一歲九個月大的小浩臻，家人是專業馴犬師，未戒奶已識同狗玩，面對兇猛的瑪蓮萊犬毫無懼色。大人示範後，他自動執起狗帶，狗狗馬上跟隨。

寵物家

細路仔馴犬

2012年09月20日 ~~ 第1176期香港《壹周刊》

本月初，出名兇惡的軍用犬高加索犬流落飛鵝山道，警員到場餵飼，牠不抗拒人類，估計是被主人遺棄。大型犬被棄養，十居其九因為女主人就快做媽媽，恐防狗隻危及新生命，唯有棄之不顧。
但誰說狗與小孩不能共存？棄狗不是唯一選擇，只要馴犬得法，惡犬亦能與小主人融洽相處。以下由專業馴犬師親身教路，所有示範，歡迎模仿。

高加索犬屬俄羅斯軍用犬，必須經特別訓練才可用作家犬。而流落香港山頭的高加索犬身上並無晶片，懷疑有人非法購入後因故棄養。

初階指令—— BB學得

資深馴犬師李德良指，九個月大的孩童，已可學習初級馴犬技巧，如叫狗坐下（ Sit）、俯伏（ Down）、伸手（ Hand）等等。秘訣是成年人向狗發出指令時，逐漸將命令權移交小孩。例如玩拋接波遊戲，家長可指令狗將球交予小主人，久而久之，牠便習慣聽取小朋友發出的指令。

掌心餵食

好多人用指尖拿食物餵狗，易令狗用牙咬奪食物，手勢錯晒！正確應將食物放在掌心，教狗先用舌頭舐舔，然後吞食。

Sit

教小朋友用手勢配合，命令狗坐下，成功時，由小朋友獎勵食物俾狗狗，令牠適應新的服從對象。

高階動作——特訓狗狗

小朋友六歲起，可在家長指導下特訓狗狗做較高難度動作，如逗留（ Stay）、離開（ Leave）、歸還（ Give）。提醒小朋友在狗狗成功執行指令時，要給予食物獎勵，並要配合適當的手勢及動作來提示狗隻。

離開指令（ Leave）

教小朋友用食物訓練狗隻，每次發出離開指令（ Leave）時，輕輕推開狗隻，禁止牠接觸目標物。狗狗學識後，便可阻止牠胡亂吞食地板上的物件。

歸還指令（ Give）

狗咬走物件，用力鬥搶會令牠誤以為玩遊戲。應從下方輕輕握住物件，同時發出歸還指令（ Give），令牠乖乖交出目標物。

神級特技——人狗互信

只要與狗狗建立深厚互信關係，即使小朋友亦可嘗試特訓狗隻，例如踩滑板、倒立等，一般需時三個月至半年才成功，視乎狗狗的悟性。

倒立

教狗仔倒立像教人踩單車，最初要提起後腿輔導牠走路，最難是要狗慢慢掌握只用前腿走路的平衡感，馴犬師李德良教了半年，狗仔才學識。

踩滑板

將狗仔前腿放上滑板，初時先推牠向前行，其後指令牠自行用力向前滑進。馴犬師說秘訣是不硬來，要讓狗仔對滑板好奇，想自行嘗試。