漫遊毒物

Supper Moment試玩《 Rocksmith》　真結他夾 band

2012年09月19日 ~~ 第278期 Face

打機唔一定係沉迷虛擬世界，有時亦可以係一道通往現實嘅橋樑。結他音樂遊戲《 Rocksmith》唔再用手掣或假結他，破天荒俾你直插真電結他玩，仲由淺入深教你真正彈奏技術，等不同年齡玩家，錯過咗年少光陰都能夠打機夾 band學樂器。遊戲用真結他玩，當然要搵真樂手試玩，就搵嚟近日靠一曲〈小伙子〉人氣急升嘅本地樂隊 Supper Moment，睇吓 band友點睇用真結他玩 game喇！

互動片段

Supper Moment試玩搖滾史密夫

阿雞（結他手）
最讚都係啲聲，仲有唔同音效揀，用支平結他都出到靚聲。欣賞佢有即時 play back可以知道自己錯啲乜，同埋打機推動力一定高過就咁學。

Sunny（主音及結他手）
初時聽到用真結他玩都有啲驚佢唔掂，但玩完發覺啲聲都幾真，同埋真係有技術教學，幾適合初學者練習用。另外啲歌都幾啱心水， Sigur Ros新碟都有。

阿達（鼓手）
以前打機嗰啲假結他，玩到好勁都唔知結他個原理係點？呢隻 game就照顧到唔識結他嘅人，又可以幫佢哋認識真結他點玩，係幾唔錯！

CK（低音結他手）
玩落其實有少少 delay，彈完之後唔係即刻感應到，但都接受到嘅。玩過發覺啲樂譜係簡化咗，但都啱音，幾有心機。

機種： PS3、 XBox360
廠商： Ubisoft
類型：音樂
人數： 1-2人
售價：$429（ XBox360）、$458（ PS3）（不連電結他）
查詢： Ubisoft（ 2359 7998）

奴 Comment

最啱懶人
自己都有打過《捽碟機》，呢隻 game用真結他玩對我呢啲想學樂器又懶嘅人就最適合喇！最好搵多啲本地 band宣傳，音樂堂都用佢教學生就好，支持！

打機大玩真結他

隻 game嘅 setup相當簡單，只要用遊戲附送嘅插線接駁電結他同遊戲主機就玩得。一開始會教你 tune音，試過遊戲入面彈嘅音真係同電結他插喇叭一樣。演奏玩法就同一般音樂遊戲相似，音符跌落邊格你就用手指按住嗰格彈一下。初期曲目簡單，未學過結他嘅鼓手阿達都快速上手過關。除咗結他，遊戲仲對應埋 bass（低音結他），最多可以雙打，一個用電結他一個用 bass jam歌最有 feel。不過一 game只跟一線，想夾 band就要同朋友夾好一人買一隻喇！

1插結他

附送線材一邊係 USB頭接遊戲主機，一邊係結他 jack線頭，遊戲有結他同 bass玩法，喺遊戲可自由切換。插電嘅木結他都玩得，不過只會出電結他聲。

2 Tune音

Tune音可能會難到新手，睇住畫面逐條線彈，高音咗會顯示正數，例如＋ 2，咁就要用結他上方扭掣稍為扭鬆條線，直至畫面顯示為 0；相反低音咗就顯示負數，要扭緊條線。

3教你彈

畫面會有數字顯示你要按嘅格數，如圖中所示，左手按住第 2線第 3格，再用右手彈線一吓就得，推介大家用 pick彈，有 feel好多。

4學高招

會教你真實嘅結他技術，例如呢招 slide，見到呢個打斜音符，就要右手先 pick一吓第 12格，跟住左手再按實條線滑去第 8格，真係學到招㗎！

Rising Star： Supper Moment

已經有 170,000人 Like咗〈小伙子〉官方 MV， Supper Moment都坦言呢首歌令佢哋更入屋。

2006年成立嘅 Supper Moment本身係業餘樂隊，兩年前靠個勇字全職搞音樂，成名作〈最後晚餐〉同近期〈小伙子〉都大受年輕人歡迎， Sunny就笑言校園騷多到出唔晒。早排政總反國教集會都會聽到年輕人 cover佢哋嘅歌，最後兩日 Supper Moment更到場獻唱。阿達就話：「聽到好多人用我哋嘅歌放喺唔同場合，例如謝師宴、遊行集會等都覺得欣慰，感覺大家認同首歌嘅 message。」要形容 Supper Moment好簡單，用番佢哋首歌〈是你令我再次找到心跳〉就得喇，曲詞聽落令人感動到震。 Supper Moment已經完成新 EP錄音，想聽要留意喇！
Supper Moment facebook： http://www.facebook.com/suppermoment

必玩！ Classic神曲學結他

除咗真係學到結他技術之外， Supper Moment都大讚遊戲入面用嘅歌夠 classic，好似 Nirvana、 Radiohead、 Muse呢啲大 band都係彈結他必學嘅都有齊。一開始啲歌好易彈，幾秒先彈一、兩粒音，不過隻 game會有類似《 Rockband》嘅生涯模式，慢慢儲分就會開新歌同新難度，等新手慢慢升呢，不過係高手的話就要忍一忍開頭啲初心難度。

遊戲要慢慢儲分開歌，同埋有好多迷你遊戲等收集要素開啟，有一定耐玩性。

神曲推介
Nirvana〈 Breed〉 1991年

Kurt Cobain離世已有 18年，但 Nirvana超然地位依然不減，上年剛好係經典大碟《 Nevermind》誕生 20周年，打機見到呢個經典 BB封面當然第一時間試！遊戲入面有〈 Breed〉同〈 In Bloom〉兩首歌，都係出自呢張神級專輯。

Radiohead〈 High and Dry〉 1995年

Radiohead早前喺台灣、日本開巡迴演唱會，唔少香港 fans仆去睇。遊戲入面佢哋有首〈 High and Dry〉，來自第二張大碟《 The Bends》，反而冇揀最紅嘅〈 OK Computer〉同〈 Kid A〉有啲爆冷。

Eric Clapton〈 Run Back to Your Side〉 2010年

Eric Claption被譽為結他之神，有趣係遊戲入面唔係收錄舊歌如〈 Layla〉，反而揀咗〈 Run Back to Your Side〉呢首較新嘅歌。其實遊戲歌路幾闊， 60年代到 2011年嘅歌都有。

拎 game去柏斯　買結他 9折

隻 game一定要有結他先玩到，對普通玩家嚟講算係一個門檻。其實去淘寶或者小型琴行，都搵到$400左右嘅平電結他。如果真心想學揀支有牌子嘅，可考慮《 Rocksmith》同柏斯合作搞嘅折扣優惠。只要拎 game包裝上嘅貼紙去柏斯，購買 Gibson及 Epiphone結他都有 9折，有得諗。
有效期至： 31-12-2012

玩後感：似真結他玩《 Guitar Hero》

初初聽到用真結他玩都好懷疑，玩落隻 game真係做得好好，感覺上似用真結他玩《 Guitar Hero》。不過遊戲都係睇音符彈，冇乜樂理，單靠隻 game想學好結他冇乜可能，好在可以當推動大家學樂器嘅橋樑。

打完機玩埋結他打鼓 tee

睇 Supper Moment玩完《 Rocksmith》咁過癮，不過就只可以喺屋企玩，如果去旅行或者成班 friend一齊，突然興起想 jam歌的話，呢件 rock爆結他 tee同 rock爆鼓 tee就大派用場！佢外形同一般潮 tee一樣，日常着住去街絕對冇問題，但其實衣服上嘅結他同鼓都裝有電子面板，只要一開腰間嘅小型擴音器就可以發聲，用手一㩒落去結他同鼓嘅相對位置，就會奏出不同聲音，玩法認真。
鼓手阿達同結他手阿雞試過都話呢兩件 tee幾好玩，雖然未算專業，之不過彈結他時用手一按就得，唔似掃真 chord，好易掃到手指起枕。再玩打鼓 tee，就略嫌佢冇咗打真鼓嘅質感，好在有 rock、 jazz等 7種不同鼓聲調校，又可以錄製 3分鐘 solo，玩法幾有 gimmick。

Spec.

尺碼： XXL、 L、 M、 S
電源： 3A電 x4
售價：$568/件
查詢： JC Shop（ 3148 9455/觀塘 apm L1-23號鋪）

用手一按落去就可以發聲，手感可能差少少，但勝在簡單易帶，隨時都 jam得。

要洗 tee的話，只要拆下面板，再拔走擴音器就得，同洗普通 tee一樣。

腰間其實有個小型擴音器用嚟發聲，音量都幾夠，湊夠幾件 tee，夾隊 band更好玩。

Supper Moment
快樂抗爭

玩完音樂 game， Supper Moment話香港音樂，同佢哋創作嘅歌曲一樣正面樂觀。阿達話：「今年有好多成功嘅音樂 event，一步一步追近同內地、台灣嘅距離。如果年尾真係有西九音樂節，希望政府能專注行政工作，統籌留番畀音樂人搞，咁就更好喇！」 Sunny就補充：「香港有好嘅音樂人同樂迷，亦不乏場地配套，軟硬件都有，係衰在各有各搞，變咗溝通唔到。」香港搞音樂難個個知，但呢班後生仔卻不忘夢想與希望，不失為快樂抗爭。