「時代雜誌」年度人物，為全球示威者。佔領運動，香港亦有，天寒地凍，仍在獅子銀行地下駐紥，抗爭到底。雖然港人對「地產霸權」咬牙切齒，但「金融霸權」形容空泛，加之全港在行內搵食，人數達廿二萬，一竹篙打一船人，自然難獲共鳴。忽爾殺出一句「打倒資本主義」，只會令人想起北韓，心寒至極。盲目控訴「1%/99%」貧富懸殊，也是不必，世上富人，也有取之有道者，而如蓋茨夫婦、巴菲特，掀捐獻之潮，更為雅事。控訴金融霸權，釐清毒在何處，才能得到支持。

強積金投資僵化，市民的退休金慘變銀行和保險公司的「糧倉」。

銀行公我贏字你輸

炒股炒樓，贏就風光，輸就眼光光，自負己責，何罪之有？真正問題，是「公我贏，字你輸」的金融機構，只是手段異常高明，搵完笨都唔覺。鬼佬金融股股東，必定感同身受：賺錢年度，八成利潤分花紅，用以獎勵「人才」；蝕錢難關，B仔照嚟，美其名為挽留精英。夥計買遊艇，股東則負責「坐艇」、供股。金融股的股東，仿效佛祖割肉餵鷹，可惜好心難有好報。一眾內銀，「為人民服務」，股東除外，不在話下。

政府一想監管，銀行即化身烏坎村民，血書「冤」字哭訴。銀行永恒的論據，是監管會減低銀行槓桿，無錢借予實體經濟，營運生意，可中小企從來非銀行服務對象。上市公司，借幾十億閒過立秋；中小企，借幾百粒慘過去乞。銀行坐盤炒賣時，資金卻源源不絕。咁缺水，點解唔賭細啲？

金融海嘯之起，就是眾銀行明白「大到不能倒」之理：一係唔賭，一係賭到地球咁大。賭得細，贏咗都無癮；賭得大，才能贏得大，花紅才夠勁，出事時，自有政府獻身相救。要立法禁止銀行唔賭，難過登天：銀行富可敵國，大把錢游說國會，政客難違金主之命，自會設法暗中阻攔。幸有伯南克，雖為書生，卻非百無一用，出手抑制，智取不力敵：推出「扭轉操作」，沽短債買長債，壓平孳息曲線。銀行借短錢，買長債的利差大減，提升炒賣難度，盤房盈利急降，縮減規模，銀行方肯借錢予實業。原理就像連炒牛熊證都無錢搵，散戶才會馬死落地行，返工搵食。

戒買金融股自保

本地金融霸權之最，則首推強積金。之前本欄也講過，推行十年，大部分股票基金，回報竟然跑輸月供盈富（2800）、國指ETF；供款唔准買金、唔准儲人民幣、澳洲紙、唔准直接買債、iBond（4208）、唔准用作買樓首期，連患末期疾病，都不准提取全部資產。敢問市民退休儲備，何故慘變銀行、保險公司糧倉，連所謂「半自由行」，都要研究、研究、再研究？

要抵制金融霸權，瞓街並非上策。首要一着，是戒買金融股，保妥身家，勿再無辜受損。其二，勿再接觸銀行任何衍生產品，自保之餘斷其糧道。其三，各師各法，務求改革強積金。快錢難賺，銀行才有望改邪歸正。