 面對面紅與黑 蘇永康紅與黑二色，其實可簡單概括蘇永康的 27年星途。 加上 02年在台灣發生的勒戒事件，更險置萬劫不復。 總之 44歲的蘇永康，輸少已當贏。 Paco（黃柏高）同我講『其實有幾個傳媒阿頭都叫我放棄你，但係我為啖氣死都唔放！』 佢哋話『蘇永康冇得救，黃柏高你救得番，我批個頭畀你坐！』」 最後以 64票輸掉「叱咤樂壇我最喜愛的歌曲大獎」；雖敗猶榮的一役，獎得不到， 至少真的做到不失優雅姿勢好，贏了體面。 一日未離枱，你唔好同我計數住，我未輸晒㗎！幾年前我做訪問時都講過呢番說話， 嗰位記者在後記度寫『係嘅，未離開賭枱都唔應該同你計數嘅， 但其實你覺得你仲有冇籌碼呢？』，咁我 o依家喺度當答咗佢呢條問題！」 可以套用電影《 Ocean's Thirteen》的對白，「賭我輸的人，最後輸得更慘！」 昨非今是 人生只要時來運到，本來荊棘滿途的路，也可以走出一條康莊大道，而經常處低的蘇永康 則更清楚天時地利人和的重要。「我在人和方面一向都準備好，由 Big Four我一路俾人睇到， 蘇永康已經回復狀態，如果唔係，你認為東亞會搵我咩？」 85年獲新秀亞軍入行的蘇永康，本來在 98年憑〈越吻越傷心〉創出事業高峰， 可惜後勁不繼， 02年甚至發生涉嫌服食及藏有搖頭丸，於台灣被捕並接受勒戒， 差點身敗名裂。「如果係 90後嘅人，都唔會忘記我發生過咩事啦， 因為已經變咗學校教材。『嗱，小朋友唔好掂毒品呀，唔係就好似蘇永康哥哥咁㗎嘞！』」  去年 11月蘇永康在紅館連開兩場《蘇永康給那誰的演唱會 2011》， 除了有老友 黄偉文幫手搞形象，另一好友容祖兒亦擔任嘉賓表演。 「 03年我做完小交響樂團 show同安仔一齊開嘅『安康』演唱會， 就發現在香港再冇我嘅空間， 04年我離開咗香港，返內地拍咗 130集戲， 又好彩有幾隻國語歌可以搵吓食。」也許蘇永康命不該絕， 04年他避走大陸， 當作韜光養晦。「 04、 05年我一邊拍緊戲、一邊調整緊自己個磁場，當時我好混亂， 經過勒戒事件、離婚，香港傳媒界又對我有好多蜚短流長，加加埋埋自己心理都唔平衡。」 「我記得 04年在橫店拍劇，見到啲細路仔喺度賣一啲一睇就知過期嘅花生、酸奶， 我問啲劇務『佢哋唔使讀書嘅咩？』原來因為內地一孩政策，有啲小朋友冇戶口就冇書讀。 內地貧富懸殊在湖南新化縣就特別嚴重，湖南有湖南衞視，搞個《超級女聲》請我哋過去， 又唔會左慳右慳，用 80萬人仔請周杰倫、王力宏，孫燕姿收 100萬又肯畀 100萬！ 一個咁有錢嘅城市有咁有錢嘅電視台，但點解一離開條公路，就係爛泥地、 周圍嘅人冇鞋着？見到呢啲嘢，就覺得『蘇永康你好慘咩？』，起碼我都有飯開， 我幾倒楣都好、幾臭名遠播到企喺條街唞氣都係錯、甚至俾傳媒界寫到好差， 我都起碼有收入有飯開，我都唔算好弊啫，只係遇到低潮。」 蘇永康在 8月 10及 11日舉行《蘇永康弦愛交響夜》為雁心會籌款，打算在湖南修建第 4間小學，「希望趁個暑假，間學校又好彩未冧前重建，等班小朋友返學就有間鋪石屎牆、 用玻璃鋁窗造嘅學校。」   我未窮過 〈那誰〉在 YouTube點擊率已過 400百萬次，先後奪多個至尊金曲獎，惟「叱咤」 頒獎禮敗於胡夏的〈那些年〉。 06年他成立「永康國際慈善基金」，先後在湖南開辦了 3間學校，而最新目標是在 8月兩場 伊館演唱會為雁心會籌款，除了在湖南開辦第 4間學校，部分善款則捐贈懲教署資助更生 人士完成學業。「以往我淨係在內地開學校，因為 10年我做 Big Four之前，基本上我在 香港唔使交稅，我都冇咩收入。咁 Big Four之後，加埋舊年個天跌個禮物畀我，我覺 得唔好淨係顧內地，香港人又肯畀番機會我企番上舞台，我都好應該放番啲資源在香港， 咁最好就放在更生人士身上，因為我都係更生人士吖嘛！」  08年蘇永康在 Paco支持下復出香港樂壇，至 10年 9月約滿金牌大風後過檔華星唱片， 「 Paco見我在 Big Four之後行得返轉頭，之後入咗東亞，佢都同我講呢個係一個好嘅選擇。」 《蘋果日報》圖片 05年蘇母發現患癌，及時就醫獲救，此事令蘇永康感受更深。「當時我工作量唔多， 但又唔知點解又預留咗筆錢，各方朋友又幫手，當時劉培基先生一知道，就介紹咗個醫生畀我， 好快媽咪個病就醫好咗，我哋真係好好運。……其實上天冇欠我任何嘢，點解我有生路行嘅？ 話唔定我個人唔係太壞呢？我連沙士嗰年（ 03年），大家都冇生意時，我都簽到國際公司 入環球，大半年冇生意，只係做咗個『安康』演唱會，我同許志安加埋每人有 80萬歌酬， 跟住環球又畀咗張 80萬 cheque，原來沙士嗰年我都可以有百幾萬收入。 「人可以山窮水盡，感謝上天，我未窮過！唔講遠就講我 Big Four兩個兄弟，張衞健 07年 幾乎破產咁滯，要賣樓賣田；梁炳（梁漢文）就唔使講啦，直頭連車都俾人拖走埋。但我 起碼未窮過先，咁樣已經足夠要我填滿『感恩』兩個字。」 逆轉勝 03年蘇永康與結婚 4年的新加坡女友馮麗清離婚，現任女友 Anita任職名店 JOYCE高層， 與時裝精蘇永康一拍即合。《蘋果日報》圖片 伏蟄至 08年，蘇永康簽約金牌大風再次復出，但真正打出最漂亮的一記逆轉勝，扭轉劣勢的， 則是去年一曲捧獎捧到手軟的〈那誰〉，甚至乘勝追擊的在紅館辦了兩場的《蘇永康給那誰的 演唱會 2011》。 「〈那誰〉係一首好有觀眾緣嘅歌，仲要係好怪咁在網上面爆出嚟，在『叱咤』佢都只 係攞第８位，最後有機會同〈那些年〉爭一爭。（去年）十一月差唔多攞獎嘅日子， 公司同我分析戰況……同事話『我最喜愛歌曲』應該係〈那誰〉同〈那些年〉叮噹馬頭， 聽天由命啦！當時我諗好耐冇上叱咤台，仲有機會攞『我最喜愛』喎，我開一開心， 突然心花怒放咗一下，當時我睇中一架 300幾萬、許晉亨先生都揸緊嘅車， 已經準備做 mortgage。嗰日我一邊揸車返香港（島）入緊隧道，突然諗起『貪嗔癡』三個字。」 「〈那誰〉其實係天跌落嚟嘅禮物，我冇諗過有咩成績……當初我只係諗住派隻歌就算， 點知佢會有幾百萬點擊？又點知佢喺卡啦ＯＫ會爆？本來由冇到有，你又想由有變多， 仲唔係『貪嗔癡』？我即刻諗到架車，你係蘇永康咋喎？你揸架許晉亨嘅車， 會唔會高攀咗啲呢？佛教有個名詞『攀緣』，即係人會無止境追求物慾， o依家我揸緊架車好差咩？我一出隧道，即刻打電話話唔要架車，而獎你畀咩我就要咩， 乜都唔諗人即刻鬆晒！反而後來在港台，Ｙ先生（ Wyman）就激動咗啲，我係不痛不癢。 如果件事係嚟早５年，我一定好多嘢講，兼一定諗『仲唔到我』！黐線！邊有到你㗎？ 個世界都冇欠你！ 「可能蘇永康會再遇多次低潮，人生無常，我好喜歡《洛奇》，洛奇由一個小混混 打到世界拳王，第一集打平手、第二集佢贏咗，跟住每一集遇到嘅對手都比佢強， 佢唔會放棄，同埋懷住一個謙虛嘅心去面對，佢最犀利係永遠在裁判喊到十時企得番起身。 我都有機會再跌低，但係裁判喊到十之前我一定企得番起身！我一定得，我相信我自己！」  02年蘇永康與台灣女星安雅在台北被指涉嫌服食和藏有搖頭丸被捕，被判入獄強制勒戒 11天， 前程嚴重受損。《壹週刊》圖片  蘇永康、許志安、梁漢文和張衞健於 10年組成 Big Four開 show，「事前大家傾好咗咩都平均 分四，大家咁高咁大，好多事就會易商量，減少爭拗。」《蘋果日報》圖片 別怪他 在訪問前，我從同行口中得悉蘇永康脾性難測，而好兄弟梁漢文更如此形容他：「我覺得佢 以前冇咁容易發脾氣，呢一、兩年容易咗。」害我在一個半鐘的訪問裏，如坐針氈。 「我唔會無緣無故發脾氣，我第一次發脾氣應該係 Big Four在仁濟第一次出場。我哋排完 隻舞第一次出街，仲有 5分鐘要 stand by，我同梁炳見臨出場想 mark多次舞，但嗰兩個 （許志安、張衞健）去咗食煙，我走出去講埋粗口鏟佢哋『仲有 5分鐘要開波，仲食煙』！ 第一次 on air，你哋可唔可以緊張啲呀！佢哋就死死氣掉咗枝煙入嚟排（舞）， 但上台前我攬住佢哋 say sorry。我會發呢啲脾氣囉，做朋友一定要係咁，唔係點做 一世兄弟？」一個願打、幾個願捱，而我們旁人認真就輸了。 |
全站熱搜
留言列表
{{ article.title }}
