上週二（ 30日）馬德鐘夫婦約陳山聰和賭王女何超雲（右一）到意大利餐廳傾生意，離開時落大雨，馬神即時叫餐廳職員開傘遮超雲，免淋濕「財神爺」。
真面目
大茶飯 密斟生意 馬德鐘氹超雲落疊
近年在內地拍劇的馬德鐘，自《飛虎》收視報捷後頻頻回港，更有機會接拍《飛虎》電影版。馬神除做演員，不嬲有鋪搞生意癮，近來積極從商，實行錢搵錢食大茶飯。
不過做生意最好有大水喉射住，據知馬神有意打老友陳山聰主意， 氹掂未來「阿嫂」何超雲落疊泵水，三人齊齊搞生意。三人上週更到銅鑼灣名人意大利餐廳 da Domenico密會兩小時，睇嚟馬神如意算盤打響 咗一大半！
馬德鐘早前以主人家身份主持「快意辦公室傢俬」的開幕禮，雖然後來被踢爆該店是他太太張筱蘭家人擁有，馬神只係掛名老闆，但仍無損馬神搵大錢的諗頭。
馬德鐘與陳山聰於《洪武三十二》中演兩叔侄，於戲中山聰飾演的皇帝被馬神推翻後逃亡，現實中卻成為好友。
護送上車
兩男好有風度，讓女友及老婆上車後才登車，落少少雨好閒 啫。
返何家再傾
飯後一同到大潭雅栢苑，七人車停低後 4人齊齊上樓繼續傾生意。
《壹週刊》圖片
搵大水喉
馬德鐘 9月出席家具店開幕禮，聲稱自己豪擲 2千多萬連買兩個鋪位，原來全屬外家投資，公司股東馬神連名都冇。
據知馬神其實一直想過老闆癮，不過怕獨力投資風險太高，知情人士指，馬神有意找個有錢有後台的朋友合資，最近睇中好友陳山聰並積極游說。
知情人士說：「馬德鐘同山聰拍劇識 咗好耐，上年拍完《洪武三十二》更加老友，以前山聰就話霉 啫！家向超雲求婚成功，變 咗闊少啦，馬神乘機話想同佢夾份搞生意，仲 氹埋超雲落疊，冇超雲邊有錢過手呀？超雲自己都賣開時裝，搞多瓣有乜所謂？」
免千金淋濕
馬德鐘上週就趁住返港幾日，週二晚（ 30日）同老婆張筱蘭，約埋陳山聰同何超雲密會，相約到銅鑼灣開平道 da Domenico意大利餐廳邊食飯邊傾生意大計。 4人傾了兩個多小時，晚上 10時離開餐廳，剛巧下雨，馬德鐘十分識做叫餐廳職員開傘幫超雲擋雨，待超雲和太太上車後，他和山聰才登上同一輛七人車；之後司機駛到大潭雅栢苑， 4人一同落車跑入大廈，傾生意似乎傾到欲罷不能。
記者本週一（ 5日）致電馬德鐘，其經理人 Gary代他回覆：「佢（馬德鐘）同陳山聰係拍《洪武三十二》 嗰時熟絡 㗎，經常約出 嚟食飯，但係咪搞生意抑或餐飯傾 咗乜，佢就唔想回應喇。」有賭王千金幫拖，馬神想搞乜都得啦！
兩年前僅得 20歲的何超雲，已得賭王何鴻燊 揼本 100萬，在蘭桂坊開二手時裝店 chew，咁有經驗，再做老闆娘當然冇問題。
食得招積
陳山聰貴為賭王準女婿，食餐飯都要 high過人，位於銅鑼灣的 da Domenico意大利餐廳，絕對是名人食堂，除賭王何鴻燊是常客，葉蒨文、關之琳、劉嘉玲和大劉劉鑾雄等都愛幫襯。
上年 8月，陳山聰因追超雲而得罪 TVB，後來約樂易玲擺和頭酒都是到同一間餐廳，真係食開有感情。
去年陳山聰與樂易玲等坐在餐廳一角「講數」，餐後記者問是否擺和頭酒，醒目超雲即搭嘴：「係我見工呀。」樂小姐則說要找她拍戲。《蘋果日報》圖片
餐廳出名龍蝦湯及意大利蝦扁意粉等，一碟意粉盛惠$520。
有錢冇朋友
陳山聰拋妻兼同何超雲戀情曝光，從此升呢，但係同昔日電視台好友卻反晒面，除咗馬德鐘，就剩番配角王郭政鴻有偈傾。
唯一兄弟
除了馬德鐘外，郭政鴻亦是陳山聰的「沙煲兄弟」，何超雲更同郭政鴻的兩個女兒上契做埋「契媽」，上月 2日山聰牛一，契母女等更同壽星仔慶祝。
契姐永別
《忽然 1周》圖片
伍詠薇本來是陳山聰契姐，但因去年 10月山聰突然來電說要絕交，伍姑娘回應要永別，雙方並在微博取消關注對方。有指伍姑娘不滿有人見利忘義及拋棄前妻所致。
好友再見
《忽然 1周》圖片
陳山聰與伍姑娘決裂後，本來同山聰好老友的陳敏之亦撐伍姑娘，因而拒絕同山聰繼續來往，山聰亦承認已好少見面。 
留言列表
{{ article.title }}
