Red Dead Redemption 邪惡左輪　西部版 GTA @ 娛樂八掛大放送★

點解《 GTA IV》咁受歡迎？因為玩家可以喺遊戲入面，殺人放火有條金腰帶之餘，仲逍遙法外，人性真邪惡！今次《 Red Dead Redemption》就避一避衞道之士嘅抨擊，將背景搬到西部牛仔年代，繼續可以做濫殺無辜、打劫銀行、攤敵人喺路軌等火車輾過呢啲瘋狂行為，好恐怖，我聽見都作嘔。記者：阿洛

強化背景互動性放大圖片
■西部牛仔嘅浪漫，單對單槍戰。

■西部牛仔嘅浪漫，單對單槍戰。

呢隻《 Red Dead Redemption》來頭唔細，係由 Rockstar聖地牙哥工作室開發，擺明係《 GTA IV》嘅西部牛仔版；遊戲採用同《 GTA IV》一樣嘅 RAGE引擎開發，不過畫面就更加強化，更加細緻。同時，動作模擬引擎 Euphoria Physics更可令人物動作，與身邊物件、動物等互動性大大加強；除了人類之外，如主角騎嗰隻馬、流浪狗、野生鹿、蛇、狼、豹、獅子等，都會有逼真嘅動作同反應，等各牛仔去親親大自然，體驗打獵嘅樂趣，不過打獵之後，記得拎動物啲毛皮去賣，值錢 o架！

金盆洗手唔抹手放大圖片
■強勁模擬動作引擎，就連馬仔嘅反應都好真實。

■強勁模擬動作引擎，就連馬仔嘅反應都好真實。

故事背景設定喺 1911年，雖然當時已經有車、有飛機，不過佢哋喺遊戲中完全唔會出現！頂籠都只有火車。古仔講玩家係已經金盆洗手嘅「有背景」牛仔 John Marston，殺人放火金腰帶好多年之後，決定為過平靜生活而引退，點知 3年後，聯邦政府調查局（ The Bureau of Investigation， FBI的前身），為了獵殺主角昔日嘅夥伴，以阿 John老婆仔女嘅人身安全，威逼佢重返西部荒野，面對昔日好兄弟同敵人，睇嚟阿 John支左輪都有排忙。

做個出色的牛仔放大圖片
■呢個場面好有 Feel，好似我細個睇嘅牛仔廣告。

■呢個場面好有 Feel，好似我細個睇嘅牛仔廣告。

遊戲世界裏面嘅一日，就等於現實世界兩粒鐘，操作方面，會繼承《 GTA IV》嘅系統，玩開嘅應該好易上手。而特殊技方面，呢隻 Game就有「 Dead-eye」神槍手系統，又係玩慢動作俾你慢慢瞄，而隨住遊戲進行，玩家更會學到更多唔同技能，好似連環鎖定幾個目標咁。今次除咗表現牛仔浪漫風格嘅左輪手槍外，仲有超過 13種武器，包括機關槍、散彈槍、獵槍、狙擊槍等，而且仲有斧頭、刀、繩索等埋身武器。話明玩法似《 GTA IV》網戰當然亦係主打，最多 16人參與，可以組成 8人幫派蝦蝦霸霸，進行生死鬥、幫派戰或搶旗仔之外，又可以群體狩獵，真係歡迎你哋嚟到呢個「慢煲路」嘅世界。

放大圖片
■可以體驗牛仔喺夕陽下決戰嘅情懷。