創業通
當一架私家車報銷後，破舊的曲軸、車胎、軚盤等，除了送到劏車場當廢鐵外，還有其他選擇嗎？在創意無限的設計師手上，廢鐵也可以重生成為精美又實用的產品。像今年28歲的阿基，09年與30出頭的Telly及2位拍檔，兼職成立ATB Auto Art，打環保社企的旗號，將廢棄的汽車零件製成每套過萬元的高檔傢俬，深得車迷和中產人士喜愛，現時月賺約3萬元。
記者相約到阿基及Telly的工場內做訪問，甫進內便見有兩套枱凳，阿基叫記者試坐由軚盤造成的凳，記者坐後表示並不很舒適，阿基聽後笑着說：「好多客都係車迷，見到張凳由軑盤造成，即刻要訂，唔會理坐得舒唔舒服，呢款凳好受歡迎。」工場內還放了一批新製作完成的茶几、椅及燈等家具，全部走重金屬路線，原來這些家具的組件，有不少來自Audi、BMW等的名牌車的曲軸、break碟等零件，「有客人撞車、維修或換車，會將唔用嘅零件交畀我哋造傢俬；亦有車廠搵我哋用舊零件整枱凳做展覽，好似面前呢一set，就係幫BMW整。」 ATB的工場，其實位於一所西貢的村屋內，2樓由Telly租住，3樓則是創作大本營，場內四圍散落無數油漬斑斑的汽車組件，「我哋收咗啲汽車零件返嚟，會研究點樣組裝，砌件傢俬出嚟。所以即使做同一款凳，因為每次零件唔同，可能會有所不同。」他們想好設計概念後，便找師傅組裝，這亦是ATB社企概念的一部分，「我哋會同車行合作，將零件交畀車行師傅組合成傢私，幫助一班面對行業式微嘅金工師傅。」每套傢俬包括1張枱及2張凳，按需要的零件及造工的複雜程度，收費3萬至4萬不等。由預訂至起貨，需時1個月，屬限量產品，每月只能生產約2至3套，加上售賣其他由汽車零件製成的座地鐘及枱燈等，扣除所有成本，月賺約3萬。
瞄準汽車廢鐵商機
過往搞環保工業，主要將回收的廢料重新製成原材料，但近年不少設計師反其道而行，直接用廢料「升呢再造」成新產品，《創業通》以前介紹過banner布料袋、不織布人字拖、鋁罐機械人等均屬成功例子。同屬理大出身，及任職設計師的Telly和阿基，看準了廢鐵再造的商機。「喺09年，我哋有次經過九龍灣嘅車房，見到條鋼條好靚，我哋問啲師傅係咩嚟，同埋拎去邊，佢哋話呢條係汽車嘅曲軸，仲話會搬啲零件上車攞晒去掉。我哋後尾上網查過，全香港每年有8千萬噸廢鐵俾人丟棄，當中有唔少係嚟自私家車，其實啲汽車零件好靚，丟棄太浪費，於是開始計劃用嚟設計新產品。」 Telly等人反覆商量後，認為用汽車零件造傢俬非常可行，「所有齒輪、車軸等都係由精鋼製造，非常堅固，清除鐵鏽之後，好適合做傢俬。」於09年開始，他們走訪新界的劏車場，物色汽車廢料，「最初我哋唔知價，畀成近1千蚊先買到一支Audi車軸，後來去得劏車場多，同負責人熟咗，2百蚊就買到一竹籮廢鐵，裏面立立雜雜，有唔同嘅汽車組件；亦有同屬社企嘅豐盛車房合作，可以平價搵到寶馬、法拉利等貴車嘅廢棄零件。」
客人Cherry
08年我喺一個循環再造的家具展認識Telly，因為我先生係香港小型賽車錦標賽冠軍，我哋都好鍾意啲汽車零件傢俬，覺得好有品味，我哋買咗套車軚凳連枱，雖然價錢高，但作為一件藝術品都物有所值。
尋找車行師傅代工
舊車零件是精鋼所造，極度堅固，當要進行鑽孔及焊接時，他們必須找車行師傅代工，「我哋行勻全港，先搵到間有技術、又肯支持我哋個環保理念嘅車行合作。但有啲師傅未必明我哋個設計，所以成日要去師傅度同佢哋溝通。試過到咗起貨期，有位師傅連人帶零件唔見咗，要走上門先搵得番，原來佢因為造唔切套傢俬而玩失蹤。」他們是創業初哥，不少產品因應客人意見而修改設計，「試過有客人喺屋企做家務，唔覺意撞跌咗張枱打爛塊玻璃，我哋先發現張枱嘅底部要擴闊先企得穩；又有客人買咗張枱唔夠一星期就話生鏽，原來佢個菲傭用水清潔張枱，搞到生鏽，我哋除咗上門幫佢除鏽外，仲提醒客人，保養傢俬只需掃塵及用碧麗珠清潔。」傢俬產量少，他們主打中產及車迷客，Telly說：「朋友介紹我去寶馬會等車會，及小型賽車場等車迷聚集地，車迷圈子細，好快將產品傳開，原來好多約30歲嘅中產車迷對汽車嘅upcycle傢俬有興趣，客人男女比例大概6：4，以單身人士或情侶為主，家庭客反而冇乜。因為鋼鐵傢俬，的確唔係幾適合有細路仔嘅屋企，但未婚或年輕夫婦，會好捨得花錢買。」
參加比賽增加曝光
雖然在車迷圈子內揚名，但市場推廣做得不足，結果頭一年ATB並無利潤，幸好他們去年11月參加了由中大舉辦的「社會企業挑戰賽」(HKSEC)，並順利勝出，除得到約20萬元的獎金外，最重要是大大提高到知明度。「今年3月贏咗比賽後，多咗好多機構搵我哋搞展覽會，4月BMW請我哋去佢貨倉搵舊車零件造傢俬，要嚟做展覽，仲舉行埋慈善拍賣，籌到約3萬蚊。」現時ATB經已成為各大社企展、環保展、家品展，及大學和中學講座的常客，幾乎每月1次，展覽收益每次約1萬元。此外，HKSEC更經常邀請Telly和阿基出席商務酒會，帶來新客源，「透過酒會，有室內設計公司向我哋訂家具做裝飾；亦有銀行同我哋訂約3百個相架做紀念品，相架係由一班車衣女工縫製嘅汽車座椅皮，及回收極力子片製成。」見參加酒會有成效，未來Telly打算照辦煮碗，增加客源，「嚟緊2月，我哋會喺中環舉行一次酒會，收約$200入場費，畀唔同公司嘅人碰杯傾偈，相信入面會搵到我哋target嘅公司同中產客。」
開業成本
租金：$9,000（2按1上）裝修：$10,000 材料：$10,000 機器：$15,000 物流及雜費：$1,000 總計：$45,000
每月收支
租金：$3,000 物流：$1,000 人工：$30,000（4人）師傅代工費用：$7,000 營業額：$70,000 盈利：$29,000 ATB網址：http://atbautoart.com
社會企業挑戰賽
阿基和Telly於去年11月參加由中大舉辦的「社會企業挑戰賽」（HKSEC），當時ATB已營運1年多，比大部分的參賽隊伍有更多實戰經驗，加上產品可為客人度身訂做，非常具獨特性，令他們順利勝出比賽。成為勝出者能得到約20萬獎金外，最重要是學懂何營運一盤生意及增加知名度，「入面有一班專家，教我哋搞社企嘅技巧，令我哋識得計算同控制成本，唔會一味講環保。其後我哋多咗好多展覽機會，吸引唔少客人搵我哋合作，成功回本。」
社會企業挑戰賽
舉辦日期：每年約11月至3月參加資格：3年內就讀指定大專院校（包括進修課程）的學生查詢：3493 1967 ####
ATB的工場設於西貢的村屋，工場內擺滿汽車曲軸、齒輪、極力子等零件，阿基和Telly會研究用各款零件製成傢俬，如圖中他們正構思用汽車座椅皮來製造座枱燈。
零件經由阿基及Telly初步處理後，便交由車房師傅改製成傢俬。
由車頭燈改裝成的座地燈，售$15,000。
座位的軟墊是由汽車座椅拆下的皮，再交由製衣廠女工縫製而成。
茶几及凳都是由車鈴、曲軸及齒輪等部件組成；茶几的玻璃部分，則是外購的強化玻璃，1枱連2張凳，售3至4萬。
套裝枱凳，可換上軚盤凳，由於外形突出，十分受車迷歡迎。
枱中央位置可以着燈。
Telly用引擎零件，加上亞加力膠及強化玻璃，製造精美的辦公枱，及用上汽車坐椅來造凳，枱連2張凳約售4萬。
ATB現時除透過網站售賣傢俬外，還四出參加展覽宣傳。
創作比賽勝出後，Telly經常出席各大酒會，尋找新客源。圖為12月參加的慈善酒會。
Telly最近和阿基研究用極力子片製作相架，這款相架售$200至$300不等。
阿基（左1）和Telly（右1）勝出比賽後，令ATB提升了知名度。
留言列表
{{ article.title }}
