單人訪
官人我再要 邵音音
邵音音原名倪小雁，她的而且確像一隻雁。
「一定要跟大隊飛，一離群就會好孤獨、好危險。其他動物會食你，獵人亦會傷害你。」
她說得血淋淋，皆因試過離群。被騙拍風月片，她忍；被誣告做間諜，她躲；被褫奪尊嚴，她逃。馬來西亞住過，美國住過，最後還是回到香港來。
「既然去到邊都避唔開人言可畏，我就返到去最人言可畏嘅地方，睇下自己會點死！」
三十四年前的《官人我要》令邵音音紅透半邊天之後身敗名裂；今天惡搞《官人我要》的《低俗喜劇》卻狂收超過二千萬。
青春少艾遭人唾棄，鶴髮雞皮反而人人愛戴，這是甚麼道理？
「以前我成日想快啲死，等自己可以再投胎做人。依家電影圈肯重新俾機會我，我唔捨得死喇!」
這不是叫生命有 take two；這叫留得青山在，苦盡甘來。
怕乜講粗口
這兩個星期邵音音很忙，每隔數天便要戴着假髮到旺角謝票。粗口橫飛的《低俗喜劇》上畫三個星期收了二千多萬，絕對是逆市奇葩。
「人類讀書，就係希望有文化，就係希望唔好低俗；依家既然有人肯攞錢出嚟玩，做件咁有心嘅事，我講幾句粗口有乜所謂？」
邵音音口中「咁有心嘅事」，外人看來，可以是諷刺電影人的辛酸；對她來說，卻別有一番滋味在心頭。
「電影收得，觀眾又鍾意我，終於覺得自己係一個有價值嘅人。我已經俾人遺棄咗三十幾年，邊諗到今時今日居然有部戲由頭到尾不停咁講邵音音？當年《官人我要》我俾人搞到一鑊泡；今日俾人認同又係因為《官人我要》，世事諷刺到咁，所以我好信命運。」
邵音音為七十年代邵氏當紅女星，全盛時期一年拍十六部電影。在描寫邵氏女星《百美千嬌》一書中，她被形容為「性感女神」。
只拍到背脊
《低俗喜劇》邵音音飾自己，故事說她要重出江湖，但因年紀太大要借用 DaDa做替身。本專訪開版相便以此構思作設計，音音姐知道亦單眼配合，敬業樂業呀！
命運一直在跟邵音音開玩笑。
「我條命，直頭係坎坷呀！」
有幾坎坷？邵音音看見我眼神中的懷疑，點起根煙，慢慢說。她在香港出生，幼年隨父親移居台灣。少女時代的她純如蒸餾水，常被人讚靚，但一讚她就哭。
「啲人成日話：『你咁靚，捉你去做明星！』我聽到個『捉』字就喊，驚呀！」
在台中修讀護士課程，畢業後在輪船上當護士，七十年代初來到香港。朋友帶她參觀片場，遇上李小龍，李小龍一眼便看中她，叫她去試鏡。
「李小龍仲同我講：『你放心，有我一日，就有你一日！』點諗到佢會死？如果佢冇死，我條命肯定改寫，或者可以好似苗可秀咁好囉！但我都好感激李小龍，我係佢唯一一個介紹入電影界嘅女仔，只要今日仲有一個人肯寫呢件事，我都仲有一份光榮。」
邵音音簽了邵氏，還以「邵」字作為自己藝名的姓氏。只是人走茶涼，沒有人記得她是李小龍帶入行。 75年拍吳思遠的《十三號凶宅》，最後一場是出浴戲，有人對她說只拍到背部，她半推半就除衫，結果當然是謬之千里。
「梗係嬲，係我唔好彩。我信人，人哋當我係笑話，一句『鬼叫你傻呀？抵你死啦！』就可以算數。最慘係拍咗一部風月片後個個當我係壞女人，無正常電影搵我，我一係繼續拍，一係乞食。」
China Doll
今年賀歲片《我愛 HK喜上加囍》扮沈佳宜，我真係笑到流眼淚。
那個年代，她是絕對無可能回頭再做護士。父母離棄她，兄弟姊妹不認她，邵音音只好繼續做個當紅脫星。 78年《官人我要》爆紅，還參加了康城影展，她是第一個行康城紅地氈的華人女星。吐氣揚眉？錯了，她穿了一件紅色肚兜，外襯透明雪紡，美艷不可方物。只是，這件肚兜穿早了三十年。
「鬼佬寫我做 China Doll，中文譯做『中國娃娃』，台灣話點解唔係『中華民國娃娃』？死都要話我係間諜。」
她是邵氏女星，《官人我要》卻是她外借出去嘉禾拍的電影，當年台灣千方百計想打壓香港電影，正好拿邵音音出來借刀殺人。台灣給她開條件，只要從她口中供出《官》片到底是屬邵氏還是嘉禾，便封殺電影公司，不封殺她。她有義氣，死命不說。
「都唔算有義氣，我只係好嬲，你既然可以莫須有到咁離譜，仲想我爆大鑊？我爆又死唔爆又死，梗係唔講。」
她賭氣，因此含着一口寃氣，無端端當了幾十年「間諜」。她的電影進不了台灣，也無人再請她拍戲，只有去麗的電視拍劇及在海城夜總會登台。
「無綫要打壓麗的，又一個電話打去海城，話如果再俾邵音音唱歌，就唔俾羅文、甄妮、葉麗儀、葉振棠去海城。人哋好易揀啫，咪唔要我囉。其實大家都知我係好人，但無人夠膽幫我，怕俾我連累。」
一巴摑落嚟
《打擂台》打出了香港精神，也為邵音音再奪女配角獎。
說到這裏，我開始明白邵音音說的所謂「坎坷」。原來，更坎坷的事陸續有來。事業上她倒霉至極；私人感情上她嫁了去馬來西亞，我們都以為她生活快樂……
「以為離開香港後可以過簡單嘅生活，原來只要一日拍過脫戲，一世都俾人當你係狐狸精。本來有幾個傾得埋嘅女朋友，但俾其他人講下講下，會講到我同所有人啲老公都有路。有次紅十字會搵我哋班太太捐錢，其中一個太太無捐到，我知佢老公有錢，但佢自己無，我就講笑咁講：『嗱，我去搵佢老公捐先！』點知個女人聽完後，一巴掌摑落我塊臉度！我即刻流了兩行眼淚。呢班人表面幾 nice都好，原來心裏永遠對我有種睇法，我永遠無辦法融入正常人社會。」
她試過移居美國三藩市，最後還是回到香港來。
「只要有華人嘅地方，就有人戴有色眼鏡睇我。在美國不時有人請我去甚麼甚麼場合，不過當我係件商品咁俾人睇。既然去到邊都逃避唔到人言可畏，不如返嚟香港，留在最人言可畏嘅地方，呢度起碼多幾個朋友。」
乜都詐唔知
邵音音老公在馬來西亞從商，公司在香港租了加多利山二萬呎獨立屋讓她一家過活，豈料，又是一場空歡喜。她本來欲言又止，最後還是點了根香煙繼續說。
「呢個老公係自己揀嘅，因為我想有個家，有仔女，咁我都算有吖……夫妻相處之道？係忍，乜都詐唔知，即使老公帶埋個女人返嚟屋企住，都要當無事……」
我聽得瞠目結舌，這幾年記者只寫邵音音嫁得好老公，原來，一切只是我們看到加多利山豪宅之後的想當然。
「小三小四？十幾個都有呀！個女人同我哋同枱食飯，我個女一路食一路流眼淚，我就叫佢當乜都睇唔到。我唔同個女人嘈，同佢嘈咪即係抬高佢身價？」
被騙剝衫，可以當自己傻；被屈做間諜，也可以當自己黑仔；被好朋友兜巴星，甚至可以當自己交錯朋友。但丈夫公然帶女人回家，這怎能忍？
「佢依家咪同個大陸妹去咗馬來西亞囉！咁我又可以點？出面風大雨大，一日唔離婚，我仲有屋住，有司機有工人，仔女讀書也有人交學費。離咗婚，辛辛苦苦建立嘅家就散，我之前無戲拍，無謀生能力，點生活？」
丈夫早兩年退休，加多利山不租了，現改租又一村。邵音音依然有司機有工人，只是曾經滄海難為水，二千呎單位又怎樣比得上二萬呎獨立屋？
「最初都好唔捨得，畢竟住咗十幾年。以前間屋好大，樓上好多房，仔女喺外國讀書，基本上得我一個住。依家間屋雖然細，但仔女返咗嚟，行出行入一定見到，無咁冷清！」
無論如何，她有一對生性仔女。
「佢哋細個因為我都受過好大壓力，所以依家好堅強，亦好錫我。老公？大家客客氣氣，佢都有返嚟交租嘅。」
走出心魔
一個女人被褫奪尊嚴多年，連老公也要跟人分，我不敢想像她是怎樣活下來。慘事還陸續有來， 99年，她在家被電線絆倒，整個人撞向傢俬一角，右邊面傷至見骨，她硬着頭皮，自己報警進醫院。
「由始至終，我只喺下巴打過一針，當年醫生話下巴脹卜卜會好睇啲。所謂整容，就係咁多。塊面歪晒係因為受傷，但記者鍾意寫我整容失敗，鍾意寫我係『毀容女星』，咁咪寫囉，大家睇得開心，起碼我都叫做對社會有啲貢獻！」
聽說，邵音音曾自殺多次，她點點頭。
「可以用嘅方法都用過，可以食落肚嘅嘢都試過，但個天就係唔肯收我。以前我成日想快啲死，好再投胎重新做人；依家反而唔捨得死，希望自己身體健康，俾多幾年時間我陪下啲仔女。」
尋回生機，因為找回尊嚴。 08年《野•良犬》為她奪得金像獎最佳女配角，她在台上一把眼淚一把鼻涕，因為真的死去活來。
「對電影其實早已死心，亦已放棄等待，因為一直以為自己只會行衰運，唔會再有人俾機會。獎項對我好大鼓舞，原來無俾人遺棄，至少證明我係一個有工作能力嘅人！」
活到六十五歲，終於否極泰來。去年憑《打擂台》再下一城，她是繼葉德嫻、梅艷芳、金燕玲後兩奪女配角獎的演員。舞台劇也打她主意，早前高志森的《飢餓藝術家》便找邵音音演出。她演到激動處，全場流淚。
「以前好怕做訪問，因為又要揭番之前啲瘡疤，又要在我傷口上灑鹽。但依家唔再介意，因為已經走出自己嘅心魔。我發覺一直最睇唔起我嘅人，其實係我自己。」
難得的全家福。
更多時，只是邵音音與子女合照。
即使電影圈遺棄了邵音音多年，她一直替演藝人協會出力，為圈內人謀福利。問她再遇上當年騙她除衫的人有甚麼感受，她答：「當冇事囉，可以點？佢先唔當一回事，佢又唔係只呃我一個。就係因為我遇過咁多壞人，更加要留喺演藝人協會，我想保護俾人恰嘅人！」
成日都去殯儀館
訪問邵音音之前其實跟她有過一面之緣，那是今年年頭，我一位好友的爸爸過身，我在靈堂看見一身素服的邵音音坐在最前。好友說不認識她，應該是因為父親跟她同是山東同鄉，她代表同鄉會來鞠躬。
「我成日都去殯儀館，同鄉會即使唔識都去，我想俾啲下一代知，你爸爸媽媽生前好多朋友，多一個，就多一份尊敬。但有記者或明星去嗰啲一定唔去，費事俾人話我博宣傳！」
報紙寫的未必是真的，是真的又未必會寫。所以，我信我親眼所見的。低俗、抽煙、講粗口的邵音音，比很多衣冠楚楚的人更值得尊敬。
下期預告
留言列表
{{ article.title }}
