無綫與四大決裂後，Eason幾乎冇再出現TVB，去年初演藝人協會舉行周年晚宴，樂易玲和Eason才有機會碰頭，兩人攬頭攬頸似冇事，但成年後都未破冰。《壹週刊》圖片

無綫同四大唱片公司決裂兩年多，最近TVB單方面宣布5月將正式破冰，6月更會大搞晒冷騷，歌手如陳奕迅、謝安琪等再現TVB，重振音樂節目聲勢。
不過據知破冰原來冇乜誠意，所謂「開綠燈」可讓歌星亮相其他電視台，合約內附加的「7日通知期」，批准與否決定權全在無綫手中，四大唱片得悉辣招自然想縮沙，更導致原定的破冰騷爛尾收場。連無綫高層樂易玲回應時亦潑冷水：「全部都未傾實，5月1號嘅嘢我都唔知㗎！」睇嚟破冰未係時候喎！


無綫因版稅問題與四大唱片公司決裂，兩年多來要靠英皇、星煥國際等歌手充撐音樂節目；直至近日新加盟無綫的非戲劇製作總監余詠珊向傳媒宣布，5月1日起與四大唱片公司將會破冰，歌手陸續歸位外，6月更會舉辦晒冷音樂騷，四大公司歌手正式回歸。

怕秋後算賬
TVB更表示會賣大包，容許合約歌手亮相其他電視台，歌手唔使再被綁死，聽落幾筍。不過有唱片公司高層向本刊爆料，指所謂破冰只是無綫出口術：「TVB邊有咁好死吖！TVB話如果對頒獎禮有興趣嘅就簽番歌星約啦，唔簽嘅話，都有機會以嘉賓身份上啲綜藝節目，上《勁歌》同攞獎就絕冇可能。」原來無綫美其名可亮相其他電視台，但限制多多：「無綫提出歌手想上其他台，要喺7日前先入紙通知，你可以入紙，但佢唔一定批喎，唔批仲大鑊，大家知TVB幾小器啦！唔怕秋後算賬咩！邊個歌星敢入紙呀？而且好多時上其他節目都未必7日前會知，未必可以符合TVB條件。不過件事搞咗咁耐，環球同華納係有啲奀啲嘅歌星想返TVB，但係咁大間唱片公司點會畀你一個人決定！」

樂壇23條
據知無綫向四大唱片公司開出幾項重要條件，表面上准許歌手亮相其他電視台，但實則要經過批核，唔批都冇聲出，而且歌手都要先簽一份歌星約，講到尾同以前合約冇分別。 •歌手要亮相無綫以外的香港區電視台，需7天前入紙向製作部申請。 •必須經過製作部審批，審批結果不得異議。 •以上條款只適用於合約歌手及新簽約歌手。

四大未傾掂
記者截稿前多次聯絡負責跟四大破冰的無綫非戲劇製作總監余詠珊，但未有回覆。上週二（27日）樂易玲回應時則直言未落實破冰日期：「全部都未落實，有啲歌手係想返嚟但仲傾緊；5月1號嘅嘢我都唔知㗎！余小姐講嘅你問番佢啦！」而四大唱片之一的環球董事總經理黃劍濤（Duncan）則表示：「版稅已達成咗協議，歌手可以上TVB，等緊TVB最新嘅合約。（但上得音樂節目未呢？）咁要睇番合約內容，呢方面要傾。（有冇聽過7日通知期？）聽過，但要等到份新約，睇咗指引至知，總之一定傾好晒至簽約嘅。」即係一日未破冰，林峯、福祿壽有排睇。

無綫非戲劇製作總監　余詠珊
合約仲整緊，希望4月底可以齊晒所有合作歌手名單，再閉門開會傾嚟緊點捧班歌手，希望重奪無綫龍頭地位。

環球董事總經理　黃劍濤（Duncan）
等緊TVB最新嘅合約，（上音樂節目）呢方面要傾，一定傾好晒至簽約嘅。

謝安琪
同TVB合作一定係好事，返唔返去簽約冇大意見，但同各台冇合約都幾好，係咪綁死就梗要傾啦，其他電視台都唔會咁！

許廷鏗
想同其他唱片公司合作，係大趨勢。我唔抗拒去其他台，但始終我TVB出身，暫時好舒服囉。

新電視台搶歌手
TVB之所以咁緊張放定風話5月破冰，皆因nowTV及王維基的CTI都要埋班搶星，無綫惟有速戰速決迫歌手簽約。

歌手拍劇
由王維基投資的CTI年尾開台，除密密挖角開劇，最近更已力邀環球歌手加盟，包括劉美君和關楚耀等；關楚耀更已落實拍劇，劉美君則會主持綜藝節目。兩人都有出席電視台的動土儀式。

力谷綜藝
nowTV「觀星台」及新開的「爆谷台」都邀請到郭富城做新節目，城城更自稱是「now音樂部分藝人」；而新加盟環球的吳雨霏、以及陳柏宇等都會亮相now音樂節目。 ####


欠缺四大歌手撐場，無綫惟有集中火力捧英皇歌手及親生仔女，林峯去年攞到「金曲金獎」被評造馬人氣下滑，可以話係無綫一手造成。《蘋果日報》圖片


齋現身禁唱歌 Fiona柏豪高B班身為華納歌手的薛凱琪和周柏豪，2月上過《千奇百趣高B班》玩遊戲，算是破冰前奏，不過未正式簽番份歌手約，都未可以上音樂節目。《蘋果日報》圖片


Eason受訪 Eason 1月初出席九龍灣活動，因活動場地於無綫落廣告，他才有機會接受《東張西望》訪問，Eason搞笑地說：「好耐冇見，好掛住你。」《蘋果日報》圖片



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄