被形容為《那些年》中年版，劇中林依晨同陳柏霖已經三十出頭，但成日想當年，校服look亮相當然唔少得！

由林依晨陳柏霖主演嘅偶像劇《我可能不會愛你》啱啱播完大結局，收視口碑雙贏，最近有網站舉行年度最佳電視劇選舉，《我可能》更擊敗由隋棠擔正嘅另一套話題作偶像劇《犀利人妻》。

 

絕世好男人
收視好，除咗因為「金鐘視后」林依晨預告停拍偶像劇，為明年到英國遊學做準備，最重點係《我可能》嘅劇情，被視迷解讀為中年版《那些年》，令人睇得更加投入。劇情講女主角程又青（林依晨飾），同李大仁（陳柏霖飾）讀中學已經認識，因為李大仁講過，唔會鍾意程又青，兩個自此成為超級好朋友，直到大家30歲，程又青準備要結婚，先知道李大仁一直暗戀自己。柯景騰單戀沈佳宜，睇住愛人結婚了唔能夠大團圓結局，觀眾將《那些年》對男女主角嘅遺憾，伸延到《我可能》，同樣响劇中飾演情癡嘅陳柏霖，守護林依晨15年，結果抱得美人歸，陳柏霖一夜間成為絕世好男人。

儲定學費
02年陳柏霖憑電影《藍色大門》一炮而紅，可惜再冇代表作，之後同混血名模Mandy Lieu拍拖，陳柏霖開始爆肥事業插水，直到舊年分手，終於重新投入工作，開製作公司做老闆，並回歸台灣再拍偶像劇。鹹魚翻生，但陳柏霖堅拒接拍電影版《我可能》：「手邊有電影還在拍，接着會在北京、台北當戲劇製作人，一切只會按照計劃進度走，除非是原班人馬。」事關女主角林依晨為咗學好英文到英國讀書，預告明年只會有限度工作，更加唔會有期拍電影版《我可能》，原班人馬演出絕對有難度。呢排密密出席公開活動，賺定家用同學費嘅林依晨，透露啱啱考完國際英語水平測試（IELTS），如果順利過關，最快明年年底出發到英國讀書，離開之前會拍一部電影同出碟，賺多一蚊得一蚊！

小S大肚撐花心老公
已經唔係第一次，小S老公許雅鈞又傳背妻偷食，新目標係年僅20歲嘅模楊晴，早排仲俾人影到同遊上海。貌似鍾嘉欣嘅楊晴，台灣知名度相當之低，但有許雅鈞帶挈，成為上海伴遊之餘，仲有機會出席時裝活動，以零知名度獲安排坐第一行VIP靚位。慣性偷食，仲要老婆小S大肚6個月，許雅鈞作反明明證據確鑿，但小S繼續死撐：「我不會生氣，反正就是被陷害了！」至於外母，亦力讚女婿為人：「他人很 nice，沒有做那些吃人家豆腐的事。」更幫口解釋許雅鈞、楊晴當日獲邀出席同一個活動，住同一酒店一齊落樓食早餐冇咩大不了，但問題係，記者查到上海嗰單時裝活動，品牌幕後老細其實係許雅鈞本人，所謂同楊晴一齊「獲邀」出席，一聽就知係大話啦！

陳喬恩年度衰人
早排有國內網站舉行公開投票，選出圈中年度著衫品味「達人」同「衰人」女星。結果顯示，由近年積極現身各大歐洲時裝品牌活動嘅范冰冰，以高票率成為品味「達人」第一位，緊隨其後有舒淇同湯唯。至於品味「衰人」，由黃奕大熱勝出。坦白講，無須黃Wyman上身，一樣睇得出黃奕品味出晒事，強姦名牌事小，傷害觀眾眼睛事大；至於第二名，係國內新晉花旦王珞丹，多位時裝界達人一致認為佢著起名牌唔似明星，白費設計師心血；至於第三位，係來自台灣嘅偶像劇一姐陳喬恩。近年主力北上拍劇拍電影，升呢上位唔使再拍胸圍廣告谷人氣，點知有衫著，反而出晒事，鄉土娘味太重係致命原因，有名牌加身都冇用。聽聞陳喬恩一直努力鑽研品味哲學，可惜天資有限，陳同志仍須努力。 ####


《我可能不會愛你》成為話題偶像劇，男主角陳柏霖鹹魚翻生，準備出國讀書嘅林依晨，收山作亦總算有交代！

 


劇情講林依晨要出嫁，陳柏霖唔敢表白，冒雨去女方屋企樓下寫紙仔祝佢幸福，林依晨見字即喊，聽聞觀眾比佢喊得仲犀利。


《我可能》收視口碑好，帶旺林依晨成為廣告新寵，擔任護髮用品代言人，更罕有地露出事業線！


同Mandy Lieu拍拖後無心工作，陳柏霖仲要爆肥，家陣失戀先識發奮，不過佢話已經成年冇去香港，唔想再踏足傷心地喎！


一個人孭起成頭家嘅林依晨，出國前除咗爭取時間多啲陪媽咪，講明會搵定成年家用，等佢飛都飛得安心啲！


老公慣性偷食，小S亦慣性撐到底：「這樣陷害別人，到底可以賺多少錢？」


上海時裝活動上，奀模楊晴居然有資格同台灣名模李岳潔（右）一齊坐VIP第一行，仲有皮草著，奇！


上海之旅，楊晴同人夫晚晚留响酒店唔出街，許雅鈞平日愛蒲愛玩，去到上海先嚟轉死性，我唔信！


娘味重，陳喬恩根本無能力襯得起呢條MARC JACOBS紅裙，攞得第三名，算佢好彩！


唔使多講，睇見黃奕呢身打扮，攞冠軍，實至名歸！

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄