17/1 讀設計的何超雲，出街打扮總一絲不苟，男友陳山聰手執的手提袋，與超雲的短褲亦襯到絕。

拍拖將近一年的何超雲陳山聰，去年底再次同到英國過白色聖誕，食瞓玩兩個幾禮拜，又開心又長肉！有指山聰已成功坐穩何家，近日三太更將手持的大潭億元物業雅栢苑，重新裝修讓二人共築愛巢。有愛情滋潤，但同樣要型要靚的超雲，近日捉埋男友到修身堂減肥；為投女友所好，山聰放棄昔日跑步keep瘦習慣，改陪女友瞓低做機，而為數過百萬的減肥使費，全部由三太埋單。

一百分男友
拋棄糟糠，成功追到賭王三房千金超雲的陳山聰，對外界指責，置若罔聞，二人神速發展，拍拖將近一年，日日糖黐豆。「Florinda（超雲）其實有唔少富二代追，不過識咗Joel（山聰）之後，佢就好似中咗降咁，喺班朋友面前，讚到男友天上有地下無，我哋都感覺到，佢今次唔係玩玩吓！仲成日話Joel對佢好唔同，無嘢瞞佢又夠細心，以前未試過有人咁錫自己。Joel的確成日為Florinda製造驚喜，尤其係啲特別日子，Joel都好上心！Florinda覺得同佢一齊好有安全感！」超雲身邊友人說。能夠成功俘虜年輕自己十三年的何家千金，情場老手陳山聰冧女得心應手，加上以前做過設計師助手，與同樣讀設計的超雲特別啱嘴形，更共同擁有購物狂性格，拍拖後，山聰甚至將個人衣著打扮，交由女友話事。「Florinda幫男友襯嘅打扮都幾大膽，透視裝、蛇皮、豹紋統統擺上身，Joel完全無異議，仲賣口乖話依家自己好fashion添，超雲有乜辦法唔冧爆！」

英國食肥
要做潮界雙煞，都要有完美身形，但自從月初由英國返港，兩人身形比之前再脹一個碼，近日便有人目睹超雲與山聰，每天到位於尖沙咀的修身堂減肥。「可能拍拖特別開心，超雲比以前肥咗廿幾磅，山聰仲離譜，腰圍有成三十六吋，巨躉更加無所遁形，超雲貪靚係人都知，英國返嚟之後咪逼男友同佢一齊去修身堂減肥囉，以前山聰鍾意跑街，只要做吓運動實瘦得番，但超雲要做機減肥，山聰為咗陪女友，於是一齊去做機，話兩個人一齊無咁悶！」知情者說。

一起吹脹的日子
何超雲與陳山聰拍拖一年，日日出雙入對，有愛情又終日食嘅好飲嘅好，二人身形亦齊齊發福。

三太遙距監控
近日有指陳山聰與何超雲已搬入三太持有，位於大潭的億元物業雅栢苑，該單位正進行後期裝修，雖然未坐正做何家女婿，但早已成功登堂入室的山聰，大部分時間，都會留在三太布力徑大宅陪女友。「大潭雅栢苑喺正布力徑大宅隔籬，三太專登安排超雲搬去嗰邊，方便睇實個女，萬一兩個自己搵地方搬出去，到時山高皇帝遠，睇唔實仲唔放心！」三太身邊人說。為討女友歡心，山聰除了是超雲的「Yes Man」，就連三太以至賭王，山聰都氹得掂。「最初三太的確有反對佢哋拍拖，覺得山聰背景唔好，又有咁多負面新聞，但係個女鍾意，仲刻意將戀情公開，都係想屋企人接受，三太眼見山聰對超雲咁體貼，都有些少改觀。何況女大女世界，三太見個女唔係玩玩吓，知夾硬嚟冇用，唯有接受，佢唔想超雲又玩失踪！」

重色輕友
有望成為何家駙馬，陳山聰不惜孤注一擲，放棄電視台的演藝事業，早前拍新劇《天梯》時，便經常遲到早退拖累劇組，完全不將與無綫仍有兩年合約的事放在眼內。「超雲好易呷醋，講明唔俾男友近啲女同事，以前同山聰玩開嘅伍姑娘、陳敏之、湯盈盈，全部都冇再聯絡，拍《天梯》嗰陣，佢當正自己係賭王女婿咁，成個人迷晒，乜人都睇唔上眼，大家坐埋開飯，佢寧願做孤獨精都唔一齊食，只係暱埋煲電話粥。」知情者說。要做何家人，陳山聰守何家規矩，當然不可輕舉妄動。 ####

 
從後看陳山聰的水桶腰加巨籮，難怪要密密做機減肥。

 
細心體貼的陳山聰，超雲行一步都扶到實，好識冧女友。

 
發現有記者追訪，陳山聰與何超雲刻意走狹窄又污穢的後巷上修身堂。



 
6/1 月初，超雲與山聰由英國返港，即火速到修身堂減肥，為二人吹脹的身形救亡。


陳山聰寧願曠工都陪超雲四出玩樂，二人拍拖後更秤不離砣，戀火愈燒愈烈。


拍《天梯》時，陳山聰與一眾演員，甚至對手戲最多的高海寧無兩句，經常一個人企埋一邊做孤獨精。


在英國期間，山聰超雲不停上載照片晒恩愛。


有望做何家駙馬的山聰，已經融入賭王世家，甚至可留在布力徑三太大宅內留宿。


日前超雲與山聰一同出席活動，以一身金襯黑打扮，被指甚有周啟邦夫婦影子。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄