我得寵：呂慧儀、醒目貓爭床瞓
呂慧儀不時把Tiger打扮得古靈精怪，難得是牠樂做模特兒。
呂慧儀鍾情小動物，兩年多前從朋友家領養了一隻英國短毛貓Tiger，難得連老公黃文迪（Dickson）也愛屋及烏，十分痛錫Tiger，一家三口樂也融融。醒目貓Tiger最愛跟主人爭床瞓，如被拒於房門外，牠會發老脾怒吼。 撰文：王崇穎
香港寸金尺土，令不少香港人既想養寵物但怕不夠空間予牠們活動，以往曾養過狗的呂慧儀（長腳蟹）依然屬愛心一族，向來鍾情小動物，兩年多前難得領養了一隻英國短毛貓Tiger，她回想當日和Tiger結緣的經過：「嗰時朋友屋企隻貓生咗成五隻貓仔，所以我就領養咗一隻，以前都有養過狗，不過比較麻煩，因為要成日帶佢出街，咁貓比較方便，佢哋好愛乾淨，所以打理上比較簡易，而且我又成日開工怕少時間陪寵物。」
Tiger小時已相當討人歡喜，難怪呂慧儀對牠愛不釋手。 
在家中Tiger有私人吊床，看牠睡覺時也特別招積。 
呂慧儀和老公Dickson一樣愛錫Tiger，一家三口樂也融融。 「識聽我哋講嘢」
長腳蟹直言當日手抱個多月大的Tiger回家時，感覺似生了小朋友一樣：「當時一收工就要返去照顧佢，又要餵佢，好彩老公Dickson都有幫手照顧，大家輪流照顧，諗番起都幾開心。」長腳蟹大讚Tiger懂人性，更不時與她聊天，她說：「佢成日都會同我哋講嘢，我哋遲返屋企佢就會鬧我哋，好大聲咁長喵喵聲，有時我哋入廚房佢又知道會有嘢食都會叫，啲語氣好似叫我哋快少少咁，好搞笑。」
平時不用開工，長腳蟹多數留在家陪貓咪，更經常與牠談話，她說：「佢真係識聽我哋講嘢，講乜佢都知，有時帶佢出街叫佢去屙屎佢都會去屙，佢識sit、hand hand同stand up，佢知道做乜嘢動作會有嘢食，我都冇專登去訓練。」
長腳蟹表示Tiger真的似人，甚排斥同類，故一直想為牠添個伴，她說：「佢本身真係好獨立，之前同其他貓相處都係自成一國，佢好似覺得自己唔係一隻貓咁，唔會理其他貓，好高傲但對人就好好，完全唔覺自己係貓。有時都會上床同我哋爭位瞓，唔畀佢入房佢就會喺門外大叫，佢根本就當自己係人。」
長腳蟹對Tiger愛護有加，更大讚牠十分乖巧，問到會否為牠配種，她即表示早已為牠進行絕育手術：「好耐之前有為呢個問題煩過，但生咗搵人養又係麻煩，所以就做咗絕育手術。」
呂慧儀經常買玩具給Tiger，玩到攰便睡在地上休息。 早絕育更長壽
會否覺得愛貓太慘，長腳蟹說：「佢從來都冇歡樂過，如果歡樂過先閹仲慘，覺得自己雄風不再，家唔畀佢知乜嘢感覺咪仲好，而且絕育會令佢更健康同長壽。」
眼見不少人因各種因由拋棄小動物令長腳蟹堅持做個好主人，她表示將來自己懷孕到生小朋友亦會對Tiger不離不棄，她說：「佢一向同小朋友都相處得好好，更加唔會對小朋友出爪。」原來閒時長腳蟹更會帶牠到沙灘曬太陽，她說：「佢成日都會出街，有時買嘢會帶佢出去，又會帶佢去黃金海岸曬太陽，佢又唔係好怕陌生，更加唔會四周走。」
Tiger死穴怕大狗
萬千寵愛在一身的Tiger雖然愛出街，但當呂慧儀拿起家中一個寵物箱時，Tiger反而掉頭走，她說：「有次用呢個箱帶佢去醫院洗腎結石，好多貓都掛住玩好少飲水，住咗一晚醫院之後佢就好怕，以後都唔敢再入呢個箱，怕再去醫院。」
除了怕入寵物箱，Tiger最怕大狗，長腳蟹說：「試過喺出面有隻大狗好想同佢玩，但嗰時佢細所以好怕，隻狗又當佢係玩具咁同佢玩，仲想用口叼佢，嚇到Tiger即刻爬上我頭頂。」長腳蟹相信當日五隻貓仔中能選中Tiger絕對是一種得來不易的緣份：「嗰時其他幾隻真係好活潑，我觀察咗Tiger好耐，睇到佢都幾乖，加上佢係咁多隻當中第一隻喵我，我當然揀佢。」
Tiger
品種：英國短毛貓
年齡：2歲
性別：雄性
留言列表
{{ article.title }}
