區瑞強將自己的結他分為三類型，第一，是心儀已久或是買不起的；第二，是功能結他，主要是做騷及錄音用；第三是玩票結他，沒有什麼特別作用。

話明係「民歌王子」，結他當然是區瑞強的好拍檔，他的結他藏量超過廿支，當中以木結他為主，不過他唔會齋睇唔用咁嘥，「等如架車擺得耐唔行都死啦，所以我盡量每支都會彈。」而且每支都有段古、幾十年歷史又有，是五十七歲的他最佳拍檔。

買平嘢
區瑞強的結他藏量超過廿支，對一個收藏者來說，數目不算多，不過他說自己並非收藏者，「雖然我一世人都係彈結他，但我唔係collector，有啲人好鍾意結他，乜都買，買嚟收藏、甚至乎trade in，但基本上我所有嘅結他都係有需要先會去買。又或者以前好想有，但而家先至出現，又或者有啲牌子我以前買唔起、係夢寐以求，而家會買番。」由於並非收藏家，所以他的結他價錢都不會太貴，最貴的都是二萬多，「我個concept係唔會玩物喪志，你俾一支一萬蚊同十萬蚊嘅結他我，但我可能揸住支幾百蚊嘅結他都彈得好好聽，音樂講個感覺，就係咁得意，唔係要樣樣玩到貴、玩到靚。」而他的第一支、彈得最多的一支結他，是屬於他哥哥、一支值三十五元的紅棉牌國產出品的結他，「我嗰時係五年班，因為哥哥夾band，佢出咗街就擺咗支結他喺度，枱頭有幾本歌書，你見到佢彈得兩彈，自己咪走去試囉，咦！原來真係可以彈到隻歌個喎！」一邊自學結他，直至中五，他幾經辛苦，才正正式式擁有自己的結他，「嗰陣時係中三，咁我教得結他，都要有個靚靚哋嘅結他㗎！大佬！因為以前我喺尖沙咀讀書，行落嚟加拿芬道，有一間通利琴行，嗰支結他擺咗喺最高嗰格櫃，拉埋、鎖住！好靚喎！我儲錢，兩至三年後，最終買咗，同埋嗰支結他得一支，最驚俾人買咗，係巴西製造，約一千蚊。」

有段古
除此之外，他現在擁有的一支Martin廠出品的結他，原來都有一段古。三十年前，何守信太太陳麗斯讓了一支跟現在這支一模一樣款的結他給他，但就比這支高一級，價錢過萬，後來給當時的寶麗金監製方樹樑借去錄音，但遺留在的士上，區瑞強曾登報尋結他，但最後當然是音訊全無，「佢自己出盡佢能力，買咗支低一個model，即係呢支，平啲賠番俾我，都係靚嘅，呢支都要六、七千啦，到咗而家都係好珍貴。」另外，他亦曾經借過一支限量版結他給鍾鎮濤，結果亦令他非常肉痛，他笑着說：「佢阿媽住喺我樓上，有一日佢嚟我屋企搵我，『喂，Albert我去夾band，聽講你有支限量結他，我想試吓。』咁就借啦，返到嚟就變咗咁（花咗），點解呢？因為我唔用pick囉，佢哋彈band、彈rock，就好鍾意掃，佢唔知㗎，不過而家可以講，或者唔係佢、或者係第二個，但其實結他同書一樣，係唔應該借俾人，我當期時好肉痛，而家算啦，係戰跡嚟。」刮花的表面傷痕，尚算其次，如果儲存不當，音色或外形走樣，這才是重點，特別他所儲的大部分都是木結他，因此保養是極其重要的一環，「我好多擺喺studio，公司要開住冷氣，喺屋企就會擺喺衣帽間，因為我衣帽間都係長年開住冷氣。前排我拎晒啲結他出嚟，見到有啲好慘，因為潮濕，有啲長年冇保養、保養唔到少彈係一個原因，其實越彈得多係越好，如果木嗰啲古典結他係冇得tune，咁就要抆晒啲線，擺佢幾個月，搵啲重嘅嘢責番直佢。」

黑膠收藏
除了結他，黑膠唱片亦是區瑞強另至於他的黑膠碟收藏，只限於自己的唱碟。他由八十年代開始加入香港電台做DJ，直至現在仍有主持節目，多年的DJ生涯，以為他一定藏量驚人，而且應該有很多外邊買不到的白版碟珍藏，殊不知拍攝當日，他帶來的都是自己曾推出的黑膠碟，「以前所有嘅黑膠碟，我幾乎都應該有過，因為唱片公司未賣之前，都會俾一個sample我哋，嗰啲叫派台碟，因為冇design，個面係白色，我哋叫做白版碟。嗰陣時電台可以話係『冇掩雞籠』，後來仲有人專業偷碟，拎出去賣，sample碟，有晒簽名，有錢都買唔到，嗰陣時我做完節目就走，啲碟都『自動蒸發』，未必一定偷，借呀、攞呀，咁我橫掂都唔係由零開始，都儲唔到，咁由佢囉。」區瑞強雖說可惜，但再有機會，他說亦未必收藏，不過最重要、最有紀念價值的，例如第一張唱片《This is Albert Au》、有三十萬銷量的《陌上歸人》等，當然有幾張看門口，因為這都記錄了他與他老拍檔的民歌生涯。 ####


區瑞強推出的第二張英文唱碟《Home coming》，唱片封面的結他是他四十年前第一支付錢買的結他。


中二時，區瑞強在學校拿着同學的結他練習。


區瑞強的第一支古典結他，購自尖沙咀加拿芬道的通利琴行，當時價值一千二百元。


英國結他王Eric Clapton與美國著名品牌Martin合作推出的結他，價值二萬多。


這支Chetatkins型號的Gibson結他是限量版，鍾鎮濤借完夾band後傷痕累累。


學校舉行民歌比賽，身為學校導師的區瑞強（左三）上台表演，同台還有商台DJ盧業媚（左二）。


這就是方樹樑買來補償給Albert的Martin結他，但就比陳麗斯（圓圖）轉讓的那支低一級。


《陌上歸人》是區瑞強第一張中文碟，當年銷量三十萬張，全年銷量第一，「許冠傑都輸埋俾我。」


這就是Albert的首張黑膠唱片。


一直走民歌路線的區瑞強，在八六年時曾短暫脫離民歌手形象。


八三年剛轉唱片公司，去完希臘旅行的他一身健康膚色，唱片封面由葉青霖操刀。


三十年來從無間斷當DJ，但卻沒有收藏任何歌手的黑膠碟，就連自己出過的四十多隻黑膠碟亦沒有儲齊。


二十歲的區瑞強，應許冠傑邀請到澳門演出。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄