娛聞樂
王維基買國產劇撼無綫 阿佘嘉穎局住反骨
電視牌照仲未到手，但王維基上周就藉慶祝城電 20周年，親自率領旗下過百藝人，乘機大晒冷。雖然人多勢眾，但真正擔得起大旗的小生花旦，只有黃日華及張可頤等幾位。要撬走無綫 一班小生花旦，王維基深知難過登天，於是他一早作部署，斥資過千萬掃入不少高質素的韓劇、台劇及國產劇。
近年密密北上拍劇搵人仔的鄭嘉穎、佘詩曼和蔡少芬將會中招，在城電頻道出現打無綫，局住反骨。
內地投資者猶如識印銀紙，高價利誘港星北上拍劇，難怪佘詩曼（阿佘）話拍一套夠錢置業。過往專制的無綫，近年態度放寬，唔再阻人發達，小生花旦輪流北上吸金，形成不少國產劇都有無綫的小生花旦助陣。
我睇錢做人！（設計對白）
鄭嘉穎因《步步驚心》在國內竄紅，其片酬更高見每集廿萬。近日他拍的《葉問》成為港台爭購目標，版權費高達 400萬。
食慣兩家茶禮㗎啦！（設計對白）
經常自稱仲欠無綫一套劇的阿佘，就遲遲冇期還債。而她孭飛講家族情仇的《嫁入豪門》將在國內播映，王維基亦對此劇虎視眈眈。
我控制唔到！（真實對白）
蔡少芬（左二）夥拍劉愷威的《美人無淚》飾演工心計的皇后，戲碼和《金枝慾孽 2》類似。對於《美》劇撼《金》劇，蔡少芬透過經理人說：「呢啲事成日有，我控制唔到！」
蔡少芬打自己
一向把握時機的王維基睇中這點，已密密和國內製作人商議，希望斟掂買到這批國產劇力撼無綫。根據條例，王維基開台前一定要有 300小時劇集存貨，以他現時八套劇在手為例，唔夠半年經已播完。據知他已排定黃金時段播放雙線劇集，頭輪播自家劇，次輪播外購劇。
雖然無綫放旗下藝人北上拍劇時，在合約中聲明無綫有優先購入權，但最終價高者得。「依家大陸劇好貴，至少要二百萬先有交易。以前香港冇人同無綫爭，不過王維基肯掟錢，所以無綫都幾頭痕。」知情人士說。
鄭嘉穎正在趕拍的《葉問》、佘詩曼已拍竣的民初劇《嫁入豪門》，都是王維基志在必得的目標。他更希望買到由蔡少芬孭飛的宮廷劇《美人無淚》，用來硬撼由蔡主演的《金枝慾孽 2》，擺明搵無綫人撼無綫。
上周王維基搞活動，撐場演員頗多，但一線小生花旦寥寥可數，只有張可頤和黃日華可以上台宣傳。
一班城電藝人上台影大合照，但忙於補妝的張可頤就和黃日華等埋中間位，盡顯一哥一姐氣勢。
邀孭飛藝人宣傳
王維基屆時更嘗試搵外購劇集的主角作宣傳，無綫親生仔鄭嘉穎當然唔制，但與無綫只是部頭約的阿佘和蔡少芬，就隨時幫城電手。城電傳訊助理 Jessie笑說：「初初開台只可以播到一線自製節目，另外個半小時就播外購劇。我哋一定會配番廣東話啦！佢哋肯嚟宣傳一定無任歡迎！呢個世界冇乜嘢係唔得㗎！」
本刊致電無綫製作資源部總監樂易玲，對於城電買無綫藝人國產劇對撼一事，她沒好氣地說：「都未知政府幾時發牌啦，所以我冇乜好回應呀！」外事部副總監曾醒明則說：「出面咁多劇，我哋買唔晒！如果佢（王維基）咁做仲好，證明我哋藝人有人氣。不過喺香港播嘅話，無綫藝人唔可以幫其他台宣傳。」雖然樂易玲表現輕鬆，實質無綫已緊密部署，擱置了多年的無綫月曆，年底亦重新推出，藉此碼實廣告商。表面風平浪靜，其實背後已經是戰雲密布。
湊夠鐘數
王維基有信心牌照三個月內到手，為符合政府規定，發牌開台須有 300小時劇集和綜藝節目作儲備，加埋外購國產劇，就湊夠鐘數開台。
八劇在手
《還來得及再愛你》 唐禹哲、詩雅
《驚異世紀》 林嘉華、唐寧
《童話戀曲 1314》 蘇永康、廖碧兒
《第二人生》 劉浩龍、趙學而
《警界線》 廖啟智、林嘉華
《三面形醫》 林文龍、姜大衞
《開腦儆探》 黃日華、關楚耀
《客家女人》 張可頤、劉美君
王維基早前現身《還來得及再愛你》片場， check實拍攝進度，務求開台前儲定存貨。
無綫劇集最少都有 20集，但由劉浩龍和趙學而孭飛的愛情片《第二人生》只得 15集，亦即得 15個鐘，難怪王維基要劇接劇咁開。
揼本綜藝節目
王喜
王維基搵來曾製作《向世界出發》的製作總監鄧婉媚主理綜藝科，揼本製作《挑戰》，派王喜赴美國穿梭龍捲風、黃宇詩到瓦努阿圖闖活火山等。
薪酬三級制
外間經常指王維基高薪角，本刊收到消息，原來王維基將藝人薪酬劃分三級，每月向藝人發放底薪，由八千蚊起錶，最高月薪六萬，保證他們冇工開都有糧出。
至於拍劇的騷錢則按藝人的當紅程度調整，以一姐張可頤為例，除每月支取六萬蚊底薪外，她每集身價是六萬蚊，若果她為城電一年拍 50集劇，即她可賺取 72萬底薪加 300萬騷錢，一年搵 372萬，相當和味。相反大部分無綫藝人底薪其實只有五、六千，要靠出鏡的騷錢幫補，收入冇咁穩定。
底薪$60,000
除城電一哥黃日華和一姐張可頤外，一班可以擔正一線，而知名度有助提高劇集賣埠價錢的小生花旦，順理成章攞到 6萬蚊月薪。
林文龍
唐寧
關楚耀
林嘉華
底薪$30,000
一班觀眾見慣見熟的甘草演員，當然有條件拎到 3萬蚊月薪。
陳曼娜
吳浣儀
底薪$8,000
留言列表
{{ article.title }}
