佈道會歷時兩小時，單單是關心妍講見證的環節已有 45分鐘，其間她不時眉頭緊皺，情緒非常投入。
娛聞樂 關心妍
講見證爆娛圈黑幕 關心妍：啲人想整死我
關心妍早前於港台頒獎禮慘食白果，事後她於微博暗示要退出樂壇：「再努力最終都失望！只希望今後好好過我楊太的生活。」
其實關心妍 09年嫁人後，原本疊埋心水造人，由於當時唱片公司和歌迷多番游說她繼續唱，令她改變初衷，但無奈努力與收穫不成正比。
據知對樂壇心灰意冷的關心妍，近日部署轉行做傳道人。周日（ 3日），她到上水出席佈道會時，吐出多年來的不快經歷。她眼紅紅說：「啲人想整死我。」
入行 11年，經歷過不少風浪的關心妍，於今年 1月舉行的港台頒獎禮空手而回，令她對樂壇意興闌珊。周日，她到上水北區大會堂出席佈道會時，忍唔住炮轟：「娛樂圈好黑暗，好複雜，有時要出賣自己同出賣人，好容易迷失自己。」
坐滿 200人
關心妍為教會義務出席的見證佈道會，於北區大會堂舉行。雖然規模極小，場地只能容納 200人，但大會依然印有場刊。
講到眼紅
提到自己於娛樂圈種種不公平待遇時，她頓時雙眼通紅，情緒激動。
自+嘲+死+唔+去
她自爆入行前已受某唱片公司高層挖苦，她說：「由細到大冇乜嘢叻，叫做得把聲。於是我好似人哋搵工咁，整咗 30份履歷，寄去好多唱片公司，泰國、菲律賓都有，總之有人肯覆我都制。終於有一間覆咗，係國際公司，旗下有張惠妹嘅。嘩！我好開心咁走去見，點知嗰個人同我講：『你唱就唱得幾好嘅！但你咁矮，又咁嘅樣，又冇 model身材，你都係返屋企啦！』」輾轉之下，她 99年簽約 BMA，足足等了三年才有碟出， 04年更於紅館開個唱。
奈何當時她慘遭同公司的周麗淇打壓，搞到冇得翻身。此時她開始兩眼通紅，哽咽地說：「隻腳未企得穩，啲人就要做瓜我整死我，好似一夜破產！啲人喺街上見到我，好似當我生蝨咁！之後就返咗大陸唱酒吧騷，一邊唱歌，台下一邊十五、二十，好難受。原來撻落嚟真係好痛。」她坦言 05年至 08年是她人生的低潮期，當時她走去做義工，經常提醒自己自強，「好好彩，我係一個死唔去嘅歌手。我今年話唔再參加頒獎禮，因為覺得比賽好冇意義，浪費咗好多光陰。」
溫馨放狗
關心妍和老公楊長智結婚四年，關一直希望可以為楊家繼後香燈，據知二人現時正努力造人。上月 24日，本刊便拍得二人在寓所附近放狗，十分溫馨。
導老公信主
作為虔誠基督徒的關心妍，另一半當然也要是基督徒。關心妍婚前經常帶楊長智返教會，導他信主，現時二人逢周日就會孖住返銅鑼灣教會。
曾+為+情+自+殺
近年頻做義工的關心妍，佈道會上自爆捐錢俾一名兒童做手術。去年她榮獲了香港十大傑青。
關心妍除了道盡歌手背後辛酸外，更自爆年輕時曾誤入歧途，她說：「我 10歲移民咗去加拿大，冇人冇物，唔知生存喺呢個世界上做乜。讀中學嗰陣識到一班壞同學，教我食煙飲酒又逃學。當時我覺得呢班朋友就係人生寄託。」她更曾為初戀情人而自殺，她激動地說：「嗰時我嘅身形係依家 1.5倍，竟然識到一個少少似古天樂嘅男仔，心諗個天乜咁益我呀！我哋一齊考上大學，但有一日佢突然同我講話放眼世界，要飛咗我。嘩！我人生冇晒方向，攞咗一樽安眠藥，好似電視橋段咁成樽啪落去，死咗去算。但嗰一刻我阿哥拍我房門阻止咗我，呢個應該係神蹟。」
成為基督徒已有 13年的關心妍，近年於樂壇屢遭挫折，加上丈夫楊長智屬金融界才俊，佢即使冇嘢撈，生活也不愁。據知她計劃轉行傳道，於不同規模的教會講見證，將唱歌變成副業。
周一（ 4日），記者就佈道會上的說話問過關心妍，她緊張地說：「咁娛樂圈真係比社會其他行業複雜，但具體真係唔想講。（係咪諗住全職傳道？）我未有資格，做傳道人要讀咗神學學位課程先，不過我有興趣讀。（唔再唱歌？）歌我會繼續唱，但依家我唔再參加頒獎禮。」
衰事一堆
02年出道的關心妍，雖然入行首年就攞新人獎，可惜無以為繼，其後衰事接二連三，認真運滯。
轉捧周麗淇
04年，唱片公司 BMA將關心妍到日本受訓片段俾有線播放，令她無辜俾無綫封殺半年。同年底， BMA更力捧周麗淇，關人氣急跌。
搶獎𤓓爆
關心妍 08年於無綫頒獎禮上，誤當關菊英的獎是自己，竟然搶去關菊英的獎，事後關心妍就辯稱幻聽。
港台食白果
今年 1月，一心靠〈失戀哲理〉食糊的關心妍，出席港台頒獎禮時坐足全晚，連一首金曲都分唔到，令她萌退出念頭。
佈道會爆大鑊
娛樂圈藝人教徒眾多，他們更親身在佈道會上講見證，大爆自己鮮為人知的秘密。
蔡少芬爆險流產
曾經歷小產的蔡少芬，去年尾於佈道會上，大爆懷第二胎期間，胎盤撕裂兼大量出血，險失胎兒。
鄧萃雯自爆做小三
鄧萃雯去年於佈道會自爆後悔做過「小三」。早前她更自爆會再開佈道會講《金枝慾孽（貳）》時患情緒病的經過。
留言列表
{{ article.title }}
