喬寶寶這天穿着中山裝，站在重慶大廈門口拍照，吸引了一眾本地人和南亞裔人士在旁看熱鬧，一下子，他彷彿變成了兩者融和相處的橋樑。

「都係o架！以前香港人只係會諗印度人用手食飯、幾日唔沖涼個身有陣味，但自從我出咗嚟之後，我解釋咗好多印度人嘅文化，我發覺大家嘅關係愈嚟愈好！」

然而，原名Gill Mohinderpaul Singh（喬．慕軒達保羅．星）的他，查實在港土生土長四十一年，只返過印度家鄉五、六次，逗留時間頂多數個月。「我唔慣嗰邊啲生活，你話去玩就得啫！如果你話長住，梗係香港啦！香港真係一個好地方，除咗住屋比較貴之外，一切都係perfect！

「不過我個仔天生脊椎有事，行動不便，又有過度活躍症，我老婆唔想佢喺香港讀特殊學校，我本來打算搬去內地住，等我個仔可以學好啲國語，但我老婆個特區護照唔批，上年惟有send佢哋去蘇格蘭住，我下年八月過埋去住三年……你問我十次想唔想走，我十次都會話唔想走！」

那麼，要是有人問到他是哪個地方的人，又會點答？「我喺香港出世，有香港出世紙，亦有香港永久居民身份證——雖然冇星，但我會答：我係一個香港人，印度裔，攞英國護照。」

我，同樣也是一個土生土長的香港人，同樣也愛香港，但見時下的局勢，卻很想移民去瓦努阿圖。

 

大球場

關於喬寶寶的香港故事，一切要從他的爺爺說起。聽說喬爺爺是個很有錢的人，在印度坐擁了等同十六個香港大球場面積的土地。

其實喺四七年，我爺爺喺印度幫個英國商人做嘢，識咗啲官員有啲平嘅農地lease畀佢，就係咁佢先有好多地，不過分到我哋呢代男仔，我都只係分到三個「大球場」。

後來爺爺跟咗個英國商人去上海，我爸爸就喺上海出世。爺爺本來都喺上海有地有樓有舖頭，但後來共產黨將佢所有嘢沒收晒，佢就揀咗落嚟香港，因為香港當時仲係英國殖民地。

點知嚟到，佢先發覺呢度九成人都係講廣東話，佢識上海話都冇用，見冇運行，就send咗我嫲嫲同老竇幾個仔女返去印度，佢自己就喺呢度搞啲所謂small business，到我老竇大個咗，就過嚟take over佢啲嘢，不過都失敗咗，結果就跟咗夏利里拉做咗十八年嘢。

我哋五兄弟姊妹，除咗大家姐喺印度出世，我哋其他幾個都喺香港出世，住佐敦嘅private housing，讀嘅都係南亞裔嘅私立學校，學印度文、英文同法文，所以細個嗰陣都係講印度文多。

三個月後，因為我日日都跟規矩着黑色襪，又準時，佢哋加咗我人工，每個鐘五個二。

洗廁所

喬寶寶說，雖然小時候的家境不算太壞，但始終一家大細都只靠父親這個經濟支柱，所以日常零用錢不多，想買心頭好，就惟有自己諗辦法。

我哋嗰陣返學，日日都係自己帶飯、帶餸、帶水、帶薄餅，屋企唔會畀extra嘅零用錢你。我每日就為咗慳嗰兩個幾，提早半個鐘出門，喺佐敦碼頭搭船去中環，然後就跑去掃桿埔返學，放學都係咁。

到我十四、五歲，我就喺屋企附近白加士街間麥當勞做part time賺零用錢。佢哋話我未夠秤，唔畀我做前線，就安排我去洗男廁、女廁同垃圾房；有時佢哋為咗要慳垃圾袋，就叫我出去lobby用丫叉壓垃圾，到真係full咗，就攞出嚟，伸個頭入去個垃圾桶度抹茄汁漬。

一歲時的他，眼仔睩睩。

十八歲的他，依錫克教傳統紮髻、包頭、留鬍鬚，典型的「阿星」look。

十九歲被父母安排盲婚啞嫁回鄉娶老婆。「我本來同緊個香港女仔拍拖，我仲為咗個女仔剪咗個髻，喊到阿媽死死吓！即刻安排呢場婚事！」

五蚊一個鐘，我每日放咗學就去四個鐘，禮拜六、日就做足八個鐘，做夠四個鐘，就會送一個包畀我食，我覺得已經係benefit，但因為hygiene問題，佢哋唔會畀我去休息室度食，要我去番廁所或垃圾房度食。不過三個月之後，因為我日日都跟規矩着黑色襪，又準時，佢哋都加咗我人工，每個鐘五個二。

到我讀完書，表哥就搵我幫手，去佢出入口公司做office boy、QC、clerk，朝早九點前返去開門，夜晚六點等所有人走晒閂門，千八蚊個月，唔夠用o架！跟住放工之後，咪又去做四個鐘Pizza Hut，禮拜六、日做足八個鐘囉！人工比麥記好好多，都成十七蚊個鐘o架！

一家四口，中間是大仔Inderpal Singh（印度豹．星），亦即是喬寶寶《衝呀！瘦薪兵團》中的名字，今年廿一歲，讀大學Year 2；而行動不便的細仔，今年則八歲。

唔想走

八九年，才十九歲多的少年喬寶寶，在哥哥和叔叔的推介下，投身了懲教署當二級懲教助理；同時間，在他思想傳統的父親安排下盲婚啞嫁，娶了一個跟同樣來自印度旁遮普邦的女人來香港。

我老竇驚九七，香港會歷史重演（共產黨執政），所以好早就幫我哋幾兄弟姊妹申請咗英國護照，仲安排咗我哋嘅婚姻，等我哋結咗婚之後，可以喺第二度攞居留權。我哥哥同二家姐就喺加拿大，我大家姐就喺英國，細妹就喺蘇格蘭。老竇、阿媽本來都plan咗我揀個喺英國或者加拿大嘅女仔，但我就揀咗個印度嘅結婚，雖然佢大我四年，但佢屋企本身有景嘛，印度人結婚，女方要畀嫁妝，所以結婚時佢畀咗廿萬我阿媽，喺印度擺咗三日酒，嗰十萬蚊（港幣），又係佢畀晒！

九七年，我全部屋企人都走晒去第二度，唯獨我唔想走，一來因為我唔捨得香港，二來我嗰陣已經轉咗做（懲教署）軍裝，份工已經係鐵飯碗，同埋老婆喺度都喺間印度公司做緊shipping clerk，搵錢同我差唔多，就係咁我哋一直留咗喺香港；直至○三年，我見香港好似淪陷咁，就send咗阿媽、老婆同大仔過去英國，老婆都係沙士之後先返嚟陪我，留番大仔同阿媽喺嗰邊住。

八九年加入懲教署當二級懲教助理，九五年轉做軍裝，守過石壁，見過林過雲。「佢唔鍾意講嘢，只會答你單字，好鍾意孤獨。」

兩首歌

○五年，當了二級懲教助理十六年的喬寶寶，由同事為他報名參加《殘酷一叮》，本來只以玩票心態參與的他，卻因此以唱到走晒音的〈愛情陷阱〉和〈Monica〉，意外地成為了第一季的台柱！

我嗰陣成日喺啲懲教嘅event度上台搞搞震，啲同事話個節目啱我，似William Hung（孔慶翔），咁咪上去玩吓囉！

我當時上去，只係諗住做個紀念，第時留番畀啲子子孫孫睇，同埋自己知自己事呀，唱功、拍子，乜都唔得嘅，點知贏完一集又一集，跟住成龍大哥套《寶貝計劃》又搵我casting，OK咗，我諗住請假拍，點知撞着世貿會議，話啲韓國農夫好猛料，全部紀律部隊都要取消休假，我阿head就話：「冇辦法，連署長都要返工，你要請假除非你辭職囉！」

喬寶寶說，剛播完的《衝》劇，是他入行以來戲份最重的一齣劇。

本月初，他投資了廿萬，跟朋友合股開單車舖，有錢就搵。

我返去同老婆傾偈，我話香港有個洋人叫河國榮，都可以撈咗十幾年洋人角色，如果南亞裔嘅角色，可能都會搵我呢，我老婆就叫我試吓，唔得嘅就去第二個地方住；第二日，我就遞信辭咗懲教份工。

我冇諗過，拍完《寶貝計劃》之後，無綫又搵我拍《高朋滿座》，同埋我嗰陣贏咗《殘酷》之後，竟然有好多好多活動、晚宴搵我去唱，多到我要推！試過最高峰時一日走七個場！全部我都只係唱番嗰兩首歌，五百蚊又接，一千蚊又接，就係咁，一年都幫我搵到超過一百萬！

所以話呢，香港，你勤力就唔怕餓親！呢度一定一定大把工！

當年參加《殘酷一叮》時，以胸毛剪了「TVB》字樣又唱又跳，老婆被他嚇到在電視機旁大叫！

我係喬寶寶 我唔識中文

畢竟在香港土生土長，所以喬寶寶其實自小已經懂得聽和講廣東話：「我哋學校冇中文學，所以細個時啲廣東話，都係靠同隔籬鄰舍傾偈學番嚟，半桶水，啲grammar會錯，例如問人『你去邊？』，會講成『你邊度去呀？』，係到做懲教署時，啲廣東話先愈嚟愈好。」那粗口又如何？「好流利同埋都幾押韻吓！哈哈哈！」

但至於寫和睇中文，他還是很差，睇劇本要靠寫英文拼音（可惜訪問當日沒有在身）；寫呢，他只會寫「喬」。「個『寶』字太多筆劃好難學呀！」

 

 

然後我在紙上寫下「我唔識中文」，以及他在《衝吧！瘦薪兵團》內的角色名字「印度豹」，着他摹寫一遍，他邊寫邊笑：「最易寫係個『印』字呀！一個E加個P就係！」我差點嘔白泡。

接着，我要他教我印度文。原來，平日我們所講的「阿差」（acha），是印度鄉里的口頭禪。「即係『係呀！』、『係呀！』咁嘅意思，大家同鄉見到面時，一定會講！」至於「阿星」這個暱稱，音本來自印度文的「singh」。「呢個係錫克教所有男教徒最尾嘅名，意思係獅子；女錫克教徒呢，最尾嘅名都係『Kaur』，意思係公主咁解！」

我明了，我明了！即是以後跟印度人講解獅子山，可以叫做「singh山」；講公主病可以叫做「Kaur病」。