆唔係『廣東道』人，佢上網買到平嘢，不知幾開心……」
「風火海」中朱永棠是風，陳小春是火，謝天華是海，三人由許愿一手打造。「許愿當年教我哋睇藝術展覽、聽 musical，又搵老師教英文同國語，都係想我哋多啲墨水。」
正式入行前曾替不少巨星伴舞，張國榮的〈側面〉 MTV，原來有陳小春份。
童年時，一個苦樣。
生仔
母親過世幾年，陳小春一直未能釋懷。
我問他有甚麼願望，他想也不想便說：「我想媽媽返嚟！」
此語一出，無人能接得上。
再次安慰又太過矯情，道破願望根本無可能實現又太殘忍，哪怕大家都知是事實。
「你突然咁問，我咪咁講囉，我真係咁諗嘛。
咁呀……我想快啲生 BB，呢個真係我哋嘅願望，依家努力緊喇！」
人生必經過程，身邊有人生死與共，夠了。
母親離世，永遠的遺憾。《壹週刊》圖片
下期預告：掌門人
撰文：林蕾
攝影：陳偉強
協力：李梓軒
錄像：湯文峯
化妝： Michelle Tong@D-mop Beauty
髮型： Cliff Lam@Beijing Hair Culture
形象： Bryan@the Flaming
服裝： agnè s b.
留言列表
{{ article.title }}
