去新加坡，周杰倫除咗食海南雞飯同肉骨茶，原來仲去賭場賭錢，同行有保鏢保護，包保無人可以埋身騷擾周董攞簽名！
三大規條
平日打開報紙見到周杰倫嘅新聞，十居其九都係緋聞，但早排有新加坡賭客向當地《聯合晚報》記者爆料，話7月尾睇住周董去咗4月尾先開業嘅濱海灣金沙賭場（Marina Bay Sands）貴賓廳豪賭百家樂，可惜手風唔多順，兩日輸咗200萬坡紙，大約係港紙1,100萬左右。
爆料賭客話，當日响貴賓廳見到周董，在場賭仔個個都呆一呆，無諗過呢位亞洲小天王都鍾意賭番兩手。
據賭客講，周董賭錢有三大要求，第一唔要美女荷官，要求換個阿嬸，估佢可能驚分散注意力；第二每注不低於6位數字，平均每注10至20萬坡紙（約57至114萬港元）；第3指定要玩百家樂。
貼士手鬆
雖然賭到咁大，但爆料人話佢輸贏都面不改容。俾貼士亦好手鬆，試過一鋪贏咗2萬坡紙（約11萬港元），居然俾6,000蚊坡紙貼士（約3萬4千港元）。
去完濱海灣金沙，又有賭客爆料話見到周董去埋新加坡聖淘沙世界賭場。轉場再賭，點知都係輸，加加埋埋輸咗2,500萬港元。
除咗新加坡，仲有傳聞話周董舊年去美國拍《青蜂俠》，趁得閒去拉斯維加斯賭兩手，又話輸咗780萬港元。
天王變爛賭二，周董承認先後現身新加坡兩大賭場，仲話自己鍾意去賭場小試運氣，至於贏多定輸多？周董唔肯講，只係話：「終於有新聞蓋過緋聞，總比緋聞好一點。」
瑤瑤抄上癮
瑤瑤第二張個人專輯終於出街，唱片公司仲搵嚟周杰倫、曹格、S.H.E嘅Ella幫手寫歌，強勁班底務求幫瑤瑤打造家傳戶曉年度之歌，唔通仲係愛的抱抱咩！
首支派台作《Honey》，改編韓國5人女子組合Kara同名歌曲。MV出街後，有網友發現部分場景熟口熟面，原來同韓國人氣組合「少女時代」一個手機廣告有8成相似，尤其係大家都扮美女廚神整蛋糕。
抄完MV，瑤瑤唱片封面戴鹿角，同樣俾人發現明抄王心凌5年前嘅「鹿角甜心」造型，以為歷史悠久無人發現，但瑤瑤唱片公司解釋：「此鹿非彼鹿。」唓！你講晒啦！
何潤東鬧爆黃曉明
黃曉明响微博話後悔飾演「洛熙」，令身兼男主角及製作人嘅何潤東好勞氣，仲話海綿蛋糕先後3次放飛機，無嚟台灣做宣傳，收視責任全部推向黃曉明身上。
微博訴苦
由何潤東、黃曉明、大S孭飛嘅台灣偶像劇《泡沫之夏》，收視依然一池死水，就連全城噓爆，由楊謹華、明道主演嘅《鍾無艷》，成績已經從後追上《泡》劇。
第一次拍台劇衰到貼地，黃曉明早排响微博吐苦水，後悔聽大S提議，選擇飾演性格同表情都比較陰沉嘅「洛熙」，因為身邊朋友話，如果由佢嚟做何潤東嘅癡情有錢仔「歐辰」，效果一定更加好，收視分分鐘可以起死回生。
朋友講乜，黃曉明都信到十足，當中有冇Angelababy份無人知，但海綿蛋糕呢番肺腑之言，就激嬲身兼製作人嘅何潤東。
「其實我聽到他（黃曉明）這樣說，我自己蠻難過，因為一開始我是要演他的角色，然後他加盟，他說要演『洛熙』，我就讓他演。」
愈爆愈多
何潤東話，當初籌備拍《泡》劇，佢同大S都希望可以打敗韓劇、日劇，相信黃曉明同佢哋坐埋一條船，一定對套劇有好大期望，估唔到佢居然手指拗出唔拗入。
「如果他覺得後悔演了這個角色，後悔演了這個戲，我覺得對我來說會蠻傷害的。」
兩個男人鬥小器，何潤東仲爆黃曉明遲咗成個月先有期埋位開工。
「最要我的命是4月1號就要拍他的戲，然後3月30號，他的經紀人打電話給我說，他要晚一個月報到。我知道不關黃曉明的事，是電影延遲開工，但應早點告訴我，不能說你來的前一天才告訴我。」
臨時放飛機，《泡》劇播映以嚟，黃曉明前後三次話無期去台灣做宣傳，只有8月15日同何潤東一齊去過湖南宣傳《泡》劇。其實套劇到而家仲未攞到大陸批文，宣傳基地，應該集中台灣先啱，偏偏黃曉明有時間見Baby，無時間去台灣，何潤東發嬲，都好正常啫！
最緊要輸錢唔輸品！（設計對白）
新加坡《聯合晚報》以頭條新聞報導周董輸錢唔輸品，進貢200萬坡紙俾賭場依然面不改容。（翻拍《聯合晚報》）
一連三場巡迴演唱會，咁啱响老家休息嘅孫燕姿都有捧場，仲托住塊面聽歌好陶醉。
以55億美元興建嘅濱海灣金沙賭場，盛傳有高人幫手設計有入冇出強勁風水陣，唔怪之得周董輸多過贏啦！
鹿角造型同王心凌一模一樣，收埋32F巨乳嘅瑤瑤，決定放棄宅男市場，「斷奶」走甜心可愛路線希望男女通殺，目標要砌低「可愛教主」楊丞琳以及「甜心教主」王心凌喎！
少女時代版
努力減肥瘦身瘦腿，瑤瑤MV入面著短裙扮美女廚神，以及枱上面放滿蛋糕載歌載舞，兩大場口同「少女時代」嘅手機廣告，簡直倒模一樣。
瑤瑤版
早知陪Baby好過拍台劇！（設計對白）
你唔做陰功男嘥晒！（設計對白）
黃曉明話當日誤信大S，同何潤東掉轉角色，而家後悔已經太遲，點解啲男人咁鍾意姓賴。
留言列表
{{ article.title }}
