趙式芝向來作風大膽，上周於楊如芯搞的活動上，承認在法國舉行同志婚禮，公告二人關係之餘，更順勢宣傳「夫家」品牌。
上流滙
趙世曾阻嫁同志 趙式芝：俾時間佢接受
趙世曾女兒趙式芝與波爾錶太子女楊如芯行埋七年以來，雖然從無公開過是「同志戀人」身份，但在社交界已是公開秘密。上周四（ 20日），二人於北京出席活動時突然出櫃，更自爆早於今年四月已經在法國結婚。
正當全城認為他們愛得勇敢之際，趙式芝老竇趙世曾卻拒絕接受現實。
周一（ 24日），他更向各大傳媒發聲明重申個女冇嫁人。
據知趙式芝為了這場為俗世不容的婚事，曾多番說服老竇允許，可惜最終徒勞無功，於是她今次只好先斬後奏，結咗先算。
對於老父激烈反對，趙式芝無奈說：「要俾時間佢接受。」
趙式芝（ Gigi）和楊如芯（ Sean）自爆成為同性夫妻後，在社交界引起極大迴響，但趙式芝老竇趙世曾的反應最為激動，上周他接受報章訪問時說：「冇啲咁嘅事。」擺明拒絕承認女兒是同志的事實。
周二（ 25日），趙世曾強調愛女沒有同性戀傾向，更可貼錢招女婿，他說︰「同性朋友只係伴，一齊去吓旅行，唔好有其他關係。」
提到愛女嫁同志，趙世曾不但大罵黐線，更發聲明澄清，擺到明唔接受呢位女婿。
楊如芯與趙式芝拍拖 7年，跟姚煒關係不俗，曾孖住出席活動。不過爆出二人婚事，姚多次向友人哭訴，更指二人要同神交代。
親友見證
今年 4月，趙式芝與楊如芯於法國小鎮教堂舉行婚禮，楊家有多名親友現身支持，現場更有神父作證，不過未見趙家親人。
趙式芝「被收聲」
趙世曾連日來被趙家上下親戚、好友甚至傳媒查問此事，知情人士說：「有好幾次家庭聚會， Gigi都帶埋阿 Sean出席。但寧俾人見莫俾人知，同性戀呢件事真係唔使講出口，何況今次搞到咁大，所以趙世曾都幾激心。」為保全面子，趙世曾決定於周一（ 24日）發聲明重申女兒趙式芝並無結婚。為了此重大消息通天，他更特意委派助手，逐間通知傳媒機構，以免掛一漏萬。
老竇做嘢，趙式芝於是「被收聲」唔再高調。周二（ 25日），她向本刊記者說：「我唔會回應，我同爹哋冇嘢，大家仲好 sweet。」而另一半 Sean，雖然話尊重老人家，但同時亦表明結婚是事實，擺明反駁趙世曾。據知一向我行我素的趙式芝，面對傳媒時才選擇封嘴，對於今次可以與 Sean名正言順有「夫妻」名份，她實則開心不已。知情人士說：「我哋打俾 Gigi恭喜佢之餘，都擔心佢同老竇關係轉差，點知佢話『我唔會理其他人點睇，總之我 confirm我結咗婚』，真係勇敢。」
趙式芝早已被楊家接受，更不時以新抱身份，出席家庭聚會，楊的父母對這樁婚事大舉贊成。
楊如芯和趙式芝經常出埠拍拖，去年 12月，二人就到康城睇雪。
趙式芝多年來性向成謎，早年愛以男性打扮示人（左圖），之後又被拍得和老外拍拖買首飾，奇怪。
《蘋果日報》圖片
《壹週刊》圖片
大坑築愛巢
其實趙世曾和趙式芝兩父女關係相當要好，據知早於去年底，趙式芝曾多次試探過老竇口風，暗示自己和 Sean有結婚打算。知情人士說：「趙世曾一直以為個女係搵唔到好男人，先會同 Sean玩玩吓，冇諗過佢哋會發展到呢個地步。」老竇唔首肯，趙式芝惟有先斬後奏，於今年 4月 4日與 Sean在法國小鎮一個教堂結婚，當日除有神父主持儀式外， Sean的不少親友都有在場見證。相比於趙世曾， Sean的家人十分開通，趙式芝和 Sean現時入住的大坑愛巢，亦是 Sean父親楊仁名下物業。
不過一家人始終切肉不離皮，難怪趙式芝出櫃同時，亦打定底說：「爹哋、媽咪唔想我主動去講，我以孝為先，會尊重父母，希望俾啲時間佢哋接受。好多謝父母用咁特別方法愛我。」
古舊教堂行禮
門當戶對
留言列表
{{ article.title }}
