《起勢搖滾》中的醉攬場面，講述林欣彤為咗幫Alan（左）出頭而同人劈酒，林欣彤醉到又喊又笑，但兩人冇酒後亂性，攬一陣就算數。

有攬冇錫

做歌星唔只得把口，撈埋過界多線發展先賺到盡，連祖兒千嬅都要接戲變全能天后。
《超級巨聲》出身的林欣彤（Mag），在本月中上畫的《起勢搖滾》中，飾演豪氣band妹，同MR.主音Alan有感情線，不過全部點到即止，緊守玉女底線。
唔似乳模Jeana在戲中要剝要露，林欣彤最激戲分只係飲醉酒同Alan互攬，嘴仔都掂唔到。不過Mag話場戲拍得好辛苦，「我嗰日唔舒服啪咗藥，仲要拍通宵，拍完成個人暈咁滯呀！」


由拍開MV的導演李志倫（Jacky）首次執導的《起勢搖滾》，講一班band友本來各自打份悶工，一次重遇令佢哋重拾理想決定再次夾band，雖然電影搵番真正樂隊「MR.」扮band友，但唔多唔少令人聯想起TVB神劇《天與地》。

唔敢真醉
唔似《天》劇要陳豪黃德斌夾硬唱，《起》片除咗搵MR.做band友，又搵埋小巨肺林欣彤做band妹，戲中Mag更會唱三首歌，當睇mini concert都抵。唱歌冇難度，但片中的醉酒戲，絕對考起拍戲經驗唔算豐富的Mag。「呢場戲講有人柴Alan台，我為咗幫佢出頭，所以同人鬥飲，結果佢俾人打傷，我就醉晒！拍戲當日我唔舒服，啪咗啲感冒藥先去拍，仲要拍通宵，拍完成個人暈咁滯呀！我食咗藥一滴酒都唔飲得，要靠化妝整到塊面紅卜卜。好在我有朋友試過飲醉，我咪學佢哋醉咗就亂講嘢、無端端喪喊，好在導演都收貨！」

一王兩后
小巨肺錫身封嘴，MR.主音Alan好在仲有另一對手詩雅有咀戲。戲中份份工都做唔長的Alan，讀書時期已當鋼琴公主詩雅係女神，後來兩人重遇，Alan被迫喺詩雅同林欣彤中二揀一。奪去Alan熒幕初吻，詩雅話完全冇感覺，「嗰幕講Alan推我埋牆強吻我，得半秒咁大把，而且一take過，快到我都冇乜感覺！Alan之後同我講，話好後悔唔使NG添！」Alan想搵人激咀，下次要求導演畀佢同Jeana做一對咪得囉！

偏心錫晒林欣彤：導演冇鬧過我！
本月19號上映的《起勢搖滾》，演員多數係新人，加上導演Jacky亦係第一次做電影導演，難免容易忟。據知Jacky喺片場成日捉住班演員鬧，尤其MR.更係重災區！導演有火，偏偏拍戲經驗唔見得比MR.豐富好多的林欣彤，竟然冇被照肺，而且人前人後都叫佢「彤彤」，擺明錫出面！ Jacky偏心錫晒，林欣彤上週回應時笑到四萬咁口，「你點知㗎？導演係冇鬧過我呀，佢係欺凌我！（點欺凌？）講笑啫，其實導演會成日同我講笑。（導演想追你？）佢當我小妹妹，一定唔係追我！」

MV之王
97年入行的Jacky，屬行內有名的MV導演，早年有MV界余文樂之稱。李克勤、陳慧琳和吳雨霏（左圖）等常搵Jacky執導，謝安琪亦搵佢做演唱會導演。有錢靚仔，又曾與衞蘭、方皓玟傳緋聞，但Jacky現時已婚，應該只係當林欣彤係小妹妹啫！

拍到怕
出道兩年，林欣彤只拍過3齣戲，但佢竟然話拍戲拍到怕，「我暫時唔會再接戲喇，我真係想專注番音樂方面！其實之前拍戲係因為公司想我試吓唔同發展，但我覺得試過就算，希望今年可以專心做音樂。」 ####


唔肯返屋企繼承藥房生意嘅Alan，最初因為睇中主音林欣彤先肯加入。


林欣彤戲中同現實一樣唱得，可惜後來聲帶有事要做手術，被迫退出樂隊。


快閃kiss 林欣彤與Alan冇咀戲，反而Alan同另一女角詩雅就有1秒kiss，俾Alan強吻嘅詩雅，戲中推開對方反抗，擺明受軟唔受硬。


片中彈鋼琴有一手嘅詩雅，係Alan中學時期嘅女神。27歲詩雅着校服扮學生妹，都算有說服力！


港女Jeana入戲 Jeana喺戲中係正宗港女，嫌棄男友Dash玩音樂冇前途，最終搭上有米上司。乜咁似有半打男友任揀嘅Jeana本人嘅？


開鏡拜神時，林欣彤有得企喺Jacky隔籬切燒豬，極有地位！


Jacky喺微博都話自己狂撩林欣彤，錫到出晒面！


《起勢搖滾》


《我愛HK開心萬歲》


《Diva》拍過賀歲片《我愛HK》同即將上畫的《起勢搖滾》，Mag下月仲有一套同大師姐容祖兒合作的《Diva》見街。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄