每月14萬支出郭可盈林文龍坐食山崩忽然1周 771期 @ 娛樂八掛大放送★

罕有外出
林文龍及郭可盈誕女後甚少外出。 1月 16日林文龍陪老婆到中環倪淑慧診所檢查，當時郭穿上鬆身裙遮掩粗腰。"
娛樂頂點
每月 14萬支出　郭可盈林文龍坐食山崩
2010年05月07日
去年 5月，林文龍偷食事件爆發，郭可盈出面力撐老公，今年 1月更為對方誕下女兒林天若，兩夫婦雨過天青。之不過感情問題解決，卻輪到經濟問題要面對。
一向搵錢能力遠勝老公的郭可盈，去年懷孕後一直停產，現時又專心湊女。去年，林氏夫婦放售手上的物業減輕供樓壓力，而原本打算 3月復工的林文龍，自從去年偷食事件後，人氣下滑，內地工作驟減。
記者連日採訪，發現郭可盈足不出戶，全程湊女，女不離手。而林文龍則戮力上網及皺晒眉傾電話。每月開支 14萬，兩夫妻冇工開坐食山崩，林文龍唔惆悵就假。
自從誕下女兒天若後，林文龍兩夫婦為湊愛女，甚少出街，尤其是郭可盈，更可謂有女萬事足。而一心想追多個 B的郭可盈，一早已經揚言生女後唔再拍劇，只會選擇性接廣告。老婆為湊女自斷米路，搵奶粉錢重任惟有落在老公林文龍身上。

郭可盈當日幫襯的倪淑慧醫生，甚多明星客，徐濠縈及陳慧琳也是其常客。

林文龍更帶埋個女到診所打針，看他小心翼翼拿着 BB籃，甚有廿四孝老竇風範。

形象插水遭壓價
出身富貴之家的郭可盈，雖然去年已經賣出一號銀海的單位，由每月供樓十多萬變為月租 6萬元清水灣松濤苑，以減輕老公林文龍壓力，但無奈養 B連家庭開支每月要 14萬，單靠積蓄過活唔係辦法。所以個多月前，林文龍已經努力搵 job，但礙於他去年 5月被爆偷食大陸女星董維嘉，形象插水，不僅被壓價，拍劇機會亦大減。
知情者話︰「其實去年 7月林文龍陪產前接嘅最後一套劇《美人心計》，已經淪為男配角（主角乃陳鍵鋒），仲俾劇組壓價兩成幾，不過佢見個女就嚟出世，惟有屈就接拍。文龍呢兩個月都好積極聯絡大陸導演，搵多啲機會，但暫時都未有適合工作，唔係片酬傾唔掂，就係要長駐大陸太耐，始終個女啱啱出世，佢想多啲時間陪個女。」

4月 21日谷 C奶未修身
雖然已生女 3個多月，但據知郭可盈不急着修身，皆因她目前依然餵人奶，每天仍狂灌鮮奶及木瓜湯，所以胸部勁升至 C cup，腰及臀亦比以前豐滿了不少。

換片手勢好
看林文龍的換片手勢，十分純熟，難怪他自誇換片手勢媲美陪月。

赤膊通屋走
林文龍偶爾會赤膊上身通屋走，連月來全職湊女沒健身的他，略現肥腩。

女兒天若出生時，林文龍將溫馨全家福照廣發傳媒，郭更笑言：「女兒眼睛及鼻子似老公，嘴巴則似我。」

足不出戶湊女
自從天若出生後，林文龍與郭可盈每天 24小時全天候湊女。早前林文龍在電台訪問中，話女兒令本來已經深閨的兩夫婦，變得更足不出戶︰「我同可盈依家街都唔願出，有日夜晚我哋出席朋友生日 party， 8點鐘到 10點已經想走。朋友唔放人，最後搞到我哋要唱歌贈興至可以甩身。」
所言非虛，記者連日觀察，林文龍與郭可盈不但自閉家中湊女，更連朋友或家人也甚少探訪。兩星期以來，郭可盈不但沒有外出，更女不離手，從未假手於菲傭。每天早上 9時許，待女兒飲奶後，郭可盈會先抱女兒到下層的客廳，然後菲傭就會到樓上嬰兒房打掃。

4月 15日各有各忙
記者連日觀察，郭可盈在家不施脂粉，又穿着 T恤、短褲，終日女不離手，屋內的菲傭只負責打掃，從未見抱過個 B。至於林文龍則不停上網，睇嚟是搵工心切。

女兒下午睡午覺，可盈為怕太陽光太猛烈，便立即關上窗簾，十分細心。

愁爆煲粥
當日，林文龍上網後便不停打電話，差不多是一個接一個，足足攞住電話狂煲 1小時。

去年，郭可盈為無綫拍完《富貴門》就收山不再拍劇，安心養胎。不過， 40集的《富》劇仍為她帶來 80萬的收益。

緊張消毒全屋
「可盈係個緊張媽咪，為咗個金叵羅，佢買咗部二萬幾蚊嘅吸塵機，每日叫工人為囡囡清理牀鋪，所有嬰兒嘅用品都要日日消毒。佢又怕工人唔乾淨，所以唔俾佢抱個女。佢又話香港空氣差，所以冇乜事都唔會帶個女出街，就連大霧啲佢都會閂窗開空氣清新機，總之就好緊張啦。」知情者透露。

4月 24日提愛女冧爆
林文龍為老婆買完麥記午餐後，記者趁他上車前訪問他，他亦冧爆大談湊女經。

去年 7月，林文龍拍大陸劇《美人心計》不但減價客串，由二萬元降到一萬五千元一集左右，對手仲要係內地三、四線女星張彤。

當日林文龍買完報紙、午餐，便匆匆返家，百分百住家男人。

認暫未開工
前周六（ 4月 24日）中午 12時許，林文龍駕車到西貢市中心買午餐，有咗子女負擔的他，沒有大魚大肉，只是到麥記買包當午餐。談到女兒天若，他即流露慈父相，心情靚爆。
記︰咦！得你一個嘅？
林︰係呀，可盈喺屋企，我出嚟買嘢俾佢食。
記︰有冇幫手湊女呀？
林︰有呀，我哋一齊湊，依家好熟手 o架喇！換片我好掂，簡直係專業陪月，哈哈！
記︰依家囡囡有幾重呀？
林︰成 17磅喇，依家 3個月都要着半歲嘅衫，佢好得意呀！（笑不攏嘴）我成日同佢影相 o架，仲買定好多相簿裝佢啲相。
記︰可盈修身未，幾時出番嚟拍劇？
林︰佢都係湊住女先。
記︰咁你開始復工未？
林︰劇就未喇，都有啲工作傾緊。
記︰兩個都未正式復工，會唔會好吃力？
林︰唔會，我一路都有嘢做緊。
記︰聽講可盈為咗囡囡，將成間屋日日消毒咁滯。
林︰佢第一次做媽咪係緊張啲，但我仲緊張過佢，個女一喊我就忍唔住要抱，唔捨得佢流一滴眼淚。
林文龍認冇工開，而郭可盈的經理人吳小姐亦表示：「可盈今年唔會拍劇，依家有廣告傾緊，但未落實。」

去年 5月尾，林文龍與郭可盈開記招，為林偷食大陸女星董維嘉（下圖）解畫，雖然一段偷食聲帶依家未能解疑團，但兩人就強調「感情非常非常穩定」。

十月，郭可盈宣布懷孕 5個月兼停產，而林文龍亦不時陪伴左右晒恩愛。
每月開支 14萬

林文龍月租 6萬的松濤苑獨立屋，樓高三層，面積 2,200呎，另有花園 300呎。

每月開支
租金連管理費　$60,000
水電雜項　$4,000
傭人× 2　$8,000
全家生活費　$20,000
供車及油費（三部車）　$30,000
囡囡奶粉及雜費　$10,000
囡囡保險（林文龍自爆）　$10,000
一個月總開支　$142,000
08至 09年收入
未發生林文龍偷食事件前，林文龍與郭可盈於 09年共賺 386萬，好天搵埋落雨柴，難怪林文龍近日要急搵工開。
林文龍
《法證先鋒Ⅱ》 30集/1萬　 30萬
內地劇《晚九朝五》 25集/2萬　 50萬
內地劇《得寶》 34集/2萬　 68萬
內地劇《美人心計》 2集/1.5萬　 3萬
共： 151萬
郭可盈
《富貴門》 40集/2萬　 80萬
內地護膚品廣告　 75萬
剪綵活動 10次/8萬　 80萬
共： 235萬
賣樓打個和
郭可盈夫婦 07年以 1,760萬將西貢匡湖居單位放售，勁賺一千萬。 05年一口氣以 2,727萬買了兩個銀海一號單位，曾一度成為樓蟹。 09年賣樓套現 3,005萬，帳面賺 278萬，惟減去百多萬裝修費、律師費等，實則打個和。
銀海一號
件件名牌
郭可盈與林文龍一向新聞多多，至去年可盈懷有身孕，二人形影不離，不時出動晒恩愛。自年初囡囡天若出世後，二人更一同停工湊女，寶貝女大晒，難怪件件用品都係靚嘢，大部分購自荷花。