分離從來不易，奈何復合更難。情侶如是，組合也一樣，但事實總有例外。
張致恆(Steven)與關智斌(Kenny)，兩個風馬牛不相及的人，八年前被硬生生地拉在一起，以青春與陽光作本錢，結果還是證實了「勉強無幸福」這句至理名言。
太好了，從此各自修行，不用故作老友。Kenny當過個人歌手，Steven做過餐廳侍應，你有你生活，我有我忙碌……


但，那真是「生活」嗎？那真是「忙碌」嗎？
「其實我哋好懷念喺台上唱歌跳舞嘅日子。」Kenny說。
「公司都有同我哋講過，Boy’z呢個品牌都仲賣到吓錢，今時今日大陸仲有好多人記得我哋。」Steven補充。
有工作，才有「忙碌」；賺到錢，才有「生活」。
兜轉多年，Boy’z復合了，還是覺得你最好。成長過程從來不會白費，當年若是為勢所迫，如今肯定是心甘情願地為勢所迫。是有分別的。

張致恆
生於1984年11月10日

你理我？
Boy'z是03年2月10日成立的，當時我只是一個十八歲的仔——應該說是甚麼都不懂，甚麼都不理，但又爛玩爛瞓的死仔。 Kenny大我四年，好自然依賴他。十六歲初簽英皇的時候，我剛讀完中三沒有繼續升學，Mani（霍汶希）叫我一定要找學校把中四、中五讀完。Kenny就扮作我表哥、我的監護人。那個訓導主任的樣子真是笑死，明明好懷疑我們，但又無辦法…… 入行之後我更加依賴他，完全沒有責任心，亦無工作態度可言。我打份工之嘛，背熟歌詞，跳舞唔甩step咪得囉，其他事你理我？Kenny最憎我遲到，有次我不過遲了十五分鐘，看着我跑出門口也不等我，使唔使呀？ Kenny是很照顧我，但我知他是被迫的。以我這樣性格的人，基本上沒有人喜歡和我相處；他照顧我，是不想Boy’z這個組合衰。有次報紙寫我們「懶散」，他嬲到一拳打在我面上；我想起腳還拖，好在有其他人按住我，否則他一定中招！以前的我真的很幼稚，現在不敢講自己已成熟，但起碼快廿七歲了，是時候長大。四年前信了主，令我改變好大，起碼，可以朝早九點準時回到教會。這幾年令我體會最深刻的，是幸福真的不是必然。出道時有化妝師髮型師助手保母司機，一班人跟在背後，覺得一切都好容易。後來自己一個拖個皮喼返大陸拍劇，就後悔為何當初不好好珍惜。近年的收入都來自大陸拍劇和登台，也試過在朋友的cafe做侍應。我份人勝在臉皮夠厚，以前俾Mani鬧都唔怕啦，俾街坊笑吓有乜所謂？我是那種一百蚊可以過一日，十蚊也可以過一日的人。無錢就不吃飯，大不了回媽媽家黐餐也可以。我性格樂天，以前會變成放縱；現在會懂得要有節制。與Kenny分開了幾年，發覺他也轉變不少。現在肯聽我意見，亦開始對我有了信任。我不知道Boy'z還可以生存多久，但好肯定今次我必定會珍惜。

關智斌
生於1980年12月30日

其實我好怯
八年前Boy’z成立的時候，真的好興奮。最初，我好錫Steven，大家坐同一條船，而我又大他四年，好應該照顧他。相處之後，才知「瀨嘢」。扮他表哥幫他找到學校，九月開學，十月訓導主任就不停打來：「你係咪張致恆監護人？佢今日又冇返學。」他只顧在家睡覺，我從未見過如此懶散的人。他的最大缺點是遲到，有次我們明明見到他跑出來都照開車，是想給他一個教訓。他的門鎖，也不知給我爆了幾多次！其實我不是最討厭他遲到，我最討厭他那種賴皮的態度。我最憎他說：「我由細到大都係咁㗎啦，你想我點啫？」有次嬲到揮拳打他，Mani也沒有異議，只是說：「你打還打，下次唔好打面。」後來，我們直情互不瞅睬。 ○五年拆夥，其實都幾悲喜交雜。不用再對住Steven，感覺甩難；但變了我自己一個獨立發展，又好驚。講真，那時只是公司硬要捧我，我本身根本未ready。Steven雖然賴皮，但有他在身邊可以壯膽；我自己一個上台唱歌，真的好怯。我也試過返大陸拍劇，一個人也是膽戰心驚的。這才發覺，原來是我不懂得跟人相處。以前我不喜歡Steven，其實是我太自我中心，從不理會別人的感受。所以，我獨立發展之後的成績也不過一般。最近再和Steven合作，發覺他真的長大了。他覺得我肯聽他意見，其實我是故意試他的。他跳舞一向比我好，新MV的舞步我故意不參與，要他跟排舞師排好後我才加入，他也應該要孭點責任的了。幸好，他沒有讓我失望，真的晚晚排至深夜。最令我驚訝的是，上個月我們出去做宣傳，居然是他打電話來叫醒我！他說他太興奮，早了一個小時起身。 Steven說得對，以前我對他好，其實不是真心，只是不想大家一起衰；現在我對他好，是真的把他當弟弟。

心裏的小孩
這兩個大男孩，從互不相識到狗咬狗骨，別離過後再互相扶持，的確峰迴路轉。2011年，他們重組上市，感覺又好像從來未分開過。
K：Kenny S：Steven忽：忽周
S：「重組」兩個字其實唔係太啱，應該叫從新出發。
K：成件事好神奇，公司從來冇計劃再做我哋，係今年三月日本有個fashion week，揀咗我哋去表演，原來佢哋仲記得Boy’z。反正冇人知我哋唱乜，不如整首新歌啦！後來日本大地震，活動取消，但既然新歌已經錄咗，電台反應又唔錯，公司先決定將我哋重組。
S：國內都係，好多人仲好記得兩個人嘅Boy’z。有時佢哋嫌Twins騷價貴，公司話：「咁不如Boy’z啦」，通常都冇問題。
K：其實呢兩年我哋都有返大陸登台，邊度有人搵，邊度就有 Boy'z。我哋好有彈性，出得起錢咪兩個一齊唱，冇嘅話一個都得，有錢搵點會say no？
S：我哋以朱咪咪做榜樣，佢幾叻呀，髮型化妝全部自己搞掂，上到台又識搞氣氛。依家我哋都好識搞gag，所以好多製作人都鍾意搵我哋。
忽：依家心態係搵錢至上？
K：都可以咁講，其實係一個良性循環。唱歌好似一個promotion，keep住出碟、登台，大陸先會繼續有人搵我哋拍戲，嗰啲先係真正賺到嘅錢。
S：我哋呢啲鬼仔樣，上面叫「特色演員」，好似話幾搶手。
忽：但Kenny已30歲，Steven都快27，仲Boy’z？
K：冇辦法，人哋真係識呢個名……
S：冇所謂啦，我相信無論一個人幾大都好，心裏面總會有小孩子嘅一面，我哋咪做大家心裏嘅Boy’z囉！
忽：若要送對方一句說，會係一句咩說話？
S：我會送句經文俾Kenny：「忘記背後，努力面前，向着標竿直跑。」


K：我本來想送句粗口俾佢，但都係算啦，咁多年喇，我哋一笑泯恩仇！
S：多（停頓）謝喎！哈！哈！

我哋呢個朋友
見過Boy’z幾次，兩人明顯長大了，尤其是Steven，說話有紋有路，工作態度也明顯認真了。「我最想結婚生仔，自從周永恒個女契咗俾我後，依家愈來愈鍾意細路仔，心態上已完全ready做爸爸……」Steven說，有點意想不到。 Kenny嘛，說起這個話題一臉茫然，畢竟他有「小斌女」之稱，成家立室之說，何其尷尬？「以前好介意『小斌女』呢個稱呼，依家已開始唔太mind。娛樂圈都係要娛樂人啫，既然大家鍾意講，就當俾個話題大家。只要唔好寫得太過肉酸，我都冇乜所謂。我嘅緋聞，咁多年傳來傳去咪又係嗰一個（咁即係真啦？）唔係呀！其實我好感激佢（張敬軒），因為喺我事業低潮時，佢幫我好多。佢係一個唔會忘本嘅人，佢同我哋講過，當年佢從廣州落嚟香港發展，好多人見佢係大陸仔而唔睬佢，當時我哋兩個已經走紅，影親相都會叫埋佢，佢一直好感激……」 Steven幫口接上：「所以佢會作歌俾我哋，我哋一定唔會因為傳聞而疏遠呢個朋友。」開口埋口「我哋」，Steven巧妙地為Kenny打圓場。點都好，緋聞裏頭原來還包括一段知遇之恩，說到尾也應該尊重。


####


05年與Kenny拆夥後，Steven與陳偉霆和麥子豪成立Sun Boy'z，維持了兩年。


曾以時薪50元在銅鑼灣樓上cafe打工，Steven好在從不介意別人目光。


國內劇《雲水謠》，夥拍徐若瑄，口碑不俗。但Steven那個造型，我好想笑。


當年的陽光男孩，都幾得少女歡心。


《學警出更》飾演膽小警察，其實幾討好，希望《學警雄心》之後會播。


Kenny作個人發展最初頗有氣勢，只可惜後勁不繼。


不經不覺，Boy'z出道原來已是八年前的事。


Steven曾與鍾舒漫拍拖，但他至今未曾承認。


有傳許廷鏗介入，導致Kenny與張敬軒情海翻波，又有傳Kenny與張已同居……「大家諗多咗啦，我哋只係同區居住，唔係同居。我好難同人相處，一定唔可以同其他人同居。」

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄