（《蘋果日報》圖片）

去年憑內地劇《步步驚心》忽然在國內爆紅的鄭嘉穎，二度做埋視帝後更加火紅，孭飛的新劇《拳王》收得的同時，既惹來網民譏為「橡膠穎」，又被同劇演員數臭性格難頂。
繼早前身兼武指演員的冼灝英，不留情狠批鄭嘉穎無品，同劇的李家鼎亦加把口，指視帝打拳交行貨，對人唔瞅唔睬扮大哥；識打泰拳的林國斌同盧惠光，睇完《拳王》後亦彈鄭嘉穎打泰拳，手勢錯晒！
鄭嘉穎唔似拳王，係沙包！

鼎爺以為佢啞
無綫新劇《拳王》熱播，一出已高開三十點收視，劇中「火勢」亦相當猛烈。身兼《拳王》演員及拳術顧問的冼灝英，公開數臭男主角鄭嘉穎，直斥格衰，恃寵生驕，態度差；令冼師傅最無法接受的，是嘉穎經常質疑他的拳術意見，拍攝時二人不時有爭拗，最後甚至無交流面左左。
視帝氣焰，要受氣的前輩唔止冼灝英一個。劇中飾演擂台評判的李家鼎，提起鹹魚翻生的鄭嘉穎一樣谷爆。「佢入到廠好似啞咗咁，唔同人打招呼，由上至下嘅同事都無乜點睬！」

出拳似拍烏蠅
今非昔比，有指鄭嘉穎非常錫身，拍《拳王》期間，打拳動作交行貨，對前輩提點不單當耳邊風，甚至黑面露出不滿。上週一（四月十六日），鼎爺偕子李泳豪接受《今日VIP》訪問，便一度暗寸鄭嘉穎錫身。「演員無論拍騎馬，打拳都好，要用心去做，唔好話上咗一哥位就求其交兩下，唔好當正自己係大哥，我最憎嘅！」事後求證鼎爺所指的一哥是否鄭嘉穎，他沒有加以否認還繼續噴：「胡定欣都搏到盡，打得唔專業唔緊要，起碼肯投入，唔似男主角咁，錫身到打拳似拍烏蠅，稍為受傷，又叫停機去洗傷口。（你覺得邊個打得好？）黃浩然打得盡力，陳志健最投入，佢試過拍十幾個鐘，打到差啲休克。」李家鼎說。

錯晒
由於《拳王》中與男女主角擂台對打的，全是真材實料的泰國拳王，在鏡頭前一出手便高下立見，泰拳經驗豐富的林國斌及盧惠光睇完《拳王》後，均認為劇中演員尤其孭重飛的鄭嘉穎，泰拳手勢錯得離譜。記者致電該劇監製羅永賢，他解釋：「我哋已經盡量做好，有啲同事好似陳志健、黃浩然學過泰拳就好啲，其他可能太忙無時間學，所以有不足。冼師傅未必個個場口睇晒咁多個人點打，導致有不足之處，好多謝泰拳師傅或者同業嘅指點。」


林國斌：「打泰拳手踭係放低啲，一來要護面，二來咁樣直接出拳先最快，但啲男主角個個起晒踭，泰拳基本手勢都做錯。可能要就鏡頭啦！反而同佢哋對打嗰班，就睇得出係專業，姿勢正確。」


盧惠光：「拍出嚟同真正泰拳手勢係有出入，可能要就畫面，所以打成咁！」

無綫高科技　紙牌觀眾
《拳王》第三集一幕扮在新伊館舉行的拳賽，發現席上數百觀眾，大半係人形紙牌頂檔。原來去年拍攝期間適逢臨記就最低工資問題，同無綫講唔掂數要罷工，臨時演員靠幕後搵家屬朋友充當。但人數唔夠，監製唯有用最原始方法，下令全部幕後影人頭相做紙牌觀眾，慳番電腦特技費。對此有份拍攝該場口的陳志健、黃澤峰及李家鼎也承認此事，還笑說若眼利，會發現紙牌觀眾中有藝人面孔。 ####


上週《拳王》做宣傳，鄭嘉穎同每個演員有傾有講，唯獨同唔妥佢嘅冼灝英零交流，冼更全程企埋一邊，同嘉穎保持距離。


《拳王》熱播，男女主角成是非焦點，鄭嘉穎俾人話扮大牌，胡定欣則被指為新姣精。至於李詩韻亦力撐嘉穎無擺架子。


中立陳志健：「佢同冼師傅可能因觀點與角度，導致有啲誤會。人夾人啦，嘉穎對我幾好！」


暗寸黃澤峰：「嘉穎向來都係孤獨村，性格自我，俾人咁話唔出奇，但我同佢就無嘢！」


撐嘉穎黃浩然：「唔知點解冼師傅會咁講，但嘉穎同我有偈傾！」



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄