上星期《 AC III》 PS3版推廣活動，有一半美國血統嘅索模 Jessica C.以噴血警鐘造型 cosplay男主角 Connor，做刺客咁明刀明槍殺人，肯定唔合格啦！

漫遊毒物

Assassin's Creed III美式刺客

2012年11月07日 ~~ 第285期 Face

自從《 Assassin's Creed》第一集出現後，一眾機迷每年會有機會返到過去意大利羅馬，四圍遊覽外仲可以一嘗當刺客滋味，將阻住兄弟會發達的教團、政棍、花心漢、小偷、殺人犯一一暗殺。但正所謂向西向得多就算達文西都會悶，今次出到第 3集， PS3、 PS Vita雙線故事，將遊戲背景移師到去發生革命戰爭時的阿美利堅，親身目擊美國獨立過程，驚險指數拍得住颶風桑迪襲紐約。

機種： PS3、 XBox 360
廠商： UBISOFT
類型： ACT
人數： 1至 8人
售價：$388/PS3 500GB主機+遊戲套裝$2,288

PlayStation系列獨家雙線

雖然《 AC 3》係 PS3/XBox360雙平台推出，但只有 PS3版可以跟 PSV獨家外傳互動，兩位主角可 crossover合作以 DLC code及做任務互送道具， 11月 20號仲有中文版！

以暴易暴革命鬥士

今集男主角 Connor Kenway係美國原住民，小時候村莊被英軍入侵而盡毀，決心加入刺客兄弟會維生。後來美國爆發獨立戰爭， Connor心深處雖然想將所有歐洲入侵者趕走，但最終都加入革命軍跟華盛頓、法蘭克林一齊與英軍戰鬥。好衰唔衰呢個時候佢竟然得知自己有一半英國血統，身份認同仲矛盾過香港年輕人。因為呢個背景， Conner打法會比上兩代主角更原始更暴力，啱晒美國仔口味。
Connor佢本身係一個狩獵人，完成執行任務外更可林間狩獵賺錢；除隱身、爬樹、劈斧頭等強項， Conner仲擁有預測未來行動的「 Eagle Sense」能力，執行任務更 easy。

除建築物及山崖，今集主角更連爬樹都得，好隻超級馬騮。

生活於森林嘅 Conner，除咗要刺殺人類，仲要劈動物自保，搵食艱難。

Conner新武器「繩鏢」可將目標人物生擒或獵殺，再吊上樹枝或高空建設物，連收藏屍體嘅手續都慳番。

跟住條白線走，利用 Eagle Sense去執行難度極高的偷聽任務， Conner皮膚咁黑，唔通佢係「竊聽青雲」扮嘅？

Connor唔似新界班惡霸，係窮到喊嗰種原居民，撞正殺人淡季要接散 job搵快錢，上至保鑣、細至速遞、打荷包、捉棋賭錢乜都做。不過最主要收入係如圖中，狩獵野獸毛皮賣去軍營搵錢。

宏偉重現美國波士頓

上兩集發生喺意大利，由於唔熟佢歷史，都係當虛構故事咁玩，但今集打到美國，就算冇讀西史，地方同人名都應該熟啲。《 AC III》仲改用新圖像引擎「 AnvilNext」，將遊戲舞台波士頓建築、季節、氣候變化做到最像真。除咗城鎮版圖，今集又有以樹林原野為主嘅大規模戰鬥場面，畫面效果非常有氣勢。《刺客》每次出續集都畀人新驚喜，正統第 3代力谷畫質，場景宏偉、動作流暢，揀 PS3/360世代最靚遊戲，本作入硬三甲。

細緻度上已比早兩集更豐富，景觀一望無際，屋企如果有架 60吋電視試機一流。

中期主角會升呢做地主，可邀請人民來你屬地建設新市鎮，從而獲得更多收入。同時主角亦會升職海軍上將，要一邊掌舵控制戰艦，同時指揮士兵發炮擊沉敵軍。

兩軍大戰時幾十人打仗場面非常震撼，且今集已進入火槍武器時代，開着音響就會聽到槍林彈雨嘅聲效！

PS Vita刺女行兇

除正傳《 AC III》， PSV獨佔外傳《 Assassin's Creed 3 Liberation》就首用女主角玩，故事發生於《 AC III》之前，女主角 Aveline係法國名門×非洲移民混血美女，為解放黑奴而戰，佢戰鬥力冇 Connor咁高，卻可玩易容，穿奴隸衫融入貧民區、扮貴族女勾仔，說服男人為佢辦事，加上大量為 PSV量身製作嘅體感篤芒小玩意，玩法新奇有特務 feel。

活動當中仲有阿 Rain扮 PSV女主角 Aveline，型佬過白色小背心男版李彩華！

本作畫面之勁可以話谷盡 PSV機能，絕招係用手指篤篤篤連殺敵人。

Aveline吹功厲害，可以「吹毒箭」暗殺敵人，唔使下下埋身。

操控木筏時可使用體感儀扭 PSV平衡船身，以輕觸背板控制木筏。

Assassin’s Creed 3 Liberation/PSV/ACT/1人用/$298/主機+遊戲同綑版$2,288