做唔到斯文靚女嘅嘉欣，都識做G.E.M.嘅招牌金魚嘴動作，望落兩個又幾似樣喎！

博セ呀 政府打壓二次創作扼殺創意，想再改圖惡搞都要諗清楚，鍾意左抄右抄嘅TVB劇亦分分鐘中招。高官無能，好在《耀舞長安》晚晚有「舞優」鍾嘉欣同JJ等女神低胸跳中國舞，估唔到成班《耀舞》成員，喺微博都好識得惡搞創作，扮金魚嘴又黐鬚又戴假髮，好過睇立法會班議員拉布啦！

鍾嘉欣　風騷chok姬
喺《耀舞長安》入面做cool爆舞優卞玉嫣嘅嘉欣，戲服幾乎係全劇最性感，加埋魔鬼身材，搶過晒另一女主角胡杏兒多多聲！劇接劇冇停手，好在嘉欣上月放咗個長假，有得返溫哥華同屋企人過生日，叉足電嘅佢零舍醒神，不停喺微博擺鬼馬樣，連G.E.M.嘅金魚嘴都扮埋，又同緋聞男友伍允龍隔空調情。事業愛情都得意，抵佢風騷！

賈曉晨　黐鬚扮男
同大隻仔沈震軒拍拖嘅JJ賈曉晨，喺《耀》劇有出浴鏡頭鬼咁sexy，現實中JJ亦好識氹粉絲，除咗有大量索相，又會扮鬼扮馬，JJ仲會夜麻麻着住浴袍自拍！嘩，引死人咩！

胡杏兒　隔岸宣傳
自從上年做咗視后，有價有市嘅杏兒多咗返內地拍劇賺人仔。上面好食好住好服侍，杏兒成個人都隨和晒，會同助手一齊食飯，又同班演員打成一片，全無一姐架子！人在內地，好在杏兒十分識做，不時會擺《耀舞》劇照或與同劇演員搞鬼合照放上微博，咁識幫公司宣傳，下屆要冧莊做視后唔係冇可能！

馬賽　黐仔緋聞
之前同巨聲幫大孖周志文傳緋聞，搞到俾正印CoCo插爆嘅馬賽，多次澄清自己唔係第三者。清者自清，馬賽完全唔避忌，除咗將自己同大孖喺《名媛望族》入面嘅結婚相放上博，之前同港男翟威廉拍嘢又黐埋玩，小心又俾人傳喎！

歐陽震華　引狗上床
唔再係親生仔嘅Bobby，間中先幫TVB拍劇，其餘時間一係北上拍劇賺人仔、一係就同老婆周圍飲飲食食歎世界。唔憂做嘅Bobby，最近鍾意將愛犬Happy嘅得意相同粉絲分享，但出名搞鬼嘅Bobby，同狗狗合照當然都交足戲惡搞啦！ ####

 


上月生日嘅嘉欣，有麥長青特製鬼馬生日咭祝壽。


早前以百萬續約詩琳美容，嘉欣狂做運動操靚個body拍廣告，夠晒專業！


嘉欣一向唔講感情，但前排緋聞男友伍允龍有新戲拍，嘉欣竟然高調恭喜對方！唔通打算公開戀情？


JJ幫自己張靚相黐鬚，仲話自己係男人，小心嚇親大隻男友沈震軒喎！


話晒做過宅男女神，JJ呢個浴袍look肯定冧死班粉絲。


化咗個受傷妝嘅JJ，披頭散髮又着住白裙自拍，嚇鬼咩！


黑超古裝


近排喺大陸拍劇搵人仔嘅杏兒，着晒古裝但戴黑超，係咪拍得TVB劇多，玩穿崩先？


杏兒同王君馨（右）拍《耀舞長安》做咗好姊妹，兩個仲搵紙巾塞鼻扮流鼻血，好鬼馬！


杏兒喺新劇做大肚女捕快，究竟經手人係咪身邊其中一個壯男？


馬賽之前返大陸拍《名媛望族》，佢啲粉絲日日送食物畀佢，搞到變肥賽，仲將個鬆弛熊頸枕放喺頭頂，錯配晒喎！


馬賽同港男翟威廉去惠州拍特輯，兩個一齊踩一架單車咁親密，小心又傳緋聞！


㩒住張LV被嘅Bobby，個樣似係扮瞓自拍，反而隻狗仔識望鏡頭，醒！


戴咗假髮拍戲，有頭髮嘅Bobby即刻後生咗十年！

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄