週日（ 2010年 10月 10日），被視為「十全十美」嫁娶大日子，當日有 137對新人註冊，搞到婚姻登記處爭啲爆 quota。
無綫新聞「一姐」方健儀，跟工程部技術指導男友洪楚恒，亦選擇呢日拉埋天窗。雖然註冊當日，其他無綫女主播影都冇，註冊儀式亦唔見得豪華，但無阻 33歲方健儀歡喜出嫁。婚後二人更會搬入二人聯名花 3百萬買入的馬鞍山上車盤，唔介意公一份婆一份，講心唔講金。
貴為無綫新聞首席主播嘅方健儀，月入約 5萬，皇帝女唔憂嫁，偏偏鍾情月入約 2萬、年過 40的洪楚恒。為求好意頭，二人早在 7月 12日已向婚姻登記處遞表霸位，同月 22日更聯名以 3百零 8萬購入馬鞍山海典灣一個 6百多呎的 2房單位作新婚愛巢，實行公一份婆一份。
打情罵俏
當日「大會」記者潘蔚林抵死問新郎咀得夠唔夠？新郎即答：「夠喇。」潘繼續問：「今晚咀幾耐？」新郎答：「今晚慢慢咀啦。」而新娘即刻答嘴：「吓，乜你有咁長氣咩？」當眾打情罵俏。
方健儀偕夫乘 TVB借出車身寫上「 I love you」嘅「 TVBUDDY」粉紅色房車，於上午 9時 45分註冊，除咗「十全十美」，仲「長長久久」，夠晒意頭。
一對新人嘅白金結婚戒指購自周大福，而方健儀的訂婚鑽戒（左圖）約 1卡重，算講心唔講金啦。
無綫不但借出「 TVBUDDY」粉紅專車賀方健儀出嫁，仲派出新聞採訪隊及《東張西望》作採訪報道，一向低調嘅方健儀夫婦最後亦只肯做「布景板」，不作訪問。
唔見女主播
週日早上 9點 45分， TVB出動「 TVBUDDY」粉紅專車接載一對新人到達尖沙咀文化中心註冊，盡顯方健儀新聞「一姐」地位，而前商務及經濟發展局局長馬時亨、無綫新聞及資訊部助理總監袁志偉以及一班男主播如潘蔚林及方東昇等亦出席觀禮。
方健儀穿上大蝴蝶簡約婚紗，新郎就以西裝配波鞋。訪問慣大人物的方健儀當日變身名人被圍訪，問到出嫁心情，新娘禮貌拒答：「唔好意思，我哋要跟公司指引，唔可以做訪問。」
方健儀就唔肯透露婚紗牌子，而新郎洪楚恒卻以 Air Force襯禮服，繼續以戴開嘅 Casio手表上陣。
記者執輸
拋花球時，要在場男記者呼籲女記者埋位， TVB新聞部一眾女同事冇人接到，更拋咗落地下，最後由女記者鄭萃雯執起。
新聞部攝影師陳惠恩（左一）做洪楚恒嘅伴郎， 06年曾經和前「無綫新聞之花」趙海珠拍拖，可惜唔夠 2年就散，睇見洪楚恒可以修成正果，相信有一番感觸。
方媽媽對二女方健儀引以為榮，喺微博話註冊當日場面「好犀利」，方父對女婿相當滿意，而方健儀胞妹（左）亦身材高䠷， TVB真係可以考慮搵方妹加入主播行列。
7月 22日方健儀和洪楚恒聯名購入馬鞍山海典灣一個 650呎、兩房一廳嘅單位，價值 308萬，以佢哋月入過 7萬，供樓應該不成負擔。
讚新郎似 MC Jin
不過當「大會」記者潘蔚林「扮嘢」追問她結婚心情時，她就笑笑口話：「心情好興奮，同埋估唔到咁多人嚟祝賀我哋。我老公好型，好似 MC Jin同王祖藍咁。」
叻女出閣嘅方父向本刊透露，由於週日多間酒家酒席爆滿，所以一對新人要到本月 17日於沙田明星酒家補擺酒。至於度蜜月，方父話：「本來佢哋想去日本，但家（日本排華）一定唔會去喇，會轉地方。」二人完成註冊儀式後便到文化中心外拋花球，幾位新聞部同事包括記者鄭萃雯等冇人肯接花球，最後花球跌落鄭萃雯腳邊，她被迫執起。咦，咁 TVB新聞部下一位新娘有機會係鄭萃雯？
男主播總動員
新聞一姐結婚，女主播影都冇，但就有新聞部男高層和一班男主播、男女記者撐場，眾星伴月一樣夠氣勢。
方東昇活潑
經常和方健儀拍檔上陣嘅主播方東昇，見到新人咀時，亦有歡呼起哄，一改平常嚴肅形象。
潘蔚林扮記者
潘蔚林當日扮記者採訪新人，仲搞鬼地問二人當晚要咀幾耐先滿足。
袁志偉畀面
無綫新聞及資訊部助理總監袁志偉，亦都出席撐方健儀，足證新娘的一姐地位。
彭國柱扮路人
錄影新婚片段時，記者彭國柱扮路人甲，喺新郎背後舉 V搞鬼。
蘇敬恒 做攝記
蘇敬恒全場影相冇停手，後來仲陪搶到花球嘅女記者鄭萃雯一齊步行離開添。
黃大鈞晒女
同方健儀私交甚篤嘅黃大鈞，亦都攜眷出席，仲好鬼馬咁瞪大對眼合照。
朱薰 30萬擺酒
喺「十全十美」之日成婚嘅，仲有商台 DJ朱薰和樂隊 Mr.成員 Dash孖生弟弟譚健榮。二人於九龍 W酒店筵開 28席招待親友。當晚朱薰身穿由潮人黃偉文幫手設計，由 YSL波點禮服裙改裝成嘅開衩婚紗。以 W酒店婚宴每席約 1萬元計，朱薰起碼花了 30萬擺酒，算唔失禮。
李克勤和校長譚詠麟（右一）孖住到賀，克勤送咗條 5位數字嘅披肩作賀禮，而校長就直接送 10萬「保家宅」利是，夠晒實際。
方健儀 10全 10美 婚禮- 簽字 註冊
留言列表
{{ article.title }}
